Mittarfiup ammarnissaata ullua aalajangerneqartoq

Nuummi nunanit tamalaaneersunut timmisartoqarfik ukioq ataaseqqissaaq qaangiuppat ammassasoq aalajangerneqarpoq.

Kalaallit Airports tusagassiuutinut nalunaarummi paasissutissiivoq, mittarfittaassarlu Kalaallit Airportsip pisortaanerata, Jens Lauridsenip nuannaarutigaa.

- Oqaluttuarisaanermi anguniakkat ilagilissavaat, tamannalu nuannaarutigaarput. Tamaanga killissinnaagatta, maannakkut timmisartoqarfik qaqugu naammassissanersoq ulluliilluni nalunaarutigisinnaalerlutigu, tulluusimaarutigisorujussuuarput, taanna tusagassiuutinut nalunaarummi oqarpoq.

Mittarfik 2023-mi ammartussaagaluarpoq, tamannali kinguaattoorpoq.

Immikkoortukkaarlugu ammarneqassasoq

Naak ammarnissaa aappaagumut novembarip 28-anut inissinneqaraluartoq aallariartortarfittaaq 2024-mi maajimi atuleriissasoq, Kalaallit Airports paasissutissiivoq. Mittarfiup ilaata ammarneqarnera 'annikitsumik nalliuttorsiornermik' malunnartinneqarumaarpoq.

Kisianni annerusumik nalliuttorsiutiginissaa aatsaat novembarip 28-ani tassa mittarfiup takisuup ammarneqarnerani pissaaq.

Tamannalu Jens Lauridsenip qilanaaraa.

- Nunanit tamalaaneersunut timmisartoqarfissaq Kalaallit Nunaata nukittunerulerluni ineriartorneranut allanngortitsisuussasoq qularinngilluinnarparput. Taanna Nuummuinnaq iluaqutaasussaanngilaq, kisianni nunarput tamakkerlugu iluaqutaasussaalluni. Soorunami tamanna pisussaq annertoorujussuuvoq, pissusissamisoortumik nalliuttorsiutigissallutigu, taanna oqarpoq.

Ammaanerup aaqqissuunneqarnissaa ulluata qanillinerani nalunaarutigineqarumaarpoq.