Namminiilivinnissaq pillugu politikkikkut oqallinneq: Piffissap ilaani killiliisariaqarpugut

Namminiilivinnissaq Inatsisartuni ilaasortat akornanni pingasunngornermi oqaluuserisassaniippoq.

Demokraatiniimmi, Jens Frederik Nielsenip inatsisilerinikkut, politikkikkut aammalu aningaasatigut inissisimanermut tunngatillugu Namminersorlutik Oqartussat danskillu naalakkersuisui peqatigiillutik naatsorsuutigisassanik aalajangeeqatigiinnissaat ilumut isumassarsiatsialaanersoq Inatsisartut ukiaanerani ataatsimiinneranni oqallisissiatut siunnersuutigaa.

Namminiilivinnissarli pillugu oqallinneq nutaajunngilaq. Taamaammat KNR-ip Nuummi pingasunngornermi ullaap tungaani naapitaasa oqallinnermit iliuuseqartoqarnissaa kissaatigineruaat. Miiti Geisler taakku ilagaat.

- Namminersoraangatta tamakkiiginnaavilluta suliinnaavilluta feeriassanata sulerusaaginnaavittaratta, namminiilivissagutta aamma taamaakkami taamaattumik allanngortoqartariaqarpoq  namminiilivinnissaq anguneqassappat.

- Massakkorpiaq nipaannerulaarput namminiilivinniarlutik oqallittut. Ilai isumaqataasut ilai nangaasut, ilai ikippallaarigaatigut, Miiti Geisler oqarpoq.

Namminiilivinissaq pillugu oqallinnissamut aggersarneqaruit suna oqallisigalugu aallartissutigissagaluarpiuk?

- Inuit eqqarsartaatsikkut piareersimanissaat, piumassuseq takkuttariaqarpoq, inerisaalluareernikut nunat allat soorlu assersuutigisuarparput qallunaat nunaat maani politikeritta aallaavigisorujussuusarpaat, taannaannarluunniit eqqaassagaanni qallunaat periusaat, inatsisaat tamaaviisa atuinnaavillugit nunatsinnut naleqqussartariaqarput, Miiti Geisler oqarpoq.

Ineriartornitsinnut pingaaruteqartoq

KNR-ip illoqarfiup qeqqani naapitaata, Aqqaluk Jørgensenip, namminiilivinnissaq pillugu oqallittoqaannartarsoraa.

- Politikerit namminiilivinnissaq piffissami sivisoorujussuarmi oqaluuseraat. 1979-imili oqaluuserilerpaat. Taamaammat maannakkut iliuuseqartoqalaarsinnaavoq, Aqqaluk Jørgensen oqarpoq, taassumalu namminiilivinnissaq aamma taperserpaa.

Aqqaluk Jørgensenip politikerit oqallinnerannit iliuuseqartoqarnissaa kissaatigineruaa. Assi © : KNR / Ann-Sophie Greve Møller

Oqallinnissarpulli pingaaruteqartoq, Karsten Høy Nuummi illoqarfiup qeqqani pingasunngornermi ullaap tungaani naapinneqartut ilaat isumaqarpoq.

- Oqallinneq suut pisariaqarnerannik assigiinngisitaartunik pilersitsisartoq pingaaruteqarpoq. Qanorluunnit oqaloqatigiittoqaraluarpat tamanna inuiaqatigiittut ineriartornissatsinnut pingaaruteqarpoq, Karsten Høy oqarpoq.

Nunatta namminiilivinnissaa kissaatigaajuk?

- Aappi. Nunatut nammineq naalagaasinnaaneq pingaaruteqarluinnarpoq. Namminiilivinneq atassuteqaatinik kipisinissatut isiginngilara, kisianni inuiaqatigiittut tulluusimaarluta nammineq iliuuseqarfigisinnaasarput namminerlu siunissatsinnut akisussaaffeqarnissarput.

- Kisianni aalajangersimasumik periusissiornissamut iliuuserinissaanullu tunngavoq. Piffissap ilaani killiliisariaqarpugut qanorlu iliuuseqarfiginiarnerlugu oqaatigalugu, Karsten Høy oqarpoq.

Oqaloqatigiinnissamut pikkorinnerulissaagut

Karsten Høyip oqarnera naapertorlugu nunatta namminiilivinnissaa aningaasaqarnerup patajaatsuuneranit aallartissaaq. Taannalu aalajangiisussaagaluaruni oqallinneq tassannga aamma aallartissagaluarpoq.

Karsten Høy Inatsisartuni qinikkat akornanniikkaluaruni namminiilivinnissaq pillugu oqallinneq nunatsinni aningaasaqarnerup qanoq inneranik oqaluuserinninnermik aallartissagaluarpaa. Naalagaaffittut akiligassanik nammineq akiliisinnaanissaq pingaaruteqartoq, taanna oqarpoq. Assi © : KNR / Ann-Sophie Greve Møller

KNR-ip naapitaasa ilaat Makka Heilmann aamma isumaqataavoq. Taassuma oqallinnermi tassani aningaasaqarnerup qanoq pitsanngorsarnissaa pingaartissagaluarpaa.

- Maannakkut nunatta qaqugu namminiilivinnissaa takorloorsinnaanngilara, amerlasoorpassuimmi aaqqiivigineqaqqaartariaqarput.

- Meeqqat, utoqqaat angerlarsimaffeqanngitsullu ullumikkut qanoq atugaqarnerat oqaluuserineqartariaqarlutillu pitsanngorsaavigineqartariaqarput, tamanna politikerit qineqqusaartoqarnerit tamaasa neriorsuutigisarpaat, Makka Heilmann oqarpoq.

Makka Heilmannip suli inuunermini nunatta namminiilivinnissaa ilimagaa. Taamaakkaluartorli ukiuni qaninneruni namminiilivittoqarnissaa takujuminaatsippaa, nunatsinnimi namminiilivittoqartinnagu ajornartorsiutaangaatsiartut aaqqiivigineqaqqaartariaqartut, taanna oqarpoq. Assi © : KNR / Ann-Sophie Greve Møller

Miiti Geislerilu aperigaanni maannakkut nunatut namminiilivikkusuttoqaruni nunani allanitulli pigissaarnissaq naatsorsuutigineqarsinnaanngilaq. Kisianni nuanni ajornartorsiuteqanngitsunik soqanngilaq, aamma nunani namminiilivissimasuni.

Miiti Geislerip oqarnera naapertorlugu maannakkut oqaloqatigiilluarsinnaaneq pingaarnerpaavoq.

- Immitsinnut attaveqaqatigiinnerussaagut, isummatsinnillu oqaaseqarnissatsinnut ilaannit akeqqersimaarfigineqarsinnaalernissarput pissutigalugu tunuarsimaarunnaarluta ajornartorsiutit oqaluuseralugit, taanna oqarpoq.

Namminiilivinnissamut aalajangernissaq naggaterpiaani kalaallit innuttaasut aalajangertussaavaat. Tamanna namminersorneq pillugu inatsimmi allassimavoq.