Angerlarsimaffeqannginneq: Sofie aamma Hans Møller nalinginnaasumik angerlarsimaffeqarusukkaluarput

Nuummi inuppassuaqarpoq unnuami sumiissinnaanerminnik nalornissuteqartuartunik.

Sofie Møllerimut Hans Møllerimullu tamanna piviusuuvoq. 

- Ataatsimoorluta toqqisisimaffigisassatsinnik initaarnissarput qanittumiusinnaanissaa neriuutigigaluarpara, naak nalunngikkaluarlugu inuppassuusugut taama inissisimasut, Sofie Møller oqarpoq.

Sofie Hans Møllerilu naapikkamilli angerlarsimaffeqanngillat.

Nunatsinni angerlarsimaffeqanngitsunik kingullermik 2022-mi kisitsinermi Ilisimatusarfik nalunaarsuisuuvoq, nunatsinnilu angerlarsimaffeqanngitsut 491-iusut Ilisimatusarfiup kisitsisaataani erserpoq. Taakkunannga 258-it Kommuneqarfik Sermersuumi angerlarsimaffeqanngitsuusuni 156-it Nuummiipput.

Initaarnissamut utaqqisut allattorsimaffianniinnissaminnut atatillugu akiliisarput, sulili maannamut iluatsitsinatik. Taamaammat sumiiffissarsiortariaqartarput. 

- Massakkut ikinngutitsinni tukkuneruvugut, sapinngisamik ikiuukkusuttut akueralugit tukkuffigisarpagut, Sofie Møller oqarpoq.

Hans Møllerip ilaqutaani siusinnerusukkut unnuinerusarsimapput.

Aappariit marluullutik umiarsualivimmi, kilisaatit neqitsersuissuttarpaat. Ilaannili suliffigiinnarneq ajorlugu nassuerutigaat.

- Qaatittarpugut ilaanni neqitsersuigaangatta, kanngunaraluarpoq nassuerutigissallugu, kisianni ilaanni sumiiffissaqavinngikkaangatta allatut ajornaraangat neqitsersuivimmi sinittariaqartarpugut, Sofie Møller nassuiaavoq.

Sulinerat amerlanertigut unnuarsiornerusartoq pingaartumik Sofie Møllerimut artornartaqaaq. 

- Allatut ajornartumik neqitsersuinitsinni nuliara qasuersaartittariaqartarpar, Hans Møller nassuiaavoq. 

Frelsens Hær ikiutaavoq

Sofie Hans Møllerilu angerlarsimaffeqanngitsunik Frelsens Hærip ulluunerani oqqiffittut illuutigisaa 2017-ili ornittagarilerpaat, sulilu illumik atorluaasuupput. 

Oqqiffimmi sulisut ulluinnarni atukkatik pillugit oqaloqatigisinnaasaramikkit, taamaammat Frelsens Hær ornittakkamissut nuannaraat.

- Nuannersorujussuuvoq akuuffigiuminarlunilu, soorlu nereqatigiittarnerit, torersaaqatigiinnerit, sapaammi ulluinnarnilu naalagiaqatigiinnerit, sammisaqaqatigiinneq, errorsisinnaaneq, uffarsinnaaneq aamma qanoq inissisimanerluta nassuersinnaalluta, Sofie Møller unnersiorpoq.

LÆS OGSÅ FRELSENS HÆR 

Sofie Hans Møllerilu nerioqaat meeqqatik ilageqqilerumaarlugit, kisianni angerlarsimaffeqanngitsuulluni taamaliornissaq ajornakusooqaaq.

Sofie Møller katillugit arfineq pingasunik meeraqarpoq, taakkunannga pingasut Hans Møllerimit. Meeqqat arsaarinnissutaanikuupput. Maanna Sofie Mølleri naartoqqippoq, angerlarsimaffeqanngitsutulli inuunera suli allanngunngilaq, neriuutaarutinngillalli.

- Uanga neriuutiga annerpaaq nammineq angerlarsimaffittaarnissaq, angerlarsimaffik toqqissisimasoq ilaqutariittut isikkulik, pisattat meeqqanut angajoqqaanullu tulluartut, nereqatigiinneq, iffioqatigiinneq, sammisaqaqatigiinneq taavalu pisuttuaqatigiittarnissaq, Sofie Møller naggasiivoq.