Nukissiorfiit aningaasanik pisariaqartitsivoq qulakkeerinnittariaqarporli
- Ukiuni arlalinni atuisut akiliutaannit isertitavut aammalu namminersorlutik oqartussanit tapiissutit pissarsiagut malinnaasinnaasarsimanngillat aserfallatsaaliinermut nutarterinermullu aningaasartuutigut qaffasippallaarsimaneri pissutigalugit, Nukissiorfiup pisortaa Kasper Mondrup oqarpoq.
Nukissiorfiit ukiuni arlalinni isertitat aningaasartuutillu imminnut naapertuutinnginnerat pillugu naalakkersuisunut aarlerisaaruteqartarsimagaluartoq, Nukissiorfiit pisortaata Kasper Mondrupip KNR-mi apersorneqarluni siusinnerusukkut oqaatigaa.
Matumani aserfallatsaaliinermut ineriartortitsinermullu tunngasut pineqarput, tassa innuttaasut sarfaqarnerannut innaallagiaqarnerannut kiassarnerannullu tunngatillugu.
- Ukiuni arlalinni atuisut akiliutaannit isertitavut aammalu namminersorlutik oqartussanit tapiissutit pissarsiagut malinnaasinnaasarsimanngillat aserfallatsaaliinermut nutarterinermullu aningaasartuutigut qaffasippallaarsimaneri pissutigalugit, Nukissiorfiup pisortaa Kasper Mondrup oqarpoq.
AAMMA ATUARUK Innaallagissamik pilersuinerup unittoortarnissaa Nukissiorfiit aasarli kalerrisaarutigereerpaat
Kasper Mondrup naapertorlugu, ukiuni arlalinni nutarterinermut tunngasut kinguariartulersimapput taamaalillunilu innaallagissamik, imermik kiassarnermullu pilersuineq qajannarsiartulersimalluni.
Nukissiorfiimmi Namminersorlutik Oqartussanit pigineqarpoq, naggataatigullumi politikerit taakkuupput ajornartorsiummut matumunnga qularnaarinnittussat. Taamaalillunilu suliffeqarfiup ingerlatsinera akisussaaffeqartumik ingerlatsilersinnaaqqullugu.
- Politikerit tassaapput, tamatuma aaqqinneqarnissaanut naggataatigut aalajangertussat, aamma nalunngilara naalakkersuisut tamanna eqqumaffigigaat, Kasper Mondrup erseqqissaavoq.
Aki appasippallaarpoq
Nukissiorfiit isertitaat aningaasartuutissaasalu oqimaaqatigiinnginnerat sumit peqquteqarnersoq pisortaq aperineqarami 2018-mi akinik assigiissitsilernermik tamanna peqquteqarnerarpaa.
- 2018-mi akinik assigiittussanngortitsineq atuutilersinneqarpoq, taamatullu aaqqiineq ajunngilluinnaraluarpoq taamaalillunimi nunatsinni najugallit tamarmik assigiimmik akiliuteqarsinnaalermata, kisianni akinik inissititerinerup qanorpiaq aaqqinneqarsimanera apeqquserneqartariaqarsorinarpoq, taanna oqarpoq
AAMMA ATUARUK Nukissiorfiit Nuuk pillugu: Illoqarfiup ineriartornera nukissiuutinik pilersuinermut artukkiisoq
- Uagut naliliinerput uaniippoq, akilersueriaaseq suli qaffaqqittariaqarsoraarput, aserfallatsaaliinermummi akiligassagut aamma akilersinnaasariaqarpagut. Tamanut naammaginartumik atorsinnaasumillu aaqqiissagutta, tapiissutit annerusariaqarput, taanna oqarpoq.
Naalakkersusioq aaqqiissutissamik neriorsuivoq
Nukissiuteqarnermut naalakkersuisoq Kalistat Lund aperigaanni ajornartorsiut qanoq aaqqiivigerusunneraa, qularnani akivoq Nukissiorfiit aningaasaqarnera soorunami aaqqiissuteqarfiginiarlugu.
Taanna Kasper Mondrupitulli isumaqarpoq tassa akinik assigiissitsinermik allannguerusuppoq.
- Siunissaq ungasinnerusoq isigalugu aaqqiissutissamik ujaasiniarluta maanna misissuivugut, tassa Nukissiorfiup aningaasaqarnera aserfallatsaaliuinermullu qanoq inissisimasoqarnera pillugu maanna alaatsinaappugut, taanna oqarpoq.
Kalistat Lund ilaatigut isumaqarpoq, sarfamut aki appasippallaarsimasoq
- Klio-wattimut akiliutaasimasut appasippallaarsimasoraakka, taamaammanuna Nukissiorfiit atortui maanna aserfallappallaarsimasut, taamaammanuna Naalakkersuisuniit aaqqiissutissamik maanna ujartuivugut, taanna oqarpoq.
AAMMA ATUARUK Kalistat Lundip qamittoorneq misissuiffiginiaraa: Naammagittaalliorneq paasisinnaavara
Nukissiuteqarnermut naalakkersuisup oqaatiginngilaa akiliutinik qaffaasoqartariaqartoq imaluunniit aningaasat suminngaanniit pineqassanersut.
Nukissiorfiup nammineerluni missiliuutai naapertorlugit nunatsinnni sarfamik pilersuineq qularnaatsumik ingerlassappat ukiut tamaasa 200 mio koruuninik Nukissiofik pisariaqartitsivoq.
Nukissiorfiup atortuisa aserfallatsaalerneqarnissaannut ukioq kingulleq 38 mio koruuninik aningaasaliisoqarpoq.
