Inatsisartut 2020-mi aningaasanut inatsit 13-init isumaqataaffigineqarluni taasissutigineqarpoq, qulit akerliullutik taasisut.Assi: KNR / Malik Brøns

Aningaasanut inatsit: Inatsisartut 2020-imi aningaasanut inatsit akuersissutigaat

Inatsisartut 2020-mut aningaasanut inatsit akuersissutigaat. 13-it akuersipput qulillu itigartitsillutik.

Ilanngutassiaq aningaasanut inatsimmut isornartorsiuinerit ilanngullugit tallimanngorneq novembarip 22-at nal. 06.30-p nutaarterneqarpoq.

2020-mut aningaasanut inatsit sisamanngornermi ualikkut akuerineqarpoq.

Akuersissuteqartoqarnissaa naalakkersuisooqatigiit, Siumut, Nunatta Qitornai partiillu ikorfartortaasut Demokraatit aningaasanut inatsimmut isumaqatigiissuteqareersullu naatsorsuutigineqalerpoq.

Tassalu taakku naalakkersuisooqatigiit Demokraatillu aningaasanut inatsit Inatsisartuni sivisunaarlutik isumaqatigiinniareerlutit 17.30-p missaani taasissutigalugu akueraat.

Aningaasanut inatsit isornartorsiorneqartoq

Aningaasanut inatsit naammassineqartoq 2020-imi 49,6 miliuunit koruuninik sinneqartooruteqarnermik missingersuiffiuvoq. Aamma ukiuni tulliuttuni sisamani 0,3 millionit koruuninik sinneqartoornerissamik ilimagisaavoq.

Aningaasanut inatsit pillugu isumaqatigiissut ataasinngormat ullaakkut saqqummiuneqartoq isornartorsiorneqaqaaq, akerliusullu illoqarfinni arlalinni pingasunngormat takutitsipput.

AAMMA ATUARUK Tupanut akitsuusiineq aningaasanut inatsisip amigartooruteqarneranut matussusiissasoq

Mamakujuit, sukkut, imigassat sikaritsillu akitsuuserneqarnerisigut aningaasanut inatsimmi amigartoorutit matussuserniarneqarput, akitsuusersuinerillu pissutaallutik akerliussutsimik takutitsisoqarluni.

Akitsuusersuiniarnerit pissutaallutik partiit illuatungiliuttut aappaagumut aningaasanut inatsimmut ilaatigut taaseqataanngillat.

Illuatungiliuttut kinguartitsinissaq kissaatigigaluaraat

Aningaasanut inatsisissap akuersissutigineqarnissaata kinguartinneqarnissaa Partii Naleqqap Inuit Ataqatigiillu kaammattuutigaat, nutaamik isumaqatigiissusiortoqarsinnaanissaa ujartorlugu.

Aningaasaqarnermut naalakkersuisup Vittus Qujaukitsup tamanna itigartippaa. Aningaasanut inatsisissatut siunnersuummut amerlanerussuteqartoqarnera Qujaukitsup oqaatigaa, taamalu akuersissutigineqarluni

AAMMA ATUARUK Akitsuutit nutaat pillugit akerliussutsimik takutitsisut: Naammaleqaaq!

Aningaasanut inatsisissatut siunnersuut pillugu isumaqatiginninniarnernit aniinnarnertik, partiit illuatungiliuttut sisamat Inuit Ataqatigiit, Atassut, Partii Naleraq Suleqatigiissitsisullu sapaatip-akunnerata siuliani tallimanngormat nalunaarutigaat.

Naalakkersuisut partiit illuatungiliuttut politikkikkut kissaatigisaannik tusaaniannginnerat tassani oqaatigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat