Nutserinerlunneq siunnersuinerlunnerlu: Inuit tamakkuninnga peqqinnissaqarfimmi nalaataqartarput
Nunap immikkoortuini tamani napparsimasunut siunnersorti aalajangersimasoq taavalu nakorsap nakorsiallu akornanni nutserinerup ukkataanerunisssa.
Inuit peqqinnissaqarfimmi nalaattagaat pillugit nalunaarusiami innersuussutit ilaat taamaapput.
Peqqissutsimut naalakkersuisup, Martha Abelsen-ip, misissuititsinerup inerneri sisamanngornermi saqqummiuppai. Tassani misissuititsineq atuisut peqqinnissaqarfimminnermi misigisaannik pitsanngorsaanissamut alloriarneq siulliusoq pingaartillugu oqaatigaa.
- Innuttaasut nunatsinni neqerooruteqarsinnaasatsinnut iliuuserisinnaasatsinnullu isumaat tusassallugu Naalakkrsuisuni pingaartipparput. Taamaammat taakkua ilisimasaat ineriartortitsinermi ilisimassallugit pingaartorujussuuvoq, Martha Abelsen oqarpoq.
Napparsimasumut siunnersortit amerlanerit
Peqqinnisaqarfimmi napparsimasunut amerlanerusunik siunnersorteqalissasoq, nalunaarusiami innersuussutinut ilaavoq.
Taamaaliorneq nakorsianut taakkualu qanigisaannut pqqinnissaqarfiliarneranni siornersuinermut pitsanngorsaataassaaq.
Napparsimasumut siunnersorti nunatsinni maanna ataasiinnaavoq, taannalu Nuummiittuusoq, Martha Abelsen ilisimatitsivoq.
AAMMA ATUARUK Peqqinnissaq pillugu ataatsimiititaliarsuup sulisussarsiornissaq ilaatigut misissussagaa
Siunnersortinilli amerlanerusunik Nuup avataani atorfinititsitinnani, nunap immikkoortuini tamani atorfinitsitsineq qanoq akeqassanersoq misissorneqaqqaartariaqarpoq.
Pitsanngorsaalertorniassagatta uanngaa nalunaarusiortitsivugut.
Misissuinermi Upernavimmi, Sisimiuni Qaqortumilu innuttaasut 23-t apeqqarissaarfigineqarput, atuisullu peqqinnissaqarfimmi nalaattagaat tallimat qitiusut saqqummersillugit. Assersuutigalugu sulisunik qallunaatuinnaq oqaasilinniit sullinneqartarneq unammillernartuuvoq.
Aamma oqalutsissaaleqineq ilaasa nalaattarpaat, allallu nalunaarusiami allasimaneratut oqalutsit "oqaasilerinermut naammattumik piginnaasaqanngitsuusut,isumaqarlutik".
Taamaammat tamatumunnga nukinnik atuinerunissaq pisariaqartoq, innersuussutaavoq.
Ataatsimiititaliarsuarmut iluaqutsiissaaq
Misissuinerup inerneri Peqqinnisaq pillugu ataatsimiititaliarsuarmut iluaqusiissaq.
Peqqinnissaqarfimmut aaqqissutissaasinnaasunik innersuusiornissaq taavalu sulisussarsiornerup sulisullu sulisoriinnarnissaannut qanoq pitsanngorsaasoqarsinnanersoq misissoqqullugit ataatsimiitsitaliarsuaq pilersinneqarpoq.
- Peqqinnissaq pillugu ataatsimiitsitaliaq ukiuni marlussunni sulisussatut pilersinneqarpoq, ataatsimiitisitaliarsuullu misissuinermi paasisat ilisimasarilissagai pingaaruteqarpoq, Martha Abelsen oqarpoq.
AAMMA ATUARUK Peqqinnissaq pillugu ataatsimiititaliaq taperserneqangaatsiartoq
Atuisunilli paasiniaanermit innersuussutit Peqqinnissaq pilugu Ataatsimiititaliarsuup suliani qaquguunersoq naammassippagu aatsaat atuutilersinneqassanngitsut, Martha Abelsenip erseqqissarpaa.
- Misissuititsivugut piaartumik pitsanngorsaajumalluta, misissuinerulli inerneri pingaaruteqaqimmata ataatsimiitsitaliami suliaminnut atussavai, naalakkersuisoq oqarpoq.
Kalaallit Nunaanni Innuttaasut Peqqissusiannik Ilisimatusarfik misissuisitsisuuvoq.