Nunatta imartaani aatsitassarsiorsinnaajunnaarallartitsineq WWF-ip nuannaarutigigaa
- Soorunalimi nuannaarutigeqalugulu qujamasuutigeqaarput.
Pinngortitaq pillugu nunarsuaq tamakkerlugu suliniaqatigiiffiup nunatsinni WWF-ip pisortaa, Malene Lynge, naalakkersuisut Danmarkillu naalakkersuisuisa Naalagaaffiit Peqatigiit immami itisuumi aatsitassarsiorsinnaajunnaarallartitsinissamik siunnersuutaannut tapersersuinerat pillugu taama oqarpoq.
WWF-imi immami itisuumi aatsitassarsiornerup kingunerisinnaasaanik massakkorpiaq ilisimasakippallaarneq tunngavilersuutigalugu immami itisuumi aatsitassarsiorsinnaajunnaarallartitsisoqarnissaa qaammaterpaalunni nilliaatigaa.
- Anguniagarput qanilliallapparput. Taamaammat unitsitsigallarnissamik siunnersuummut tapersersuinerat nuannaarutigeqaarput, Malene Lynge oqarpoq.
Tassa nunatta imartaani itisuumi ukiuni tulliuttuni marlunni aatsitassarsiorsinnaajunnaarallartoqarpoq.
Naalagaaffiit Peqatigiit tamannarpiaq pillugu nunarsuaq tamakkerlugu atuuttussanik unitsitsigallarnermi malittarisassasiliussapput, aamma immami itisuumi aatsitassarsiornerup kingunerisinnaasai pillugit ilisimasanik naammaginartunik katersissapput.
Taakkualu iluaqutaassaqisut, Malene Lynge isumaqarpoq.
- Ilisimasanik naammaginartunik aalajangiisartut peqalernissaat, taanna soorunalimi pingaarnertut neriuutigaarput. Aamma arlaatigut uagut tassuunartaatigut suleqataasinnaagutta tunniussaqarsinnaaguttaluunniit, taanna aamma sulissutigissavarput.
Nunatta imaani itisuumi aatsitassarsiortoqalerpat, uumasut immallu naasuisa innarlerneqarsinnaanerat aarleqqutigigini, nunatsinni WWF-ip pisortaata oqaatigisareerpaa. Nunatsinnilu aalisarnerup aamma innarlerneqarsinnaanera.
Taamaammat immami itisuumi aatsitassarsiorsinnaajunnaarallartitsineq utaqqisaannaagallartuunani atuutilivikkumaartoq, taassuma aamma neriuutigaa.
- Neriuutigaarput ilisimasat pigineqalertussat takutikkumaaraat, imartap naqqani aatsitassarsiorneq imminut akilersinnaanngitsoq, taanna oqarpoq.
Norgemut oqariartuutaasoq
Imartaminni itisuumi aatsitassarsiortoqarsinnaaneranik, Norgep inatsisartuisa akuersissuteqarneranniit qaammatialuit qaangiuttut, Naalakkersuisut Danmarkillu naalakkersuisui mianersuussiniarluni unillatsiarnissamik siunnersuut tapersersorlugu nalunaarput.
Norgep taama aalajangernera avatangiisinik illersuiniaqatigiiffinnit amerlasuunit nilliaatigineqarpoq. Nunatsinnilu WWF tamatuminnga nilliaatiginnittunut ilaavoq.
Avatangiisinilli illersuiniaqatigiiffik alla, tassa Danmarkimi Greenpace immami itisuumi aatsitassarsiortoqarsinnaaneranut aamma akerliusoq nilliaatiginnittunut aamma ilaavoq. Danmarkip nunattalu mianersuussiniarluni unillatsiarnissamik siunnersuummut tapersersuinerat, tassannga aamma nuannaarutigineqarpoq.
Tamannami saniliminnut Norgemut oqariartuutaalluinnartoq, Danmarkimi Greenpaecep suliniutini aqutsisua Sussi Lillelund isumaqarpoq.
- Naalagaaffeqatigiit tapersersuinerat sanilitsinnut norskinut imartaminni itisuumi aatsitassarsiorsinnaanissaq ilisimatusartut taamaalioqqusinnginnerat qulaatiinnarlugu akuersissuteqaqqammertuusunut oqariartuutaalluinnartoq, taanna tusagassiorfinnut nalunaarumminni allappoq.
- Immap itisoortaa nunarsuarmi innarlerneqanngitsortat kingullersaannut ilaavoq. Ilisimatusartut innersuussutaat inuiaqatigiillu qulaatiinnarlugit qalluiinnapajunneq pitsaaquteqannginneranik nunarsuup avannarpasissuaneersut paasinninnissaat inissaminiippoq, taanna aamma allappoq.
Nunatta imartaani itisuumi aatsitassarsiornissamut suli misissuisoqarsinnaasoq, mianersuussiniarlunili unillatsiarnermi aatsitassarsiorsinnaajunnaarallartitsisoqartoq, naalakkersuisut nalunaarput.
Namminersorlutik Oqartussat aatsitassarsiornissamut misissuinissamik aatsitassarsiortitseqatigiiffiit ilaannit qinnuteqarfigineqarsimalereerpoq.
