Peqqinnissaq pillugu ataatsimiititaliarsuup sulisussarsiornissaq ilaatigut misissussagaa
Peqqinnissaqarfik ilungersunartorsiorfiuvoq, taamaammat aningaasat peqqinnissamut atorluarneqarnerunissaanut misissuilluaqqissaartoqassaaq.
Naalakkersuisut siunertamut tassunga atatillugu piqqinnissaq pillugu ataatsimiititaliarsuassap suliarisassaasa allassimaffiat akueraat.
Suliassanut nassuiaammi ataatsimiititaliarsuup peqqinnissaqarfimmi sulisussanik qulakkeerinissamut innersuussuteqarnissaa aamma Danmarkimik, Islandimik nunanillu allanik suleqateqarnissamut periarfissanik misissuinissaa ilaatigut allassimapput.
Ataatsimiititaliarsuarmut 6 millionit koruunit
- Nunatsinni peqqinnissakkut pilersaarusiorneq aatsaat taama pisaqariaqartigaaq ataatsimiititaliarsuullu pilersinneqarnissaa sulilernissaalu assut qilanaareqaara, peqqinnissamut naalakkersuisoq, Martha Abelsen oqarpoq.
Peqqinnissaq pillugu ataatsimiititaliarsuaq Suleqatigiissitsisut Inatsisartuni tapernerseqangaatsiarluni siorna ukiakkut ataatsimiinnermi siunnersuuteqarneratigut pilersinneqarpoq.
Peqqinnissaq pillugu ataatsimiititaliarsuarmut 6 millionit koruunit 2020-mut aningaasanut inatsimmi immikkoortinneqarput.
Suliassat allattorsimaffianni ataatsimiititaliarsuup innersuussutissaminik qaqugu tunniussinissaanik allassimasoqanngilaq. Innersuussutilli peqqinnissaq pillugu aaqqissuusseqqinnissamut tunngaviliissapput.
2020-mut aningaasanut inatsit naapertorlugu 2 millionit koruunit siulliit ukioq mannamut immikkoortinneqarput. Aappaagumut 3 millionit koruunit millionillu sinneri 2022-mi atorneqartussatut naatsorsuutigineqarput.
Sulisut kattuffii ataatsimiititaliami ilaasortaqartut
Ataatsimiititaliarsuaq qulingiluanik ilaasortaqassaaq, taakkunannga siullit pingasut Naalakkersuisunit toqqarneqareerput.
Eqqartuussissuserisoq, Ulrik Blidorf siulittaasunngorpoq, taassuma tullersortigissavaa Syddansk Universitetimeersoq, peqqissutsimik sulinermi aningaasaqarnermi peqqissutsimilu politikkeqarnermi professori, Keld Møller.
Siulittaasup tulliata tullianut peqqissaasoq Tine Aagaard, Arktiske Studierimi Ph.d. Issittumi Ilisimatusarnermi Peqqissutsikkut Inuiaqatigiinnilu pissutsit pillugit ilinniarsimasoq, toqqarneqarpoq.
Ilaasortat sinnerini kommuninit sinniisuutitaq peqatigiiffinniillu ukunannga sinniisut ilaapput: Neriuffik, Nunatsinni Nakorsat Peqatigiiffiat, PPJ, SIK, Nunatsinnilu Kigutit Nakorsaasa Peqatigiiffiat.
