Naalakkersuisut immami itisuumi aatsitassarsiornermik unitsitsigallarnissamut tapersersuisut

Immami itisuumi aatsitassarsiorfimmik ingerlatsinermut tunngatillugu mianersuussiniarluni unillatsiarnissaq Naalagaaffiit Peqatigiit siunnersuutigaat, naalakkersuisullu tamanna akueraat.

Naalakkersuisut pingasunngornermi taama nalunaarput.

- Nunatut immami pisuussutit inuussutigaagut, taakkulu immami avatangiisit minguitsuunissaat pinngitsoorneqarsinnaanngilaq. Taamaattumik mianersuussiniarluni unillatsiarnissaq tapersersorparput, aatsitassanut naalakkersuisoq Naaja H. Nathanielsen oqarpoq.

Immami itisuumi aatsitassarsiorfimmik ingerlatsineq tassaavoq, immap itisuup naqqaniit aatsitassanik piiaanermik amerlanertigullu assaanermik suliaqarneq.

Norgep immap naqqani aatsitassarsiorsinnaanissaq ukioq manna januaarimi ammaaffigimmagu tamanna avatangiisinut illersuiniaqatigiinnit uissuummissutigineqarlunilu ernumalersitsivoq.

Immap naqqa pineqartoq nunatta imartaanut qanittumiippoq.

Nunatsinnili immap naqqani aatsitassarsiorsinnaanissaq pillugu allatut isumaqartoqarpoq.

Mianersuussiniarluni unillatsiarnerup kingunerisaanik immami itisuumi aatsitassarsiorfimmik ingerlatsinermi aatsitassarsiorluni misissuinissamut akuersissutit suli akuerisaapput, kisianni piiaanissaq unillatsiarnerup nalaani akuerineqarsinnaanani.

Naalakkersuisut immami itisuumi aatsitassarsiorfimmik ingerlatsineq pillugu nalunaarusiat marluk utaqqimaarpaat.

Inerteqquteqarneq pillugu aalajangiisoqarpat, aatsitassanut inatsit malillugu tamanna Inatsisartunut saqqummiunneqartussaassaaq.