Atassut naalagaaffinngornissaq pillugu oqallinnermi pissuserissaarneroqqusisoq: Nunatsinniit aallaqqusaasarpugut

Naalagaaffinngornissaq pillugu oqallinnerup inituallaarnerata nunatta ineriartornissaanut innarliivoq. Oqallinnerit pissusilersuutillu kusanaatsut sakkortuallaartut, Atassutip siulittaasua, Aqqalu C. Jerimiassen isumaqarpoq. 

- Tassani oqallinnermi inuiaqatigiit immaqa taama avissaartuutsigipput, Atassutip siulittaasua, Aqqalu Jerimiassen taama oqarpoq.

Akerartorneqartartut

Atassut naalagaaffeqatigiinnarnissatsinnik kissaateqarpoq. Atassullu Inatsisartuni partiini taama kissaateqartuni kisimiippoq. Oqallinnerullu kingunerisaanik oqarasuaatitigut aqqusinermiluunniit inuit naapinnerini akerartorneqartarlutik, Aqqaluk Jeremiassen oqaluttuarpoq.

- Allaat sianerfigineqarluta ilaannikkut akerartorneqartarpugut. Toqqaannaq illoqarfimmi naapilluta akerartorneqartarpugut. Tamakkua oqallinnerunngillat inoqammulliuna nikanarsaanerit, Aqqalu Jerimiassen taama oqarpoq.

Naalagaaffinngornissaq pillugu oqallinnerup misigissutsinik attuilluartarnera pissutigalugu oqaatsit pissusilersuutillu kusanaatsut sakkortuut pissutaaqataallutik, nunatsinnit aallartoqartartoq taanna isumaqarpoq.

- Allaat nunatsinniit aallaqqusaalluta, qallunaajorusunnerarluta tikkuarneqaannartarnerput, uffa maani nunaqaataalluta oqaatsigut atorlugit.

Namminiilivinnissarli nunatsinni kissaatigineqartupilussuusoq Atassutip nalunngilaa. Tamannalu piffissanngorpat, Atassut nunatta ajunnginnerpaamik inissisimanissaanut suleqataassasoq, Aqqalu Jerimiassenip erseqqissarpaa.

Nalaagaaffinngornissamulli suli suliassaqartorujussuusoq, taanna isumaqarpoq.

- Imaaginnanngilaq juulimaaq poortukkanik kattorna pajussasoq. Naalagaaffinngorassi aajukua 10 milliardit, taamaattoqarsinnaannginnami. Aatsaat uagut namminneerluta suliniuteqarutta tamakku angusinnaassavagut.

Nunattalu naalagaaffinngornissaata tunngavissaa pitsaanerpaatinniarlugit politikkikkut pingaarnersiuisoqarnerani aningaasat peqqinnissaqarfimmut inunnullu isumaginninnermut atorneqartut amerlanerusariaqartut taanna isumaqarpoq.

- Soorlu naalagaaffinngornissamut suliniarnerit salliunneqarput ilaatigut soorlu 40 millionit koruunit atorlugit atuisoqarluni. Inuiaqatigiinnut aningaasat immaqa atorneqarsinnaangaluit, inoqatigut katagarlugillu nalagaaffinngornissaq orninneqarsinnaanngilaq,Aqqalu C. Jerimiassen taama oqarpoq.