Nuup Kangerluani uuliamik misissukkat bakteerianik nungusartinneqartut

Ilisimatuutut misissuinerminni bakteriat tappiorannartullu sorliit uuliamik nungutitsisinnaanersut uuliallu akua suna issittup imartaani nungutinneqarsinnaanersoq nalunaarsorneqassaaq. 

Aarhusip universitetiani uumassusilinnik ilisimatusarfimmit, arktisk forsknings centerimeersoq Leendert Vergeynst ilisimatuut misissuineranni siuttuuvoq. Nunattalu immikkut soqutiginarneranut pissutissaqarpoq.  

- Issittoq immikkuullarissuuvoq. Immap nillernera sikuusarneralu pissutigiinnarnagit. Tassami immap taamaannera uuliamik kuuttoortoqassagaluarpat sunniuteqassaqaaq, taanna oqarpoq.

AAMMA ATUARUK Umiarsuit Issittumi uuliamik kinertumik atuivallaarunnaartut

Uuliamilli kuuttoortoqassagaluarpat pissutsit allat aamma apeqqutaapput. Assersuutigalugu imaq upernaami aasamilu tappiorannartorpassuaqartarpoq, tamakkualu immami inuussutissaq tamaat nerisarpaat.

- Inuussutissaq immami bakterianut, uuliamik nungusaasinnaasunut, pingaartuuvoq. Tassalu imaq inuussutissakikkuni arriitsumik nungukkiartortitsissaaq. Alla aamma tassaavoq, issittumik bakteriat uuliamik nungukkiartortitsisinnaanersut ilisimannginnatsigu. Tamakkuami uuliaterneqanngisaannarsimasuupput, Leendert Vergeynst oqaluttuarpoq.

Uuliap akuisa ilaat mikisuaqqat allaniit navianarnerungaatsiarput, taamaammat misissuinermi taakku sammineqarput. 

- Uuliami akuutissat akuleriissut arlallit toqunartupilussuupput. Uanilu ajornartorsiutaavoq uuliamik kuutsitsisoortoqarujussuarpat, akuutissat akuleriissut tamakkua imaani avatangiisinut sunniuteqassammata, aammali aalisakkat inunnit nerineqarsinnaajunnaarsinnaapput, ilisimatooq oqarpoq.

Misissuinermi misissugassat mikisut millimeterip qulerarterutaanik angissusillit misissorneqassapput, tassani uuliat akuiagaanngitsut assigiinngitsut marluk umiatsianullu dieseli piffissami aalajangersimasuni imermiitinneqassaput, taamaalilluni nungusarneqarnersoq takuneqarsinnaalissalluni.

Misissugassanik juulimi katersuisoqarput taava aamma septembarimi aappaagulu maajimi katersisoqassalluni. Inerneri Aarhusip Universitetiani Arktisk forskningscenterimi tamatuma kingorna misissorneqaqqissaassapput.

- Ilisimatuutut misissuinerput marlunnut atorsinnaavarput. Siullermik issittup uuliakoornermi imminut minguillisarsinnaassusia pillugu ilisimasanissaagut. Aappassaanik uuliakoornermi periutsit sorliit uuliakoornermik saliinissamut atorsinnaanerannik ilisimalikkanik, avatangiisit pillugit ingeniørinit atorneqarsinnaasunik, katersissaagut. 

Leendert Vergeynstip misissukkat mikingaarmata avatangiisinut sunniuteqassanngitsut erseqqissaatigaa.

AAMMA ATUARUK New Yorkip uuliasiortitseqatigiissuit eqqartuussivilersuutilerai