Naalakkersuisut aalisagartassiinerat WWF-imit isornartorsiorneqartoq
Kitaani sinerissami saarulliit 36.500 tonsit pisassiissutigineqarput, tassa biologinit innersuussutaasut pingasoriaatingajaannik amerlanerullutik.
Uummannami, Upernavimmi Qeqertarsuullu tunuani qalerallit katillugit 8000 tonsit pisassiissutigineqarput - naak pisassiissutit ikinnerunissaat innersuussutigineqaraluartoq.
Tamanna pitsaanngitsoq, WWF-imi biologi Kaare Winther Hansen isumaqarpoq.
- Sinerissap qanittuani qaleralinniarneq saarullinniarnerlu taamaaginnassappat nuanniitsumik nungusaataasumillu aalisalernissamut Naalakkersuisut ajoraluartumik siunnerfeqarput, naak ilaatigut Pinngortitaleriffimmit, KNAPK-mit WWF-imiillu ernumanermik nalunaaruteqartoqareeraluartoq tamannalu ajuusaarnarpoq, Kaare Winther Hansen oqarpoq.
AAMMA ATUARUK Ukioq manna qaleralittassiissutit ilangaatsiarsui qaqinneqanngillat
Nunatsinni nungusaataanngitsumik aalisartoqarnissaa anguniarneqartariaqartoq, Kaare Winther Hansenip politikerinut kaammattuutigaa.
- Piffissaq sivisunerusoq isigalugu aalisartut aningaasarsiornissaannut iluaqutaassaaq, kinguaariinngortussallu inuussutissarsiornissaannut eqqanaarinninnerussalluni, Kaare Winther Hansen oqarpoq.
AAMMA ATUARUK Biologit inassutaasa malinneqannginnerat akisunaarneqarsinnaasoq
AAMMA ATUARUK Aappaagumut aalisagartassiissutit aalajangersarneqartut
