Norgemi Stortingip immami itisuumi aatsitassarsiortoqarsinnaalernissaanik siunnersuut akuersissutigigaa
![](/sites/default/files/styles/image_934x467/public/2024-01/13084773f-6048x4032ma.jpg?itok=OkuvqPFQ)
Aatsitassanik immami itisuumi ujaasillunilu piiasoqarsinnaalernissaa, Norgemi inatsisartuni Stortingemi ilaasortat amerlanerussuteqartut marlunngornermi ualikkut akuersissutigaat.
Aatsitassanik piiaaneq Issittup imartaata naqqani Norgep Kalaallit Nunnaatalu akornanni pissaaq.
Norgemi nutaarsiassaqartitsivik NTB taama allappoq.
Norgemi naalakkersuisut oqarnerat naapertorlugu aatsitassat Norgip imartaata naqqaniittut soqutigineqaleraluttuinnarput.
Norgep aatsitassanik imminut pilersorsinnaanissaa pingaaruteqartorujussuusoq, Norgemi naalakkersuisut isumaqarput, ingammik nunarsuarmi ilungersunartorsiortoqarnerata nalaani.
Immap itisuup naqqani aatsitassarsiorneq uumasunut immallu naqqaniittunut naasunut ajortorujussuarmik kinguneqarsinnaasoq, isornartorsiuisut oqarput.
Isornartorsiuisunut ilaavoq avatangiisinut illersuiniaqatigiiffik Greenpeace Danmark.
- Immami pinngortitap ataqatigiinnera ajunngilluinnartoq Norgep naalagaaffianit pilliutiginiarneqarniarmat alianartorujussuuvoq. Aatsitassanik piaaffigineqartussamiipput Issittumi uumasut naasullu, taakkua qularnaatsumik tassani uumasinnaapput.
- Aatsitassanik piiaaniarup aallartinnissaa sioqqullugu pinngortitamik aserorterinerup unitsinneqarnissaanut suna tamaat iliuuseqarniarpugut, Amanda Louise Helle Greenpeacemi ilungersuuteqartut ilaat oqarpoq.
Norgemi naalakkersuisunut illuatungiliuttut partiivi siunnersuummut itigartitsipput.
Partiit siunnersuut pillugu oqaaseqarnerminni allapput, aatsitassanik piiaafissami avatangiisinut tunngasortaasaa 99 procentiat norgemiut naalagaffiata ilisimanngikkaa.