Innaallagissap atortuisa ajutoorneratigut innaallagiaaruttut
Tasiusami innaallagiaaruttooqattaarneq innuttaasut decembarimili misigisarpaat. Ataasinngormalli ajornerpaammat nalunaaquttap akunnerpaaluini nunaqarfik unnukkut nalunaaqutaq arfineq pingasuniit unnuakkut marlup tungaanut innaallagiaqanngilaq. Illorpassuit oliefyrinnarmik kiassaateqartut kiassarneqarsinnaajunnaarput, Tasiusarlu 25-t sinnerlugitissippoq.
Tasiusarmiu Simon Sakkariasssen Qanoorumi apersorneqarluni ima oqarpoq:
- Soorunami issittorsuumat, illup iluani uunassaataasinnaasunik naqqatigut atuiniarsareqaagut. Killivit naneruutillu taamatullu kiassaatit petruleumitortut atorlugit illut kiassarneqarput, Sakkariassen taama oqarpoq.
AAMMA ATUARUK Tasiusami innuttaasut qiiannginniassammata Pilersuisoq ikiuuttoq
Tasiusami innaallagiaarunneq innaallagissap aqqutaanik siammarteriviup ajutoorneranik tunngaveqartoq, Nukissiorfiup pisortaanerata Michael Pedersenip ima nassuiaatigaa:
- Misissueqqinnitsinni paasivarput innaallagissamik atuisut atuinerisa siammarterivik pissusissamisut ingerlatikkunaaraat, tamannalu innaallagissap aqqutaani assoroortitsilermat innaallagiaarunnermik kinguneqarpoq.
Nunaqarfinni innaallagissamik atuineq allanngortoq, soorlu kiassaatit innaallagiatortut atugaanerulersimasut Nukissiorfinni Immikkoortortami avannaani ingerlatsinermi aqutsisup maluginiarsimallugu KNR-imut oqaluttuaraa. Tamannali kisitsisitigut takuneqarsinnaanngitsoq, Nukissiorfiup pisortaanerata Michael Pedersenip oqaatigaa.
- Nunaqarfinni innaallagissamik atuinerat qimerlooraani takuneqarsinnaavoq atuineq allanngorsimanngitsoq - apparialaarsimasorli. Taamatuttaaq Tasiusami ippoq,Nukissiorfiit pisortaanerat taama oqarpoq.
Tasiusamili aamma nunaqarfinni allani innaallagiaaruttoortoqaqqinnginnissaa anguniarlugu Nukissiorfiit misissuipput.
- Innaallagiaaruttooqqinnginnissaq anguniarlugu nunaqarfinni innaallagissap aqqutai pissusissamisoornersut, kiisalu eqqortumik katiterneqarsimanersut misissussavagut. Ingerlatsinermi suliaqarpugut, pisut periataarsinnaasarput, pitsaanerpaamillu iliuuseqarfiginiartarpagut. Aamma suliassarput naammassisinnaavarput, Nukissiorfiit pisortaanera Michael Pedersen taama oqarpoq.
