Ilulissat Mittarfia: Ammaanissaq ukiumik ataatsimik kinguartinneqaqqittoq

Ilulissani inuussutissarsiornermik suliaqartut innuttaasullu nunatsinnit nunanut allanut aappaagumit toqqaannartumik angalasalernissamut qilanaarsimagunik naammagittarniaqqittariaqarput.

Mittarfittaassamimi timmisartup ingerlaarfissaa siusinnerpaamik 2026-mi ukiakkut naammassissaaq.

Tamanna Kalaallit Airports Internationalip 2023-mi ukiumoortumik nalunaarusiaani allassimavoq.

- Ilulissani mittarfissap inaarsarneqarnissaani piffissaliussat pillugit Munck gruppen ukiup naatsorsuuseriffiussup qaangiutereernerani isumaqatigiissusiorfigineqarpoq. 2026-mi ukiakkut tunniussinissaq maanna naatsorsuutigineqartoq, nalunaarusiami allassimavoq.

Ingerlatsiviup 2026-mi ukiup sisamararterutaani ammaasoqassasoq paasissutissiissutigaa. Mittarfittaassap aammarneqarnissaa kingullermik 2023-mi decembarimit 2025-p aallartinneranut kinguartinneqarpoq. Mannalu ukiumik ataatsimik kinguartinneqaqqippoq.

Kinguartitsineq sulisussaaleqinermik ilaatigut pissuteqartoq

Kinguartitsinermut 'sanaartugassanik suliassinneqartartup suliassai pilersaarutaasumit annertunerusutut paasineqartut saniatigut sulisussanik, maskiinanik kingoraartissanillu amigaateqarneq' pissutaasut, Kalaallit Airports International tusagassiuutinut nalunaarummi allappoq.

- Unneqqarillungalu oqassaanga Ilulissani mittarfiup kingusinnerpaamik 2025-mi ammarneqarnissaa neriuutigigaluarpara. Tamatumali saniatigut Munck Gruppenip sanaartormi unammillernartitai nassuerutigissavakka – piviusorsiortumilli, sanaartugassap naammassineqarnissaanut piffissamut pilersaarummik iluarsaassamik isumaqatigiissuteqarnerput nuannaarutigaara, ingerlatsivimmi pisortaaneq, Jens Lauridsen oqarpoq, nangillunilu:

- Nunatsinni innuttaasut suliffeqarfiillu amerlasuut mittarfiup ammarneqarnissaanut qilanaarlutillu naatsorsuuteqangaatsiarsimasut ilisimavarput.

PIlersaarusiornerup aallartinnerani Ilulissani Nuummilu mittarfiup ataatsikkut ammarneqarnissaa pilersaarutaaqqaaraluarpoq.

Nuummi mittarfiup aallariartortarfia nutaaq aasartinnagu ammassaaq, timmisartullu mittarfia nutaaq ukioq manna novembarimi ammarneqarnissaa naatsorsuutigineqarpoq.