Nunatta Europamiut tikilluaqqugai

EU-p issittoq pillugu sunniuteqarnerorusulluni nunatsinnut 1,7 milliardit koruunit tunniuppai, nunarpullu tikilluaqqusivoq.
- Issittormi pillugu EU-p sunniuteqarnerulernissaanut Kalaallit Nunaat aqqutaavoq, taamaammat EU-p Kalaallit Nunaat nunatut kammaginiassallugu soqutigisaraa, Rasmus Leander oqarpoq.
Allattoq Mads Malik Fuglsang Holm , Marie Kûitse Kristensen
oktobarip 07-at 2021 08:08

EU-p 225 millionit eurot Kalaallit Nunaani atugassatut aningaasaliissutiginiarlugit ippassaq aalajangerpoq.

Taamannak isumaqatigiissuteqarnikkut ukiuni arlalinni isumaqatigiinniarnerit naammassipput. Isumaqatigiinniarnerilli oqitsuinnaasimanngillat, EU-mmi nunatsinni ilinniartitaanermut aningaasaliissutini ikilissagai aqqutaani ernummataasarsimavoq, ilaatigut Tuluit Nunaat EU-miit ilaasortaajunnaarnera aammalu Covid-19-ip ajornartorsiutaanera peqqutaalluni, EU- aningaasaqarniarnera ilungersunarsimammat.

AAMMA ATUARUK Nunatsinnut EU-mit tapiissutit millionilikkaanik ikilisinneqarataannaasut

EU-li ikililerinngilaq, tamannalu nunatta iluanaarutigaa. Inuiaqatigiilerinermi

Ilisimatusarfimmi ilisimatooq, EU-mik immikkut sammisaqartoq Rasmus Leander, taama oqaluttuarpoq:

- Tapiissutit annermik maannamutut ipput. Kalaallit isumaqatigiinniartuisa qanga iluatsittarsimasaattut maanna ingerlaannarnissaq iluatsissimammassuk nuannersortaraa, Rasmus Leander oqarpoq.

Aningaasat 2021-miit 2027 ilanngullugu atugassatut agguataarneqassapput. Aningaasat 90 procentii ilinniarnermut atorneqassapput, sinnerilu mingutsitsinaveersaarnermik ineriartortitsinermut atorneqassallutik.

Kalaallit Nunaat EU-lu imminnut atorfissaqartittut

Kalaallit Nunaat taamani EF-iusumiit 1985-imili aninikuugaluarluni tassanngaanniit tapiissutisiuartarpoq.

Tapiissutilli qanoq amerlatiginissaat sumullu atorneqarnissaat ukiut ingerlanerini allanngoriartoqarpoq. Aamma aningaasanut tunniunneqartunut atatillugu piumasaqaatit alliartorsimasut, Rasmus Leander oqarpoq:

- Issittormi pillugu EU-p sunniuteqarnerulernissaanut Kalaallit Nunaat aqqutaavoq, taamaammat EU-p Kalaallit Nunaat nunatut kammaginiassallugu soqutigisaraa.

AAMMA ATUARUK EU nunatsinni ilinniartitaanermut aningaasarpassuarnik tunniussisoq

EU nunattalu qanimut attaveqartuunerat naalakkersuisut siulittaasuata nuannaarutigalugu naqissuserneqarpoq:

- EU-mik isumaqatigiissutip naammassineqarnera nuannaarutigeqaara. EU-mik suleqateqarnitta pingaaruteqassusia isumaqatigiissuteqarnikkut naqissuserneqarpoq, naalakkersuisut siulittaasuat Múte Bourup Egede (IA) tusagassiutinut nalunaarummi oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk