Aki-Matilda Høegh-Dam: Politikkikkut oqallinnerit innuttaasut nutsereqqusineratulli nutserneqarlik
![](/sites/default/files/styles/image_934x467/public/article_images/aki-mathilda_hoeegh-dam_0.jpg?itok=amLpTOUY)
Inatsisartuni piumasaqartoqarneratigut nutserinerit toqqaannartumillu oqaluttaanerit eqqunneqartariaqarput. Folketingimut ilaasortaq Siumumeersoq, Aki-Matilda Høegh-Dam danskit tusagassiorfiatigut Altinget Arktisikkut oqallissaarummi nutaami oqarpoq.
Piumasaqartoqarneratigut periuseq tassa imaappoq Inatsiartut politikkikkut oqallinnerit tusagassiortut, politikerit imaluunniit innuttaasut aatsaat piumasaqarneratigut nutserneqarsinnaanissaannik neqerooruteqartarneq.
- Aningaasartuutaasussat qularnanngitsumik annikillisinnaapput, tamatumalu saniatigut tamat, matumani kalaallisut danskisulluunniit oqaaseqartut ilanngullugit peqataanissaannik qulakkeerinissamut periarfissaqarluta – tamannalu innuttaasunut oqaatsinik allanik tunuliaqutalinnut aamma iluaqutaassalluni, taanna oqallisaarummi allappoq.
Inatsisartuni oqalutseqartarnerup oqaluuserisassaniileqqinnerata kingorna taama siunnersuuteqarpoq. Naleqqap siulittaasua, Pele Broberg Inatsisartuni danskisut oqaluttoqartannginnissaa imaluunniit danskisuumut nutserisoqartannginnissaa pillugu oqallinnermik aalajangiiffigisassatut siunnersuutitalimmik ammaaqqippoq.
- Kikkulluunniimmi naammaginnilersinniartuartillugit maannamut angoriikkavut allanngorfeqarnavianngillat. Tassa kalaaliussuserput annaassavarput, taanna KNR-imut aggustimi oqarpoq, nangillunilu:
- Tassa tunngaviit pingaarluinnarput. Taakkualu inuiaqatigiit ukkatarinerusariaqaraluarpaat.
Pele Brobergip aalajangiiffigisassatut siunnersuutaa Siumumit Atassummiillu ilassilluarneqarpoq – Inatsisartulli siulittaasoqarfianit ukioq manna ukiakkut ataatsimiinnermi, septembarip 20-ani aallartittussami oqaluuserisassaniilernissaa itigartitsissutigineqarluni.
Danskisuumulli nutserineqarit tamarmik unitsivinneqanngikkaluarlutik innuttaasunut kalaallisut danskisullu oqaaseqartunit piumasaqartoqarneratigut nutserisoqartarnissaa tamat oqartussaaqataanerannut aaqqiissutissaanerusoq, Aki-Matilda Høegh-Dam isumaqarpoq.
Nammineq nunagisami takornartaalersinneqarneq
Aki-Matilda Høegh-Damillu ullumikkutut itsillugu kalaallisut oqaatsivut nammineq nunagisami pingaarnerutinneqanngitsut, Aki-Matilda Høegh-Dam isumaqarpoq.
Politikerimmi oqarnera naapertorlugu kalaallisuinnaq oqaaseqartut marloqiusamik oqaaseqarnissamut – tassa kalaallisut danskisullu oqaaseqarnissamut pinngitsaalineqarput.
Kisianni nunatsinni kalaallisut ilinniarnissamut pinngitsaalineqarani ilinniartoqarsinnaavoq, sulisoqarsinnaavoq, inuusoqarsinnaallunilu. Tamanna nunasiaataanermit oqaluttuarisaanermeersuusoq, taanna allappoq.
- Kalaallisut ullumikkut pingaarnerutinneqarneq ajorpoq, allaat pisortat suliffeqarfiini, naak nunatsinni innuttaasut amerlanerussuteqartut suliffeqarfinnillu aningaasalersuisut kalaallisut oqaaseqartuugaluartut, taanna allappoq.
Aki-Matilda Høegh-Dam kalaallisut Folketingimi oqallinnernut malinnaasinnaalerniassammata toqqaannartumik nutserisarnerup eqqunneqarnissaanut aamma sulissuteqarsimavoq.
Tamanna nunani avannarlernit qinikkat kalaallisut savalimmiormiusullu ataatsimiittarfimmit oqaaseqarsinnaalernerannik nammineerlutillu kingorna danskisuumut nutserisinnaalernerannik kinguneqarpoq. Tamatuma saniatigut Folketingip nittartagaata ilaa kalaallisuumut savalimmiormiusuumullu nutserneqarpoq.