Nunani allani misilittakkat naalakkersuisullu oqaasii imminnut assortuuttut

Nunatsinni isumaginnittoqarfinni sullissisut suleruloqisut, siusinnerusukkut oqalutturaarput. Taamaattorli taakkua suliassaannik amalernerpaaffiliisoqartalissanngitsoq, meeqqanut inuusuttunullu naalakkersuisoq Aqqaluaq B. Egede (IA) nalunaarpoq. 

Tamannami sullissisut sulerulukkunnaarnissaannut angerlarsimaffiullu avataanut inissiinikinnerunissamut aqqutissaanngitsoq, taanna oqarpoq.

Tamannali ilumuuissorunanngilaq.

Suliaat ikilimmata pimoorussinerulersinnaalertut

Danmarkimimi isumaginnittoqarfiit ilaanni sullissisut suliassaannik misiliilluni amerlanerpaaffiliisoqartalerpoq. Tassa Herning Kommunemi.

Misiliiluni suliniut taanna ima iluatsitsigaaq, allaat Herning Kommune Danmarkimi kommuninit allanit isumassarsiorfigineqartarluni.

Misiliilluni suliniut taanna "Herning-modellen"-imik kingorna taaneqarpoq.  

Danmarkip inuunermi atukkanik ilisimatusarfiani (VIVE) neqerooruteqartarnermi suliniutilerinermilu ineriartortitsinermut pisortaq misiliillunilu suliniummik aamma naliliisuusoq Hanne Søndergaard Pedersen taama oqarpoq nangillunilu:

- Iluatsilluaqaaq. Angerlassimaffiummi avataanut inissiinerit ikilingaatsiarput, pitsaaliuinermillu suliniutit aamma amerlipput. Imaanngilarli sullissisut suliakinnerulertut. Suliassaalli ikilipput, taamaammallu pimoorussinerulersinnaalerput, taanna oqarpoq.

Sverigemi periuserineqartoq isumassarsiorfigigaat

Herning Kommunep misiliilluni suliniut taanna 2016-imi aallaartippaa. Angerlarsimaffiup avataanut inissiinerit amerlisimasut sullissisullu nukissaarukkiartuinnartut paasimmagu taamaaliorpoq.

Taamaammat allaffissornikkut suliat alaameriarlugit nunat allat qanoq iliornissamik isumassarsiorfiginiarlugit aalajangerpoq. Isumassarsiorfissaqqissorisanilu qaninaarpaa, tassaammami nuna sanilertik Sverige.

Tamaanimi isumaginnittoqarfinni sullissisut suliassaat ikilinerat ima iluatsitsigaat, allaat angerlarsimaffiup avataanut inissiinissamik naliliitinnatik pitsaaliuniarlutik iliuuseqajaartalerput.

Assi © : Socialpædagogerne

Qanoq iliuuseqajaartoqarsinnaaneranik najoqqutaq isumassarsiorfigaat. Isumassarsiorfigisaallu isumaginninnermi siunnersortinut takornartaagunanngikkaluartoq allatut atorsinnaagitsik paasigaat, Hanne Søndergaard Pedersen oqarpoq: 

- Meeqqap killiffia Sverigemi sullissinermi aallaaviusarpoq. Meeraq sullitaq angerlarsimaffiup avataanut inissinneqarpat imaanngilaq tamanna pitsaanerpaasoq, taassumami ulluinnarni pitsaasumik atugaqarnissaata qularnaarnissaa pingaarnerutinneqarmat. 

Suliaat isumaqarnerulertut

Tassa Herning Kommunep misiliilluni suliniuteqarnerani angerlarsimaffiup avataanut inissiinerit ikilisimasut, VIVE-p misissuinerani paasinarsivoq. Tamannami siunertaammat taamaannera tupaallaatigivallaanngilaat.

Aammali isumaginninnermi siunnersortit suliamik nuannarinninnerulerput, suliatimmi ikinnerulermata pimoorussinerusinnaalerlutillu sullitami killiffiat malinnaaffigilluarsinnaaleramikkit misigipput suliaat isumaqarnerulertut:

- Malugusoqaat. Sullissisummi akornanni misissuisoqarnerani taarseraattoqanngingajavippoq. Tamannalu qaqutigooqaaq. Isumaginnittoqarfinni sulisut taarseraakkajuttorujussuupput. Tamannalu suliamik isumaqarnerulerannik misiginerannut pissutaagunavissutut isigineqarpoq.

Namminerli iliuuseqaqataasimanngikkaluarunik taama angusarissaartigisimanavianngikkunaraluartut, Hanne Søndergaard Pedersen erseqqissaavoq. Taamaaliorsinnaajumallunimi sulisut akisussaasuisalu allatut eqqarsarsimanissaat pisariaqarpoq.

Meeqqammi inuusuttullu ikiortariallit pitsaanerpaamik sullikkumallugit allamut inissikkaanni pitsaanerusorineqakkajuttoq, taanna oqarpoq. 

Taamatorpiarli eqqarsartarneq Herningimi allanngortinneqarpoq:

- Allamummi inissiisoqartillugu sapinngisamik pitsaanerpaamik iliorsimasutut eqqarsartoqakkajukkunarpoq. Taamaalilluni meeraq pitsaanerpaamik ikiorsimasorinarsinnaalersarpoq. Taamaaliornerli pitsaanerpaasariaqanngitsumut saatillugu allatut eqqarsartalerput, taanna oqarpoq nangillunilu:

- Meeraq sullitaq ilungersuammat allamut inissikkaanni pitsaanerusorineqakkajummat taamaaliortoqakkajuppoq. Allatulli iliorsinnaajumalluni allatut eqqarsarnissaq pisariaqarpoq.

Pitsaaquteqartoq

Aaningaasartuutaanerussaaq. Tamannalu tassa meeqqanut inuusuttunullu naalakkersuisup Aqqaluaq B. Egedep isumaginnittoqarfinni sullissisut suliassaannik amerlanerpaaffiliisalinnginnissamik aalajangernerminut tunngavilersuutigisaanut ilaavoq.

Taamaaliortoqartaleraluarpammi isumaginninnermi siunnersortinik atorfinitsitsiortornissaq pisariaqartussaassaaq, tamannalu kommunit aningaasartuuteqarneruneranik kinguneqartussaassalluni.

Tamannali immaqa aamma ilumuuissorunanngitsoq, Hanne Søndergaard Pedersen oqarpoq:

- Angerlarsimaffiummi avataanut inissiineq akisusaqimmat, imminut akilersinnaalluartoq aamma paasinarsivoq. Sullissisoqarnerunermummi aningaasartuuteqarfiunerugaluartoq imminut akilersinnaalluarsimavoq.

Allatut iliornisssaq aamma pisariaqartoq

Herning Kommunep suliniutaa misiliutaasoq, Hanne Søndergaard Pedersen erseqqissaavoq.

Taannalu tassa suleriutsit pitsaanerpaaffissaaniinnissaanut tunngaviliisuuvoq.

Meeqqat isumannaatsuunissaannut tunngaviliisoq, taanna oqarpoq.

Suliniulli taanna allatut eqqarsalerfiuvoq. Herning Kommuniinnaanngitsumi, Danmarkimili kommuni allani aamma.

Danmarkimimi kommunit isumaginnittoqarfii pitsaaliuinermik suliniuteqarnerusalerput. Suliassat amerlassusaat apeqqutaatinnagit.

Namminerli iliuuseqaqataanissaq aamma pisariaqarpoq:

- Suliassanik amerlanerpaaffiliineq immini naammanngissoraara. Allatummi iliornissaq aamma pisariaqarpoq.

- Angerlarsimaffiup avataanut inissiinikinnerunissaq kissaataappat, pitsaaliunermi neqoorutit aamma pitsaasuusariaqarput.