Sara Lynge Fredsbo pilatsinnermini naartusinnaajunnaarsitaasoq: - Qissasiinnarpunga

Sara Lynge Fredsbo Aalborg Universitetshospitalimi Thistedimi Jyllandip avannaata kitaaniittumi sapaatit-akunneri marluk matuma siorna pilatsippoq, pilatsinneralu ilimagisamit allaanerulluinnarpoq.

Sara Lynge Fredsbo 42-nik ukiulik sunngamigut ujarattaqarnini pissutigalugu sivisuumik anniarsimavoq. Sunngamigut ujarattaajartinnissani naatsorsuutigalugu marsip ulluisa 25-anni suliaritittussanngorpoq.

Mannissaqarfiatattaaq aappaa mannissaatalu aqqutaa peerneqaratarsinnaapput. Mannissaqarfiani qaanneqarsinnaanera tarrarsortinnerup takutippaa, tamassumalu kræftinnguussinnaanera nakorsaasa ernummatigaat. Taamaattumik qaannermik nassaartoqassappat mannissaqarfimi mannissamilu aqqutaata peerneqaratarsinnaanerinut akuersivoq.

Pilatsereernermi kingorna iterami mannissaqarfii ajunngitsut, "pilersaarutilli malillugit" mannissaata aqqutaa peerneqarsimasoq, taanna ilisimatinneqarpoq.

Taamaalilluni mannissaqarfiani qaanneqanngikkaluarluni naartusinnaajunnaarsitaavoq. Tamanna akuersissutigisimanagu, taanna oqaluttuarpoq.

- Tupannaqaaq. Qissasiinnarpunga mannissaqarfigalu ajunngikkaluartoq sooq taamaaliortoqarsimanersoq nakorsaq aperaara. Qaanneqassaguma mannissaqarfimma peerneqarnissaannut akuersissuteqarninnut naapertuutinngilaq, taanna oqarpoq.

Napparsimmaviup isornartorsiuineq akissuteqarfigaa

Sara Lynge Fredsbop akuersisimanermini suliaritinnerminilu qanoq assigiinngissuteqartoqarnersoq naluaa. Taamaattumillu misissorneqarniassammat Napparsimasut maalaarutaat pillugit Aqutsisoqarfik naammagittaalliorfiginiarlugu aalajangerpoq.

TV 2-p aamma TV Midtvestip suleqatigiillutik oqaluttuaq saqqummiuppaat, tusagassiuullu Tusarfik misigisaanik aamma oqaluttuarpoq.

KNR-ip isornartorsiuineq Aalborg Universitetshospitalimut saqqummiuppaa. Aalborg Universitetshospitalimi Thistedimiittumi nakorsaanerup Kristine Nielsenip oqarnera naapertorlugu Sara Lynge Fredsbop mannissami aqqutaata kukkusumik peerneqarsimanerinik isumaqarnera ajuusaarnarpoq.

- Napparsimasumik akuersilluinnarsimanngitsumik pilattaarusunneq ajorpugut, taamaattumik napparsimasut pilatsinnginnerini paasissutissiilluarnissaq pingaartingaarparput.

- Napparsimasup aalajangersimasup qanoq atugaqarsimanera pillugu sukumiinerusumik oqaaseqarsinnaanngilagut, mannissalli aqqutaanik peersineq nalinginnaasumik taamaallaat pisinnaavoq napparsimasoq siumut erseqqissumik isumaqatigiissuteqarfigineqareersimappat, allakkatigut akissuteqarluni oqarpoq.

Nakorsaaneruttaaq timip atortui ajoquteqanngitsut nakorsamit tunngavilersuuteqaqqaartoqartinnagu peerneqartannginnerat erseqqissarpaa, taamaattumillu aamma qaanneq nammineerluni peersimasoq nalilerneqarpat mannissaqarfinnik peersisoqarnavianngitsoq erseqqissarpaa.

- Pilattaanermi mannissap aqqutaata peerneqarnissaa nalinginnaasumik kaammattuutigisarparput, taamaaliornikkut kræfteqaleratarsinnaaneq annikinnerulertarmat. Uanittaaq pisumi napparsimasup kræfteqaleratarsinnaanera annikillivoq, Kristine Nielsen oqarpoq.

Kamassaqarlunilu qiajasoq

Sara Lynge Fredsbop pilatsereernermi kingorna misigissutsit ilungersunartut, unnuakkut sinissaarunneq eqqarsaatipiloqarnerlu aqqusaarpai.

Timimik nammineq aalajangiisinnaatitaanermik arsaarneqarneq tassunga artornarnerpaavoq.

Meerartaaqqissinnaajunnaarninili aamma aliasuutigaa. Paneqareerpoq, meerartaaqqissinnaanissanili mattutinngilaa.

- Ajorujussuarlungalu qiajavunga kamassaqarlungalu. Timiga pillugu nammineq aalajangiisinnaatitaavunga, kialuunniit tamassuminnga arsaarsinnaanngilaanga - aamma sinitsitaagaluarumaluunniit. Uannut eqquisorujussuuvoq, taanna oqarpoq.

Danmarkimittaaq peqqinnissaqarfimmut tatiginninneq ajorseriarujussuarpoq.

- Ajornarpoq, qialluni oqarpoq.

- Sunnerneqaatigeqaara, peqqinnissaqarfimmulli saaffiginninnissamut toqqissisimaleqqinniassagama neriuppunga iliuuseqarfigineqarumaartoq.

Suliariteqqinnissani ernumagigaa

Sara Lynge Fredsbo aamma pilatsinnerminut atatillugu timikkut ilakutaqalerpoq, peqqissiniarlunilu nukini tamaasa maanna atorpai.

Suliarli suli naammassineqanngilaq.

Taassuma oqarnera naapertorlugu pilatsinnerup nalaani mannissaqarfii qaaginnarsiorlugit misissorneqarsimapput, nappaammik qaannermilluunniit nassaartoqarnani. Taamaattumik tarrasorteqqinnissani utaqqivaa.

- Ernumagilluinnarpara - pingaartumik misigisama kingorna, taanna oqarpoq.