Ukioq manna qaleralittassiissutit ilangaatsiarsui qaqinneqanngillat

Aappaagumulli qaleralittassiissutit allanngortinneqanngillat.

Sinerissap qanittuani qaleralinniarneq ukioq manna ajornartorsiorfiuvoq. Tamanna kisitsisinit kingullernit decembarip aqqarnganneersunit takuneqarsinnaavoq, ingammillu 6 meterinit takinerusunik angallataatillit qaleralittassiissutit tamakkeruminaatsippaat.

Ingammik Aqutsisoqarfimmi Upernavimmi qaqinneqartut pisassiissutigineqartunit ikinnerunerat erseqqippoq, qaleralittassiissutimmi 4.231 tonsiusut 36 procentiinnaat qaqinneqarmata.

Qeqertarsuup Tunuani angallatinut 6 meterinit takinernut qaleralittassiissutit 4.901 tonsiusut affarinngisaalluunniit pisarineqarput.

Aqutsisoqarfimmilu Uummannami angallatinut taama ittunut angusaqarnerulaarput, tamaani pisassiissutit 3.138 tonsiusut 60 procentii pisarineqarmata.

AAMMA ATUARUK Biologit inassutaasa malinneqannginnerat akisunaarneqarsinnaasoq

Umiatsiaararsortut amerlanerusunik pisaqarput, taakkuli aamma qaleralittassiissutit tamakkinngilaat.

Aqutsisoqarfimmili Uummannami qaleralittassiissutit 6.324 tonsiusut 94 procentii qaqinneqarput.

Taakkuli kisiartaallutik qaleralittassiissutimik tamakkernissaannut qanillattorput.

Qeqertarsuummi Tunuani qaleralittassiissutit 5.106 tonsiusut 72 procentii pisarineqarput, aqutsisoqarfimmilu Upernavimmi umiatsiaararsortut ajornartorsiornerpaapput taakkumi qaleralittassiissutit 5.269 tonsiusut 67 procentiinnaat pisarineqarput.

Aqutsisoqarfinni pingasuni sinerissap qanittuani qaleralittassiissutit katillugit 28.000 tonsiungajapput, taakkunanngalu 65 procentiinnaat decembarip aqqarnganut pisarineqarput.

Tassalu sinerissap qanittuani qaleralittassiissutini 10.000 tonsingajaat qaqinneqanngillat.

Taamaattoq Naalakkersuisut aappaagumut qaleralittassiissutit allanngortinngilaat.

AAMMA ATUARUK Aappaagumut aalisagartassiissutit aalajangersarneqartut