Nuummi angerlarsimaffeqanngitsunut kialaarfik Williams Cafémiittartut ilaat: Toqqissisimasaqaagut
Ukiuunerani issisiorneq tamatsinnut, ingammilli angerlarsimaffeqanngitsunut, ilungersunarsinnaasarpoq.
Ukiuuneranilu issisiorneq Nuummi inuit ilarpaaluisa ulluinnarsiutigisarpaat. Taakkua Frelsens Hærimi kialaarfimmut Williams Cafémut ulluinnarni neriartorlutillu kialaarsimaariartortarput.
Williams Café inoqaaluppoq, isersimasullu ilarpaalui olsenerrallutik nallukattarput, ilaalu quitarerput.
Inuit pingasut nalaasaarfimmi ataaserlu alla natermi sinipput.
- Isumaqartorujussuusarpoq, soorlu angerlarsimaffeqanngitsut ulluinnarni sumukarfissaaleqisaramik taavalu kissassimaarfissaqaratik. Maanilu nerisinnaallutillu, Frelsens Hærimukulasunut ilaasoq Nukannguaq Kleist oqarpoq.
Nukannguaq Kleist Danmarkimiit Nuummut ukiut marluk matuma siorna uteramili angerlarsimaffeqanngitsuuvoq. Taamanili assigiinngitsuni suliffeqartarpoq, angerlarsimaffeqarnanili.
Angerlarsimaffeqanngitsut aamma soorlu internetteriartorlutik facebookeriartorlutillu kialaarfimmukartarput, tassanili aamma uffarsinnaallutillu nerisinnaapput.
- Toqqissisimasaqaagut.Eqqissiivilluta isersimaarrattarpugut, aliikkusersortarpugut soorlu nallukattarluta, mobilerluta erinarsorlutalu, Nukannguaq Kleist oqarpoq.
Neriuuteqalersitserusuppugut
Nuummi Frelsens Hærimi ilagiit siuttuat, Nathanael Münch, angerlarsimaffeqanngitsorpassuarnik assigiinngitsunik tunuliaqutalinnik naapitaqartarpoq.
- Neriuuteqarnerulersitseqataarusuppugut. Inuit inuunerminni alloriaqqinnissaannut ikiuukkusuppugut, Nathanael Münch oqarpoq.
Nuummi Frelsens Hærimi kialaarfiup Williams Cafép ullut ammarsarfii naalakkersuisut aningaasaliinerisigut amerlipput, angerlarsimaffeqanngitsut tassani nerillutillu imerusuersarsinnaapput.
Tassa Nuummi Frelsens Hærimi kialaarfik Williams Café 2024-mi februaarip 27-ata apriilillu aallaqqaataata akornanni aamma oktobarip aallaqqaataata decembarip 31-atalu akornanni aamma ataasinngornikkut tallimanngornikkullu ammasalerpoq. Siornatigut marlunngorinnakkut samanngornerinnakkullu ammasarpoq.
Tamanna Frelsens Hærimukartartunut, ullormut 50-it 100-llu akornanniittuusartunut, isumaqartorujussuuvoq.
- Angerlarsimaffeqanngitsut ingammik silarlutsillugu kialaarfissaqarnissartik pingaartittarpaat. Angerlarsimaffeqanngitsut nerisassaasuakkajullutillu nerinissamik qulakkeerinninniapiloortarput. Taakkua sapaatit akunnerannut nerisaqarnerusinnaanissaat taamaalilluni qulakkeerneqarpoq, Nathanael Münch oqarpoq.
Naalagiarneq, qinuneq erinarsornerlu Williams Cafémi ulluinnarsiutaasunut aamma ilaapput, tamaanilu sulisunik aamma oqaloqateqartoqarsinnaalluni.
Nukannguaq Kleist Williams Cafép sapaatit akunnerannut ullut ammasarfiisa amerlineqarnerannik nuannaarutiginnittunut ilaavoq.
- Tusarluarnaqaaq. Ataasinngornikkut tallimanngornikkullu sumukarfissaaleqisut amerlanerusaramik. Taavalu Nunatta Atuagaateqarfianniinnerusarput, tassa iserfissaasuasaramik, taanna oqarpoq.
Iluaqutigisaqaara
Nukannguaq Kleist angerlarsimaffeqanngitsunut inissiani Kommuneqarfik Sermersooq naalakkersuisullu suleqatigiillutik misiliutitut pilersitaanni initaaqqammeraluarluni Frelsens Hærimut orniguttaannarniarpoq.
Ilagisartagaatami ilarpassui Frelsens Hærimiittarput, tamaaniittartullu ilarpaalui ilisarisimagamigit kialaarfik isumaqartittorujussuuaa.
- Assut iluaqutigisaqaara. Ornittarakkit ikiorlugit, nerisillugit taavalu arlaannik sammisaqaqatigalugillu, Nukannguaq Kleist oqarpoq.
Nunatsinni angerlarsimaffeqanngitsunik kingullermik 2022-mi kisitsinermi Ilisimatusarfik nalunaarsuisuuvoq, nunatsinnilu angerlarsimaffeqanngitsut 491-iusut Ilisimatusarfiup kisitsisaataani erserpoq. Taakkunannga 258-it Kommuneqarfik Sermersuumi angerlarsimaffeqanngitsuusuni 156-it Nuummiipput.
