Sarfaarunneq: Tasiusami innuttaasut qiiannginniassammata Pilersuisoq ikiuuttoq
Nunaqarfiup Tasiusap innaallagissiorfiata qameqattaarsimanera decembarimili ajornartorsiutaasimasoq, Simon Sakariassen KNR-imut oqaluttuarpoq.
Ataasinngormallu ajuissimavoq, Sakariassen oqarpoq. Tassami ullup qeqqaannartoq nunaqarfik sarfaaruteqattaalersimavoq unnukkullu nalunaaqutaq arfineq pingasunut nunarfik sarfaarutivissimavoq, unnuakkullu aatsaat innaallagissiorfik aallarteqqissimalluni. Januaari, takinermi saniatigut, issittaqisutut ilisimaneqarpoq, tamannalu Tasiusami, Upernaviup Avannaatungaaniittumi, allaanerunngilaq.
26-t angullugit issimmat illut, kiassarnissaminnut innaallagissamik pinngitsuuisinnaanngitsut, qiianarsipallassimapput.
- Illup iluani qiianarsimmat kissarsuutit petroliutortut, naneruutit assigisaallu atorlugit kiassarniarsarivugut, Simon Sakariassen KNR-imut oqaluttuarpoq.
Nunaqarfimmi innuttaasut ilaat sarfaaruttoornermi kiassarsinnaanissamut piareersimasimanngillat. Taamaammallu Avannaata Kommunia Pilersuisumut saaffiginnissimavoq, nunaqarfiup niuertarfia innuttaasunik kiassaataasinnaasunik pisariaqartitsisunut ikiueqqullugu. Innuttaasullumi primusinik, naneruutinik kissarsuutinillu petroliutorttunik aallernissamik periarfissinneqarsimasut, Pilersuisup avannaani tuniniaanermi pisortaa, Ole Løvstrøm, KNR-imut oqarpoq.
Periarfissarlu innuttaasunit atorluarneqarsimasoq, Simon Sakariassen oqaluttuarpoq.
- Kiassaataasinnaasunik tunineqarallarpugut. Aamma paasivara unnuk taanna petroliutortut nungussimasut, Sakariassen oqaluttuarpoq, nangillunilu;
- Qujanartumilli unnuakkut nalunaaqutaq marlunngortoq innaallagiaqaqqilerpugut, Simon Sakariassen, sarfaaruttaqattaarsimanermik qatsussisoq, oqarpoq.
Nunaqarfiup innaallagissiorfiani suna ajornartorsiutaanersoq qanorlu ataavartumik aaqqiissuteqartoqarsinnaanersoq paasiniarlugu Nukissiorfiit misissuiartortitsisimasut, Nukissiorfinni avannaani ingerlatsinermi pisortaq, Kjell Bergman, ilisimatitsivoq.
Allaaserisaq Inuiaat Tillernerani kiisalu Nunatta Nipaani sammineqareernerani allaaserineqarpoq.