Nukissiorfiit aningaasatigut pisariaqartitaat Aningaasaqarnermut Ataatsimiititaliap maanna qaqileriffigerusukkaat
Ukiuni kingullerni Nukissiorfiit iluanni aserfallatsaaliuinissamut aningaasaliissuteqarnissamullu aningaasaliissuteqartoqartariaqarneranik paasissutissiisarnerat, politikerit qisuariarfiginikuunngilaat.
Qaammatilli aallartinnerani atassuteqarniarnikkut ajutooqattaarnerit taakkununnga eqiiallaattaasimapput.
AAMMA ATUARUK Nukissiorfiit pisortaat soraartoq: Qamittoornernut attuumassuteqanngilaq
Aningaasaqarnermut Akileraartarmermullu Ataatsimiititaliap siulittaasua, Jens Napaattoq (N), imatut allappoq.
- Aserfallatsaaliinissamut aningaaaliissuteqartoqartariaqarnera Nukissiorfiit ukiorpassuarni nalunaarsuinermikkut takutittuarnikuuaat. Nuummi arlaleriarluni qamittoortoqartareersorlu taanna imatut tusagassiuutinut nalunaaruteqarpoq:
- Nuummi taamaallaat ajornartorsiortoqanngilaq. Sineriammi tamani atassuteqarniarneq ajortippoq.
Pisariaqartitsineq misissorneqaqquaat
Tamatuma saniatigut Aningaasaqarnermut Akileraartarnermullu Ataatsimiititaliap pissutsit ilungersunartutut isigalugit, qamittooqqissinnaaqqunagu aserfallatsaaliinissamut aningaasatigut qanoq kinguaattoorsimatigineq ataatsimut takusinnaarusunnarput.
- Aningaasaqarnermut ataatsimiititaliap ataatsimiititaliat susassaqaqatigisat peqatigalugit piaarnerpaamik qanoq aningaasaliissuteqartoqartariaqarnera paasiniarneqartariaqartoq kissaatigaat, taakkua taamatut nalunaarput.
AAMMA ATUARUK Nukissiorfiit aningaasanik pisariaqartitsivoq qulakkeerinnittariaqarporli
Nukissiornermut pisortap, Kaspar Mondrup-ip isertuunnikuunngilaa aserfallatsaaliinissamut miliuunerpassuit atorneqarnikuunnginneri, soorlu 2018-imi assigiimmik akeqartitsinissamut aaqqissuussinermik aallaaveqartumik.
Taamani innaallagissamut imeqarnermullu akit tamatta assigiimmik akiliisarnissarput aalajgangerneqarpoq, taamanili Nukissiorfiit pilersuinerminnut aningaasartuutaat inorlugit poltikerit akinik inissiillutik.
Kuseriarnerit tamaasa amigartoorutigaat
Tamatuma kinguneranik nunatsinni innuttanik imeqartitsineq tamatigut Nukissiorfinnut amigartoorutaasarpoq. Naatsumik oqaatigalugu akit qaffattariqarput, Nukissiorfiit nalunaarput.
AAMMA ATUARUK Innaallagissamik pilersuinerup unittoortarnissaa Nukissiorfiit aasarli kalerrisaarutigereerpaat
Maannakkuugallartorli Naalakkersuisut tamanna akissuteqarfigerusunngikkallarpaat.
Nukissiorfiit atortumik aserfallatsaalernissaannut ukiut tamaasa 200 miliuuni koruunit aningaasaliissutigeqqittarnissaat pisariaqarpoq. Siorna tamatumunnga aningaasaliissutaapput 38 miliuuni koruunit.