Suliffeqarfiit 175-it coronap ajornartorsiortitsinerani aningaasatigut ikioqqusut
Nunatsinni suliffeqarfiit 175-it coronap ajornartorsiortitsinerani ikiorneqarnissaminnut qinnuteqarput. Tamanna ataasinngornermi ullaap-tungaani killiffigineqarpoq.
Amerlanerulernissaalli ilimagineqartoq, qinnuteqaatinik isumaginnittup, Greenland Businessip pisortaa, Christian Wennecke oqarpoq.
Qinnuteqaaterpassuit naammassineqanngitsut
Tusarfik: Greenland Business
- Qinnuteqaatinit tigoriikkatsinnit suli amerlanerusut qinnuteqarnissaat ilimagaarput, Greenland Business pisortaa oqarpoq.
AAMMA ATUARUK Nunatsinni inuussutissarsiornermut ikiorsiissutit ima ipput
Naalakkersuisut inuussutissarsiuteqartunut ikiorsiinissaannut qinnuteqarsinnaaneq sapaatip-akunnerata siuliani ataasinngornermi ammaanneqarpoq. Ikiorsiissutissat milliardit affaannik aningaasartaqarput.
Aningaasat inuussutissarsiortunut coronaviruseqarnerani ajornartooqqasunut ikiorsiissutigineqassapput.
30 millionit koruuninut qinnuteqartut
Qinnuteqartut amerlanerpaartaat takornariaqarnermik suliaqartuupput, tulliullutillu pisiniarfiit aamma nerisassaarniarfiit.
Qinnutigineqartut ataatsimut katillugit 30 millionit koruuniupput. Qinnuteqartulli tamarmik naatsorsuutigisaat tunniunneqarsinnaanngitsut, Christian Wenneckep erseqqissaatigaa.
- Qinnuteqartut ilaasa qanoq pisoqarsinnaanera neriulluaatigivallaarpaat, pisortaq oqarpoq.
AAMMA ATUARUK Sulisut ikiorsiissutinik annaanneqartut
Suliffeqarfippassuit assersuutigalugu taamaatitsiinnartoqarnerup malitsigisaanit kaaviaartitanit annaasanit annerpaamik 23.000 koruunit tikillugit taamaallaat qinnutigineqarsinnaanerat maluginianngilaat.
- Amerlasuut kaaviiaartitaminni tassanga annertunerungaatsiartumik annaasaqarput, pisortaq oqarpoq.
Suligasuartoqartoq
Greenland Business Kommuneqarfik Sermersuumit Greenland Adventuremiillu sulisunit qinnuteqaatinik isumaginninnissamut ikiorneqarput.
- Isumaginninnissatsinnut piareersarpugut, isumaginninnerpullu sapaatip-akunnerani matumani ingerlalertupallannissaa qularutiginngilara. Suliassarpassuuppulli, Christian Wennecke oqarpoq.
Suliffeqarfiit qaammatikkaartumik taamaallaat qinnuteqarsinnaapput, taamaammat suliffeqarfiit ilaat qasseeriarlutik qinnuteqartariaqartarsinnaapput.
Greenland Businessip pisortaata oqarnera naapertorlugu aningaasat immikkoortinneqartut naammannersut nalileruminaappoq.
- Aningaasat pisariaqartinneqartunut naammannersut oqaatigissallugu siusippallaarpoq, Christian Wennecke oqarpoq.