Akunnittarfik Air Greenlandilu ingerlatseqatigiiffimmi nutaami suleqatigiilersut

Ingerlatseqatigiiffik World of Greenland nunatta avannaani angallassisartutut unnuisarfiuteqartutullu ullumikkut ilisimasarput aappaagu maajimi allanngussaaq.

Ingerlatseqatigiiffiup unnuinissamut periarfissat soorlu akunnittarfiit sumiiffimmilu illuaqqat taamaallaat ukkatarilissagai, World of Greenlandimik piginnittoq Air Greenland tusagassiuutinut nalunaarummi allappoq.

Ukkatarineqalertussat nutaat ilutigalugit World of Greenlandip Hotel Arctic ingerlatseqatigiiffimmi nutaami Arctic Hospitality Cooperationimi suleqatigilissavaa. Suliniut nutaaq pissutigalugu Air Greenland World of Greenland aqqutigalugu angallassinernik angalanernillu aaqqissuussisarunnaassaaq.

Ilulissani takornarianik angallassinerup Air Greenland pisariaqartikkunnaaraa, Air Greenlandip pisortaata, Jacob Nitterip tusagassiuutinut nalunaarummi itisilerpaa.

- Angallassinernit tunuarternitsinnut piffissaq eqqoqqissaarpoq. Takornariaqarneq angallassinertigullu unammillerneq sukkaqisumik ineriartorpoq, tamannalu pitsaalluinnartutut isigaarput.

Akisussaaffeqarpugut, kivitsissaagut

World of Greenland ingerlatseqatigiiffimmi nutaami AGH-mi nunatta avannaani unnuinissamut periarfissat ukkatarissavai. Nunat tamalaat akornanni timmisartuussinerup Ilulissat mittarfiani 2026-mi ammarpat tikinneqarsinnaassuseq eqaannerulissaaq.

- Ullumikkut inissatigut ima tatineqareersimavugut silarlukkaangat inerujussuarni siniffilersuisariaqartarluta. Tamanna takornariarfissamik piorsaanermut iluaqutaanngilaq. Tikikkuminarnerulernernissaanut maannakkut iliuuseqartariaqarpugut, suleqatigiiulluta, takornariarfissamik piorsaataasinnaasumik, Jacob Nitter Sørensen oqarpoq.

Taassuma Air Greenland pisortat ingerlatseqatigiiffiatut nunatta avannaani takornariaqarnermik ineriartortitsinissamut akisussaaqataanermik tigusisariaqartoq erseqqissaatigaa.

Taamalu ineriartortitsisoqassappat unnuiffissaqarnerunissaa pisariaqartoq Air Greenlandip pisortaata tusagassiuutinut nalunaarummi oqaatigaa.

Tamarmik naammattunik suliassaqartut

Mittarfimmut nutaamut atatillugu ineriartortitsinissamut unnuiffissaqarnerulernissaa pingaaruteqartoq, Jacob Nitterip erseqqissaatigaa.

Inissaqartitsinerunikkut aamma ineriartortoqassaaq.

- Unammillernerup ilungersunarsinissaanut maannakkut piareersimanissarput pingaaruteqarpoq. Ataatsimoorluta soqutigisaqarpugut, tassalu nunap immikkoortuani angallannermik ingerlatsisut suleqatigalugit Kalaallit Nunaata siuarsarnissaanik, pisortaq oqarpoq.

Taassumalu tamarmik naammattunik suliassaqarlutik oqaatigaa.