Gerda Thuelu oqqiffissaqassanerlutik ullut tamaasa inuuniapiloortarsimasut initaartut

Kommuneqarfik Sermersooq naalakkersuisullu angerlarsimaffeqanngitsut 15-it inissiani misiliutini initaartitsisuupput.

Allattoq Sebastian Trosborg, Nauja Møller

marsip 18-at 2024 07:45

Nutserisoq Najâraq Egede

Inissianik suliniut Nuummi aallartinneqarpoq. Kommuneqarfik Sermersooq Naalakkersuisullu suleqatigiillutik angerlarsimaffeqanngitsunut inissianik misiliutitut pilersitsipput.

Angerlarsimaffeqanngitsorpaat taamaalillutik oqqiffissaqalerput.

- Pilluarnaqaaq maanga inissinneqarluni. Assut nuanneq, angerlarsimaffeqanngitsunut inissiani misiliutini initaartut ilaat Thue Olsen Heilmann oqarpoq.

NUUMMI ANGERLARSIMAFFEQANNGITSUT PILLUGIT ALLAASERISAT

Angerlarsimaffeqanngitsut Kalaallit Nunaanni qassiunerinik kisitsineq siulleq Ilisimatusarfiup 2022-mi suliaraa. Taassuma takutippaa Kalaallit Nunaanni kommunini tallimani angerlarsimaffeqanngitsut 491-iusut.

Kommuneqarfik Sermersuumi angerlarsimaffeqanngitsut 258-inut tagginneqarput, taakkunanngalu 156-it Nuummiipput.

Naalakkersuisut angerlarsimaffeqanngitsut pillugit periusissiamik 2023-mi saqqummiipput. Qulequtaraa: Kikkut tamarmik pitsaasumik inuuneqarsinnaatitaapput. Periusissiami angerlarsimaffeqanngitsut qassiunerinik ukioq allorlugu kisitsisarnissaq siunertat ilagaat.

Allisiguk

Taanna inooqatinilu Gerda Mikelsen initaaqqammerput. Inooqatigiit taakku Kommuneqarfik Sermersuup inunnik isumaginnittoqarfianit initaarsinnaanngornerannik qujasaasunit qanittukkut saaffigineqarput.

- Nuannaangaaratta kinaluunniit saaffigissallugu naluarput. Allaat qullilisuinnaavugut tuppallernermik. Kiisami angorusutarput angullugu. Perusutarput. Utaqqisarput, Gerda Mikaelsen oqarpoq.

Inooqatigiit taakku Nuummi ukiuni pingasuni angerlarsimaffeqanngitsooreerlutik initaarput.

NUUMMI INISSIANIK SULINIUT NAATSUMIK

Aappariit aappaqanngitsullu inissiani misiliutaasuni initaartut siulliit februaarip 29-ani nuupput.

Najugaqarfimmi tassani init marluuttarissat ataasiittarissallu aqqaneq-marluusut katillutik 15-inut inissaqartitsipput. Tassani najugalinnut tamanut igaffeqarpoq, isersimaartarfeqarpoq, uffarfeqarpoq, perusuersartarfeqarpoq errorsisarfeqarlunilu.

Tassani najugallit tamarmik immikkut ineqarnermut qaammammut 200 koruuneertarput.

Inissianik suliniut Housing First konceptimik, tassa innuttaasut namminneq initaarnissaannut ikiuinermik siunnersuinermillu periuseqarfiusumik, aallaaveqarpoq.

Allisiguk

Allanik suleqateqarneq pingaartoq

Inissiat misiliutitut suliat siulliit inunnit 15-init sivisussusiligaanngitsumik iserterfigineqarsimalerput.

Suliniut taanna naalakkersuisut angerlarsimaffeqanngitsut pillugit iliuuseriniagaannut ilaavoq. Suliniuteqarnermi suleriaaseq Housing First periuserineqarpoq. Suliniuteqartut neriuutigaat ininik taamaattunik amerlanernik pilersitsisoqarumaartoq.

- Aamma alloriarnerup tullianut qanoq inississasugut aamma tikkuussisussaavoq. Inunnik pisariaqartitsinermik aamma kinguneqarpoq taanna. Ilaa “Angerlarsimaffik salliutillugu” – tassa imaappoq sukkanerusumik ingerlaqqitsissinnaasagut massakkut siulliullugit pivagut. Taamaalisinnarluta misilittagaqarfigiligassagut qanoq ingerlassinnaanerlutigit, isumaginninnermut naalakkersuisoq Jess Svane (S) oqarpoq.

Inissianik suliniummik eqqarsaat Nuummi pinngormat, angerlarsimaffeqanngitsut unnuiffigisinnaasaat, ineqarfiugallartussat aamma ineeqqat containerini suliat, tassaapput periarfissatut isigineqartut.

Aamma atuarukNaalakkersuisoq: Inuuniarnikkut ikiorsiissutit najugaqarfiillu angerlarsimaffeqanngitsunut iluaqutaassapput

Periarfissalli taakkua naammanngillat. Taamaammat Kommuneqarfik Sermersooq naalakkersuisullu suleqatigiillutik inissianik misiliutaasunik suliniuteqarput.

- Una aamma suliniutip takutippaa uppernarsivaalu allanik suleqateqarneq qanoq pingaaruteqartiginersoq aamma isumaqarpunga taanna siunissami immikkut qitiuttariaqassagipput. Allanik suleqateqarsinnaaneq, Kommuneqarfik Sermersuup borgmesteria Avaaraq Olsen (IA) oqarpoq.

Kommuni suliniummi tassani ukiuni arlalinni suleqtaavoq, angerlarsimaffeqanngitsunullu inissiat misiliutaasut amerlineqarnissaat neriuutaavoq.

Siunissaannik aammaasoq

Nunatsinni angerlarsimaffeqanngitsunik kingullermik 2022-mi kisitsinermi Ilisimatusarfik nalunaarsuisuuvoq, nunatsinnilu angerlarsimaffeqanngitsut 491-iusut Ilisimatusarfiup kisitsisaataani erserpoq. Taakkunannga 258-it Kommuneqarfik Sermersuumi angerlarsimaffeqanngitsuusuni 156-it Nuummiipput.

Aamma atuarukIlisimatusartoq: Angerlarsimaffeqanngitsuuneq pillugu periusissiaq aallartilluaataavoq, suliassaqaqaarli

Inuppassuupput oqqiffissaqassanerlutik nalullugu ullut tamaasa inuuniapiloortut.

- Qanoq iliussalluta nalulertartarput ullut ilaanni. Pilluta, pilluta ilaanni iluatsitsisinnaasarpugut. Kisianni aatsaat ilaatigut unnungaatsiartumi pissarsisinnaasarluta, Gerda Mikaelsen oqarpoq.

Gerda Mikaelsen Thue Olsen Heilmannilu Ilulissaniit Maniitsumiillu Nuummut nuukkamilli angerlarsimaffeqanngitsuusimapput. Marluullutik suliffeqartuartarput, kisianni tassa maannamut inissarsinngitsoortasimallutik.

- Eqqissilluta isersimasinnaaneq amigaatiginikooqaarput ukiuni taakkunani ingerlasuni, Thue Olsen Heilmann oqarpoq.

Taakkuali tassa initaartunut ilaagamik kialaartumi siniffissaqalerput.

- Ammaavoq siunissatsinnik. Angiagassagut pimoorullugit anguniartussanngorpagut maanga inissinneqaratta. Assut qilanaarluta siumut alloriarnissarput – massakkut alloriarnissatsinnik tunineqarpugut – nuanneqaaq assut, Thue Olsen Heilmann oqarpoq.

Aappariit aappaqanngitsullu angerlarsimaffeqanngitsunut misileraataasumik najukkamut nuupput. Tassani najugalinnut tamanut perusuersartarfeqarpoq, uffarfeqarpoq, igaffeqarpoq, isersimaartarfeqarpoq errorsisarfeqarlunilu. Najugaqarfimmi tassani init marluuttarissat ataasiuttarissallu aqqaneq-marluusut katillutik 15-inut inissaqartitsipput.