Naalakkersuisut aalisarfiit killilersuiffiunngitsut atorunnaarsinniaraat
Sinerissap qanittuani qaleralinniarnissamut nalunaarut Ilulissani, Uummannami Upernavimmilu pisassiissutitaqanngitsunik aalisarsinnaanermik imaqarunnaarpoq.
Pisassiissutitaqanngitsumik aalisarfiit Inatsisartuni amerlanerussuteqartunit taperserneqarlutik juunimi 2014-imi atuutilersinneqarput. Naalakkersuisut Siumumeersup Karl-Kristian Krusep siunnersuutaanut taamani akerliupput.
Pisassiissutitaqanngitsumik aalisarfeqarneq Sulisitsisunit, KNAPK-mit, pinngortitaq pillugu nunarsuaq tamakkerlugu suliniaqatigiiffimmiillu isornartorsiorneqarpoq. Qaleralinniarnermut ingerlatsineq atorunnaarsinneqartoq, Nunattalu nunanit allanit tusaamaneqarnera innarlerneqartoq, Suliniaqatigiiffiit isumaqarput.
WWF-ip nuannaarutigaa
Aalisarnermut naalakkersuisoqarfimmi immikkoortortaqarfimmi pisortaq, Emanuel Rosing, naapertorlugu, Naalakkersuisut piumallerunik nalunaarummik atuutilersitsisinnaapput.
Qaquguli atuutilersitsisoqarniarnersoq immikkoortortaqarfimmi pisortap oqaatigerusunngilaa.
Taamaattoq tusarniaasoqarnera pinngortitaq pillugu nunarsuaq tamakkerlugu suliniaqatigiiffimmit nuannaarutigineqarpoq.
- Atulersinneqarneranit kukkunerusoq takuneqarsinnaavoq, killeqanngitsumimmi pisassiiffiusartut atorunnaarsinnissaannut nalunaarusiamik tusarniaasoqarnera suliniutaalluartorujussuuvoq.
Pinngortitaq pillugu nunarsuaq tamakkerlugu suliniaqatigiiffimmi biologi Kaare Winter Hansen oqarpoq.