Nunatsinni inuussutissarsiornermut ikiorsiissutit ima ipput
Nunatsinni inuussutissarsiortut matusinermit ilungersunartorsiorput.
Naalakkersuisut coronavirusi nunatsinni siaruatsaaliniarlugu soorlu Nuup matuneratigut tassanilu inuit katerinnissaannut inerteqquteqarnikkut sakkortuumik iliuuseqarnerat nunatsinni inuussutissarsiortunut aningaasanik millionilikkaanik annaasaqaataavoq.
Taamaattumik 500 millionit koruunit ikiorsiissuteqarnissamut immikkoortinniarneqarput, aningaasallu taakkua nunatsinni suliffeqarfiit coronavirusimik ajornartoornermi aniguinissaannut iluaqutaanissaat siunertaavoq.
AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat
Aningaasat taakkua ilaatigut soraarsitsinissaraluanik pinngitsoortitsissutaaassallutillu aningaasarsiatigut annaasanut taartisiassanut atorneqassapput.
Nunatsinni inuussutissarsiornermut ikiorsiissutit immikkoortunut arlalinnut agguarneqarput: Ikiorsiissutiginasuaatit annermik suliffeqarfinnut namminersortunut aammalu kiffartuussinermik, neriniartarfiuteqarnermik takornariaqarnermillu inuussutissarsiutilinnut atorneqassapput.
Taakkua akunittarfiusinnaapput unnuiffissatut taamaatitsiinnarfiusimasimasut. Aamma takornariaqarnermut suliffeqarfiusinnaapput takornarianik amerlanngitsunik angallassinermik inuussutissarsiutillit maanna isaatitaqarunnaavissut.
50 millionit koruunit ikiorsiissutiginasuaatissanut immikkoortinneqarput.
Ikiorsiissutit tamakkiinerusut allanik - annermik aalisarnermik, angallassinermik sanaartornermillu - inuussutissarsiutilinnut atorneqassapput.
100 millionit koruunit ikiorsiissutissanut tamakkiinerusunut immikkoortinneqarput.
Suliffeqarfippaalunni sulisut suliffitsik matuneqarmat matuneqarallarmalluunniit angerlartitaapput. Angerlartitat soraarsitaaqqunagit aningaasarsiatigut annaasaat ilaannut taartisiassaqartinneqassapput.
Suliffeqarfiit sulisumi annerpaamik 30 procentiinik soraarsitsinissamut ilimasaaruteqartussat aningaasarsiatigut annaasanut taartisiassanut atugassaminnik qinnuteqarsinnaapput.
Suliffeqarfiit 25-nit amerlanerusunik sulisullit aningaasarsiatigut annaasanut taartisiassanut atugassaminnik aamma qinnuteqarsinnaapput.
Taakkununnga 107 millionit koruunit immikkoortinneqarput.
Tamatuma saniatigut suliffeqarfiit akileraarutinut akitsuutinullu akiliinissaminnik kinguartitsisinnaapput. Tamanna qaammammut 250 millionit koruuninik akeqartassaaq.