Nunavumeersut nunatsinni isumassarsiorput

 - Nuuk qanoq siuarsimatiginersoq takullugu pissanganarpoq, pingaartumik attaveqarneq taamatullu ineriartorneq.  

Juanie Pudluk paasisassarsiortut ilaat Iqalunneersoq, qanoq misigisimanersoq KNR-imiit aperineqarami taama akivoq.

Taanna Nunvumi ineqarnermut aqutsisoqarfimmi pisortaavoq, aqutsisut allat qulingiluat aqutsinermilu pisortat Nunavumeersut peqatigalugit, Nuummi sapaatip akunnerani paasisassarsiorluni angalasimavoq.

Naggueqatigiit inuit Nunavumi atorfinni sulilernissaannut ilinniartinneqartarfiat, ukiuni kingullerni pingasuni siuttuusut allat peqatigalugit (IECD) Inuit Executive Career Development-programmimik taaneqartartoq suleqataaffigisimavaa.

Misigisaq nuannersoq

Nuummut angalanermi isumassarsiornissaq siunertaasimavoq, ilanngullugu Nunavut Kalaallit Nunaallu qaninnerusumik atassuteqalernissaat siunertanut ilaavoq.

- Angalaniaraanni sumiiffinnilu allani takusassarsiorluni, nunat allat Nunavumut naleqqiullugit qanoq aqunneqarsinnaanersut eqqumaffigineqarnerulertarpoq, juanie Pudluk oqaluttuarpoq.

Eqimattat Nuummi sapaatip akunnerata ingerlanerani aaliangersimaqqissaartumik suliassaqarsimapput, tassanilu politikerit arlallit Namminersorlutillu Oqartussani politikerit pisortallu ataatsimeeqatigisimavaat. Tamanna misigisaq nuannersuuvoq.

-Kalaallit Nunaanni aqutsisunik oqaloqateqarpugut, isumaqarpungalu siunissamut isigisuusut sulilluartuullutillu. Qanoq ingerlatsisoqarnera Iluarisimaarpara, Juanie Pudluk oqarpoq.

Nunavumi inuit qaffasissumik atorfeqalernissaannut, oqaatsitigut piginnaasanik pisortatigoortumillu pisinnaasat pisortatigoortuunngitsut aporfiusarput. Tamanna eqimattanit Nuummi tikeraartunit isumassarsiorluarfigineqarpoq.

Kalaallit Nunaanni Ilisimatusarfimmik ilinniarfigineqarsinnaasumik peqarpoq, akerlianillu Iqaluit ilisimatusarfeqanngillat.

CV pingaaruteqarpoq

Taamaattumik Nunavumi aamma Athasca Universitetimi naalakkersuisut suleqatigiinnerat IECD-mik taallugu suleqatigiissutigaat, taannalu Canadap qiterpiaani Albertamiippoq.

- Ilisimatusarfiup programmia universitetimit aqunneqarpoq, tassani ilinniarsimanermut uppernarsaat pissarsiarisarisinnaavarput. Canadap kujasinnerusortaani naggueqatigiillu Inuit ilisimasaasa akornganni, naggueqatigiinnut attuumassuteqartut allallu ataqatigiilersippaat, taanna oqarpoq.

- Nunavumi pitsaasumik aqutsinissamut tamaasa atorsinnaavagut, Juanie oqarpoq. 

Pikkorissaqatigisaata Sandy Kownakip tamanna isumaqatigaa. Nunavummi ilaqutariinnermut sullissivimmi naalakkersuisoqarfimmi, naalakkersuisumut tullersortaavoq, Kalaallit Nunaannilu ilisimatusarfiup nunatsinnut siurarsaanera maluginiarsimavaa.

Nunavummi ilisimatusarfeqanngilagut. Nunavut Kujataa angalaffigisariaqarparput aamma motorvejit atorlugit, inuillu assigiinngitsorpassuit naapillugit angalasariaqarpugut. Kalaallit Nunanni paasisassarsiornerput iluatsilluarmiit, paasisakka pissarsiakkalu Nunavumi atorluarumaarpakka, taanna oqarpoq.

Taassuma aamma erseqqissarpaa, Nunavummi innuttaasut atorfinnik qaffasissumik atorfeqarsinnaannginnerat, piginnaasakinnermut attuumassuteqanngitsoq, kisiannili pappiaqqat ilinniarsimanermut uppernarsaatit pissarsiarinissaat pingaaruteqartoq.

- Ilisimasavut tamaasa naggueqatigiitut pigereerparvut, maannali CV-mit uppernarsaqqaartariaqartarput, taanna naqissusiivoq.