Nuummi aqqusinermi ujartuillutik angalaartartut: Angerlarsimaffeqangitsut sumi tamaaniipput

Aqqusinermi ujartuillutik angalaartartut tassaapput, kommunip angerlarsimaffeqanngitsunik ikiuiniarluni suliniutaasa ilaat. Angalaartartut aqqusinerni naapitassarsiortarput, inuullu siumukkamik qanoq issusia malillugu sapinngisamik ikiorniartarpaat. Angerlarsimaffeqanngitsutut inuusut ikilisinneqarnissaat siunertaavoq.

- Angerlarsimaffeqanngitsut sumi tamaaniipput. Inuttut qanoq ittuunerat allanisulli aamma ippoq. Ilittut uattullu ittuusinnaavoq. Imaassinnaavoq aqqusinermi inuk takusarput sivisuumik atisaminik errorsisimanngitsoq, Unni Holm Dyring, Kommuneqarfik Sermersuup aqqusinermi ujartuillutik angalaartartuini ulluinnarni aqutsisoq oqarpoq. 

Ujartuisut aqqusinerni angaalaarnerisa saniatigut suliaannut ilaapput angerlarsimaffeqanngitsumik Najugaqarnissamut Sungiusarfimmi inuttut piginnaasanik sungiusaaneq, nammineq najugaqarnissaanut sungiusaaneq aamma Uummateqarfimmi qulaajaaffiginninneq, kiisalu Unnuisarfimmik atuinissamut periarfissiineq.

- Sulisut sullisilerneqartarput, angalaarnerminnilu pinngitsoornatik marluusarlutik. Angerlarsimaffeqanngitsut sumiiffigisinnaasaannut orniguttarput. Naapitsigaangamillu atassuteqaqatigiinnissartik aallartittarpaat, Unni Holm Dyring oqarpoq.

Aqqusinermi ujartuillutik angalaartartut angerlarsimaffeqanngitsoq aqqusinermi, Uummateqarfimmi imaluunniit Unnuisarfimmi siullermeerlutik naapikkajuppaat. 

Uummateqarfik tassaavoq angerlarsimaffeqanngitsunut ornittagaq, tassa innuttaasoq uffarnissamut, errortanik atisaqarnissamut, nujaleriffimmi killortinnissamut ulluunerani tassani periarfissinneqartarpoq. Tassani aamma nammineq inuttut atukkani pillugit sulisumik oqaloqateqarsinnaavoq. 

- Angerlarsimaffeqanngitsutut inuunerminnik allanngortitserusuttut naapinnerusarpagut. Taakkulu tassaasarput ikiortariaqarnerminnik paasinnissimasut neqeroorutitsinnillu tunineqarusuttut, Unni Holm Dyring nassuiaavoq. 

Suleqatigiinnissaq pisariaqartoq

Angerlarsimaffeqanngitsut pillugit Kommuneqarfik Sermersooq suliaqartilluni sapinngisamik ilusilersorluakkamik ataqatigiissaarluakkamillu suleriaaseqartariaqarpoq.

- Eqqarsaatigivara, angerlarsimaffeqanngitsut atugaasa assigiinngitsorujussuusinnaaneri, taamaattumik neqeroorut innuttaasumut naleqquttuusariaqarpoq, René Kvist, Kommuneqarfik Sermersuumi inersimasunik isumaginninnermi oqartussaaffeqarfimmi pisortaq oqarpoq.

Innuttaasumut naleqqusaaneq angerlarsimaffeqanngitsut kommunimit sullinneqarnerata ajunnginnerpaamik kinguneqarnissaanik siunertaqarpoq.

- Tassa aqqusinermi ujartuillutik angalaartartut suliaasa pingaarnerit ilaat, kommunimi susassaqarfiit oqartussaqarfiillu assigiinngitsut akimorlugit sulineq. Aamma taamaalilluni angerlarsimaffeqanngitsup oqartussaqarfinnut assigiinngitsunut innersuunneqaqattaarnissaq aqqusaartariaqassanngilaa, René Kvist nassuiaavoq. 

Aporfeqartartut

Angerlarsimaffeqanngitsut ikiorneqarnissamut piareersimanngitsut ilaanni aamma naapitassaasarput. Taamaammat aqqusinermi ujartuillutik angalaartartut innuttaasoq suleqatilerniarlugu tamaviaaruteqarnerulaartarput. 

- Assersuutigisinnaavakka inissiarsuit majuartarfeqarfiini sinngumasartut ilaat ikiorneqarnissamut piareersimanngitsut naammattoorsinnaasakkavut. Taakku ikiorserniarlugit immikkut ittumik suliniartariaqartariaqartarpugut. Imaassinnaavoq innuttaasoq unnuisarfimmi unnuinissaannik aallaqqaammut ikioripput, taannalu ikiorneqarnissaminik akuersinissaanut aqqutaasarpoq, Unni Holm Dyring oqarpoq.

Ikiorneqarnissaannut suliap aallartinnissaata tungaanut aqqusinermi ujartuillutik angalaartartut ilungersornerusaqaat. 

- Ujaqattaartarpagut iluatitsinissatta tungaanut, Unni Holm Dyring oqarpoq. 

Angerlarsimaffeqanngitsut qassiunersoq Ilisimatusarfimmimmeersut kingullermik kisimmatigit Kalaallit Nunaat tamakkerlugu 2022-mi 491-iupput. Taakku ilaat Kommuneqarfik Sermersuumi innuttaasuupput, taakkunannga 156-it Nuummi innuttaassuseqarlutik.

Taamaakkaluartoq Unni Holm Dyringip oqaluttuaraa, angerlarsimaffeqanngitsut arlalissuit inuit allattorsimaffianni angerlasimaffeqanngitsutut nalunaarsorsimanngitsut, taamaammallu angerlarsimaffeqanngitsut qassiunerannik nalunaarsuinermut ilaanatik. Taakkuusinnaapput, nalunngisamik arlaanni nalaasaarfimmi unnuiffissarsiortartut, oqarpoq.