Innaallagissamik pilersuinerup unittoortarnissaa Nukissiorfiit aasarli kalerrisaarutigereerpaat
Innaallagissamik, kiassarnermik imermillu pilersuisinnaaneq, ilaanni Nuummi ajornartorsiutaasoq, 2020 pillugu naatsorsuutini Nukkissiorfiit kalerriutigereerpaat.
Sapaatip akunnerani kingullermi Nuuk sivisuumik taartuinnaaqattaarpoq.
Allattoq Mathies Hvid Toft
decembarip 07-at 2021 16:08
Nutserisoq Ulf Fleischer
Ingerlaavartumik taaneqartunik pilersuisinnaaneq ilungersunartoq, upernaarli naatsorsuutini Nukissiorfiit pisortaqarfiata ersarissareernikuuaa.
- Nukissiorfiit aningaasaqarniarnerata ilungersunartumik killiliinerata ingerlaavartumik pisariqartitamik pilersuisinnaaneq ilungersunarsivoq, aserfallatsaaliortariallit aningaasaliiffigisariaqakkallu akissaqartinneqanngimmata, ingerlatsiviup pisortaqarfia taamani allappoq, imatullu itisiliilluni:
- Taamaammat Nukissiorfiit pilersuisinnaajunnaartarneri amerlaqaat, tamakkualu atortut aserfallatsaalineqarsinnaannginerinik qanganitsersimanerinillu pissuteqartut paasinarpoq.
Tamatuma saniatigut, Nukissiorfiit atortuisa ilarpassui ima qanganisaatigilersimapput, allaat taakkununnga sillimmatissat sananeqartarunnaarnikuullutik.
Iluarsaatassanut aningaasartuutissat kinguleruttoortut 100 miliuuni koruunit sinnerlugit nalillit
Nukissiorfiit namminneq naatsorsuutigaat, Kalaallit Nunaanni pilersuisinnaaneq qulakkeerniarlugu, ullumikkut atortorineqartut ukiumut 200 miliuuni koruuninik aningaasaliiffigisariaqartut.
Piviusulli malillugit tamakkua takorluugassaanngillalluunniit. Nukissiorfiit upernaaq taamaallaat 38 miliuuni koruunit aningaasaliissutaasussaasutut aalajangerpaat, tassa naliliinermi ukiumut aningaasaliissutitut pisariaqartinneqartut 19 procentii.
2018-imi nalunaarusiaq naapertorlugu aamma tamanna ersarilluinnarpoq. Ilaatigut Nuummi ingerlaavartumik pilersuisinnaanerup qulakkeernissaa pillugu imatut allassimasoqarpoq:
- Oqaluttuarisaanermi Nuummi pilersuisoqarsinnaanerata pitsaassusaa qulakkeerniassagaanni piaarnerpaamik Nuummi innaallagissamik pilersuisoqarsinnaanera isumannaarniarlugu, nutaamik innaallagissiuutissaq pisariaqarluinnarpoq.
Akit politikkikkut annertussusilikkat ajornartorsiortitsipput
2018-imi Naalakkersuisut, Siumut siuttoralugu naalakkersuisut aalajangerpaat, Nukissiorfiit akiligassarsisinnaanerat annikillineqassasoq. Taamaalilluni Nukissiorfiit akiligassarsisinnaanerannut sinaakkutaliissutaasut, 140 miliuuni koruuniniit 60 miliuuni koruuninut appartinneqarput.
Tamatumunnga ilanngullugu, Nukissiorfiiit pilersuinissaannut isumaqaatigiissummi akiliutissat 72,2, miliuuni koruunit piffissap ingerlanerani ilannganngallattaarneqarput, 2020 pillugu naatsorsuutini Nukissiorfiit nalunaarutigaat tamatumunnga pissutaasoq, Nukissiorfiit ingerlatsinermut aningaasartuutiminnik annikillisaasinnaasut.
Kabelip innaallagissap sakkortuup aqutaata ingutserneratigut Nuuk taartuinnanngorpoq.
Ukioq taanna sanaartornissamut aningaasaliissutit nutarteriffigineqarnerannut atatillugu tamakkua aalajangerneqarput. Taamaammat kikkut tamarmik imeqarnermut, kiassarnermut innaallagissamullu assigiimmik akiliisartussaammata, sineriammi atuisartunut akit appartinneqarput.
Annertunerusumilli iluanaaruteqarniarluni akit qaffassinnaanerinut Nukissiorfiit pisinnaatitaanngillat. Naalakkersuisuni politikerit akinik aalajangiisartuupput.
Kuseriarnerit tamaasa annaasaqaatigaat
Assersuutigalugu Nukissiorfiit imermik pilersuinerminnut aningaasartuutiminnit annikinnermik akeqartitsisariaqarput, politikerit akinik aalajangeereernikuummata.
Nukissiorfiit KNR-ip apersorniaraluaramigit manna tikillugu oqaaseqartoqarusunngilaq.
Taamaakkaluartoq nukissiornermut pisortaq, Kaspar Mondrup, 2020-mi naatsorsuutini 152,9 miliuuni koruuninik amigartoornerujussuarmut atatillugu oqaaseqarpoq.
- Tamatumunnga assersuutaasinnavoq biilit assakaasuni dæk-iisa ukiuni arlalinni taarsinnginneri. Taava aqqusineq quatseraangat dæk-it saarlisalissapput, taanna juunimi KNR-imut oqarpoq itisiliillunilu:
- Aningaasaliissutigineqartulli sinaakkusiliineri naapertorlugit, aningaasaliissutigisariaqakkatta matussuserniarlugit aningaasaliissuteqareeraangatta, biilit ingerlasinnaatinniarlugit motooria gear-eqarfialu isumagisariaqarput kisiannili igalaanut masarlerutaat dæk-iiluunniit immaqa taarserneqarsinnaassanatik.
Taamani Kaspar Mondrup-ip politikerinut inassutigaa, Nukissiorfiit aningaasaqarniarnerat iluarsiniarlugu akit qaffanneqarnissaat. Akilli qanoq annertutigisumik qaffattariaqarneri, taamani taassuma itisilerusunngilaa.
