Politikki

Olsvig: Pisassiissutitaqanngitsunik aalisarfiit atorunnaassapput

Qaleralinnarnermi pisassiissutitaqanngitsunik aalisarfiusinnaasut atorunnaarsinneqassapput, qaleralinniarnerlu attsimut isigalugu sukateriffigineqassaaq. Inuit Ataqatigiit siulittaasuat, Sara Olsvig, Qanoruumi pingasunngornermi taama oqarpoq.

Allattoq Anton Gundersen Lihn, Thomas Munk Veirum

decembarip 21-at 2017 15:52

Naalakkersuisut aappaagu qaleralittassat amerlassusaat sapaatit akunnerat kingulleq nalunaarutigaat.

Tassalu Uummannami, Upernavimmi Qeqertarsuullu tunuani qalerallittassat siornatulli amerlatigipput, pinngortitaleriffiup inassutaanit 8000 tonsinik amerlanerullutik.

Sara Olsvigili naapertorlugu, pisassiissutitaqanngitsumik aalisarfiit atorunnarsinneqassasut, naalakkersuisut aalajangiisimapput, taavalu pisassiissutit maanna aalajangiiffigineqareeraluartut ukiumut 10 procentimik ikilisinneqartassasut isummerfigineqasalluni.

- Naalakkersuisuni isumaqatigiissutigisarput aammalu Inuit Ataqatigiinni angusimasarput tassaavoq, sinerissap qanitytuani qaleralittassiissutit pillugit sukaterisoqassaaq, killeqanngitsumik aalisartitsiveqarneq atorunnaassaaq. Taakkuuppullu aamma politikkikkut oqaseqartartutta piumasaqaatitut saqummissai, naalakkersuisuni aamma naammassisagut, Inuit Ataqatigiit siulittaasuat Qanoruumut pingasunnorgnermi taama oqarpoq.

AAMMA ATUARUK IA-p killiligaanngitsumik aalisartitsiffeqarneq atorunnaarsikkusukkaa

Sara Olsvigillu aamma aalisarnermi piujuaannartitsinissaq IA-mut pingaartuusoq tikkuarpaa. Tamannalumi aamma naalakkersuisoqatigiinnissamik 2016-imi ukiakkut isumaqatigiissuteqarnermi ilanngullugu aallanneqarpoq.

- Pivujuaannartitsinermik ingerlatsineq uagut qitiulluinnartikkatsigu aammalu naalakkersuisuni piumasaqaatigiuakkatta ilagimmagu, Sara Olsvig Apollo Jeremiassenimit pingasunngornermi apersorneqarluni taama oqarpoq.

Taamaannerali 2017-imi 2018-imilu qaleralittasiinermi imaaliinnarlugu takujuminaappoq, ukiunimi taakkunani Pinngortitaleriffiup inassutaannik amerlanerungaartunik pisassaqartarpoq. Aamma pisassiissutitaqanngitsunik aalisarfiit Naalakkersuisoqatigiit nutaalli atuutilermata allangunngillat, naaak taakkorpiaat pillugit nalunaarutissaq februaarimi tusarniaasutigineqaraluartoq.

Sara Olsvigili naapertorlugu pisassiissutitaqanngitsunik aalisarfiit maanna atorunnaassapput.

KNR-ip pisassiissutitaqanngitsunik aalisarfiusinnaasut atorunnaarnissaat itisiliiffigeqqullugu aalisarnermut naalakersuisoq, Karl Kristian Kruse.

AAMMA ATUARUK Naalakkersuisut aalisagartassiinerat WWF-imit isornartorsiorneqartoq

AAMMA ATUARUK Ukioq manna qaleralittassiissutit ilangaatsiarsui qaqinneqanngillat