Zelenskyj Ruslandimut pillaatisiassanik atuutilersitseqqikkusuttoq

Ukrainep præsidentia Volodymyr Zelenskyj Ruslandip uuliaanut gasianullu pillaatisianik atuutilersitseqqinniarpoq.

Kangiani qiterlermi sakkuaakkunnaarnissamik isumaqatigiittoqarnerata kingorna taama kajumissaarivoq.

Isumaqatigiissut taanna Hormusip kangerliumarngani, nunarsuarmi uuliap tallimararterutaanik assartuisarfimmi, angallassisoqaqqilerallarnissaanik imaqarpoq.

- Kangiani qiterlermi maanna sakkuaattoqarunnaarpoq, Ruslandillu uuliaanut pillaatisiassat tamakkiisumik atuutsinneqaqqilernissaat utaqqivara, Zelenskyj oqarpoq.

USA-p Ruslandimut uuliamut pillaatisiat ilaat qaammammi kingullermi sakkukillisippai.

Tassa nunat uuliamik Ruslandimiit assartorneqareersumik arfininngornerup tungaanut pisisinnaapput.

Akiniaalluni saassussisoq

USA-p Israelillu Iranimik februaarip ulluisa 28-anni saassussinerisa kingorna uuliap akitsoraluttuinnarnera akigititallu qaffakkiartupiloornerat pissutigalugit pillaatisiat sakkukillineqarput.

Ruslandiip pillaatisiani sakkukilliartuleqqullugit USA kajumissaarpaa.

Pillaatisianilli sakkukilliineq Ruslandip Ukrainemut sorsunneranut aningaasaleeqataasinnaasoq, Ukraine taassumalu Europami ilii mianersoqqussuteqarput.

Sorsunnersuup aallartinneraniilli uuliamut akigititap qaffannerata Ruslandi aningaasatigut iluanaaruteqarnerulersippaa. Ukrainemi ukiut sisamat sinnerlugit sorsunnerup kingorna naalagaaffiup aningaasaqarnera ajorseriaraluarpoq.

Ukrainep ilii arlallit russit nukissiuutitigut atortulersuutaannut saassussinerit unitseqqullugit Ukraine qanittukkut kajumissaaraat, Zelenskyj nangilluni oqaluttuarpoq.

- Kiap taamaalioqqusimaneraatigut oqaatigiumanngilara, Zelenskyj oqarpoq.

- Ilivulli taama piumaffiginnipput. Politikkikkut sakkutooqarnikkullu siuttut aqqutigalugit piumaffigaatigut.

Ukraine russit uuliasiorfiinut gassisiorfiinullu arlalinnut saassussinikkut akiniaavoq.

Ukrainemiut sakkutuuisa umiarsualiviit Ust-Luga aamma Primorsk Sapaatit-akunnerini kingullerni arlaleriarlutik saassuppaat.

Ortodoksit poorskiannut atatillugu Rusland Ukrainelu nalunaaquttap akunnerini 32-ni sakkuaakkunnaarnissamik isumaqatigiissuteqarput, tamannalu arfininngornermi sapaammilu atuutissaaq.

/ritzau/AFP