‘Toqqissisimananngeqaaq’: Inuunerup pitsaassusiata sunnerneqarnera Nuummiut qisuariarfigigaat
- Toqqissisimananngeqaaq. Taamanili paasigatsigu, Najaaraq Hegelund KNR-ip Nuummi Katuap eqqaani naapikkamiuk oqarpoq.
Kalaallit Nunaanni Peqqissusermik Misissuisarfimmit misissuinerup nutaap Trumpip nunatsinnut sioorasaaruteqarnerata kingunerisaanik inuunerup pitsaassusaa ajorseriarujussuarnerareeraat taama oqaaseqarpoq.
Innuttaasut apersorneqartut 76 procentiisa Donald Trumpip nunatsinnut tunngatillugu oqaaseqartarnera ingasanngitsumik sakkortunerusumilluunniit ernumassutigalugu oqaatigaat.
Naalli ernumasoqarnerugaluartoq, Najaaraq Hegelundip inuunini allanngortinngilaa:
- Sunniuteqangaarunanngilaq uanga nammineq inuunera inuuneriinnarpara.
Meriannguneq, sinissaaleqineq niaqunngunerlu
Kalaallit Nunaanni Peqqissusermik Misissuisarfimmi ilisimatusarnermi ataqatigiissaarisup Ingelise Olsenip tatisimanninneq nutaaq innuttaasut ilaannut kingunerluuteqangaatsiarsimasoq nassuiaatigaa.
- Tarnikkut imaluunniit eqqarsariartaatsikkut peqqinneq sunnerneqarsimavoq. Kisianni aamma inuit ilaat soorlu timimikkut peqqissutsimikkut sunnerneqarsimapput. Soorlu niaqunngunerit merianngunerit naarlunnerit allatullu sinissaaleqinerlu.
Misissuinermi ataaseq ‘naaminik anniartarnerartoq’, alla ‘aliasuinnaavillunilu qasuinnaavinnertoq’, allalu ‘aallussiniarnermik ajornartorsiuteqarlunilu oqarasuaatini iperarsinnaavallaarnagu nutaarsiassat misissukulanerarpai’.
Misissuinermi inuit 308-t apeqqutinik akissuteqarput, taakkulu agguaqatigiissillugit 48-nik ukioqarput. Akissuteqartulli ilarpassui Nuummi innuttaasuupput.
- Uani takorloorneqarsinnaavoq immaqa Nuummiut misigisimagaat mittarfissuaqalernikuugatta immaqa qanittutut arlaatigut susoqarnissaanut taanna takorloorsinnaavara peqqutaasinnaasoq, Ingelise Olsen oqarpoq.
Innuttaasunut periusissiat
Nuummili innuttaasut tamarmik ernumassuteqartuunngillat.
- Ernumanngilanga, kisianni soorunami eqqaaqattaarnalaarpoq, Aqqalu Abelsen KNR-imut oqarpoq.
Misissuinermi akissuteqartut arlallit tatisimannittoqarnerani imminnut paarinissaminnut assigiinngitsunik periuseqarlutik nassuiaatigaat. Amerlasuut ataatsimoorneq aamma ikinngutit ilaquttallu oqaloqatigineri pingaaruteqarluinnarnerarpaat, aamma nutaarsiassat takusatik killilersimaarniarsimanerarpaat.
Ilaat Guutimut qinusarput imaluunniit pinngortitamiillutik eqqissisimaartarput.
Aqqalu Abelsenilli inuunini allanngortinngilaa:
- Uannut allannguuteqaavinngilaq, taanna oqarpoq.
Apeqqutit akissuteqarfigineqartussat inoqatinut attaveqaatitigut januaarip februaarillu ingerlanerani nassiunneqarput. Naallu misissuineq tamakkiisumik sunniuteqanngikkaluartoq ilisimatusartut tamanna nunatsinni innuttaasut nunanit tamalaanit tatineqangaatsiarnermik qanoq sunnerneqarsimaneranik immikkut ittumik takussutissiisoraat.
