Nunatsinni inuuniarneq akitsuallassimasoq

Atuisunut akit siorna jannuaarip aallaqqaataanit ukioq manna jannuaarip aallaqqaataanut 2,4 procentinik qaffassimasut, Naatsorsueqqissaartarfiup kisitsisaataasa takutippaat. Tassalu aningaasaativut nalikilliartorput.
Aningaasaatigut nalikillinerat aarlerinarujussuanngitsoq, adjunkti isumaqarpoq. Assi © : KNR
Allattoq Ivik Kristiansen, Malik Brøns
apriilip 20-at 2020 12:27

Nunatsinni nioqqutissat ataatsimut isigalugit akisunerulersimapput. Akitsuutillu siorna akuersissutigineqartut tamatumunnga pissutaanerpaajupput.

- Imigassamut, tupamut sukkumullu akitsuutit pissutaanerullutik atuisunut akit qaffapput, Naatsorsueqqissaartarfimmit allapput.

Aamma sullississutikkuutaartut Nerisassat taavalu Neriniartarfiit akunnittarfiillu qaffariartitseqataanerpaasunut ilaasut kisitsisit takutippaat.

AAMMA ATUARUK Finanslov for næste år vedtaget

Nioqqutissat tamarmik naatsorsorneqarpata atuisunut akit 2,4 procentinik qaffariarput. Aningaasaatitta nalingi 2012-imi 4,3 procentinik appariarmatali aatsaat taama appariartigipput.

- Atuisunut akit qaffariarpata, akissarsiallu sukkaqataanik qaffanngippata, innuttaasut sulisinnaasut isertitaat ajorseriassapput, Ilisimatusarfimmi inuiaqatigiilerinermi aningaasanullu tunngasuni adjunkti Javier Anaut KNR-imut allappoq.

Aningaasaqarneq sunnertiasoq

Maannali qaffariarneq aarlerinarujussuanngitsoq adjunkti isumaqarpoq.

- Kalaallit Nunaanni isertitat qujanartumik aalaakkaapput, Anaut allappoq.

Maanna qaffariarneq aarlerinarujussuanngikkaluartoq nunatta aningaasaqarnerata qanoq sunnertiatigineranik takutitsivoq.

- Kalaallit Nunaata akitsuutinik allannguinernit qanoq malussaritsiginera ersersippaa. Akit agguaqatigiissillugit 1 procentimit 2 procentimut ukiuni kingullerni nalinginnaasumik qaffariartarput, Javier Anaut allappoq.

AAMMA ATUARUK Suliffeqarfiit 175-it coronap ajornartorsiortitsinerani aningaasatigut ikioqqusut

Atuisunulli akit naatsorsorneqaqqilerpata coronamut ajornartoorneq sunniuteqartupilussuussaaq.

- Silaannakkut assartuerusuttut angalarusuttullu ikilissapput. Tamannalu Kalaallit Nunaanni neriniartarfinnut akunnittarfinnullu akinik qaammatini aggersuni appartitsissaaq.

- Takornariartitsisut pisortallu ajornartoornermi matumani eqqorneqarnerpaassapput. Tamanna atuisut akiliutaannut naatsorsuinerup tullia saqqummerpat takuneqarsinnaassaaq. Akit nunap ammarnissaata tungaanut appasinnerussapput,, Javier Anaut allappoq.

Akilli appasinnerulertussaagaluartut imaanngilaq nutaarsiassatsialaasoq.

- Nioqqutissiortut sullissisullu ukioq tamaat ilungersussapput, aningaasatigullu naammattumik ikiorserneqanngikkunik akiliisinnaajunnaarsinnaassallutik, Javier Anaut allappoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk