Nalinginnaasuusussaanngilaq taama pisoqarnera, Kalistat Lund Nuummi qamittooqqangaatsiarneq pillugu oqarpoq. Toqqorsivimmit assiAssi: Naalakkersuisut

Kalistat Lundip qamittoorneq misissuiffiginiaraa: Naammagittaalliorneq paasisinnaavara

Taama pisoqarnera nalinginnaasuunngilaq, nukissiuutinut naalakkersuisoq, Kalistat Lund oqarpoq. Nuummi sarfamik pilersuineq ataasinngornermi unnukkulli unammillernangaatsialerpoq.

Akunnerit 18-ingajaat.

Nuummi innaallagissap ataasinngormi unnukkut qamittoornerata attavileqqinniarnera taama sivisutigivoq.

Illoqarfiit pingaarnersaata ilarujussua pingasunngornermi ullaap tungaani qamittooqqippoq.

Ualisorli sarfaneqqippoq, Namminersorlutik Oqartussalli pigisaata Nukissiorfiit qamittooqqeratarsinnaanera oqaatigaat. Qamittooqattaarnera Nuummi inuit akornanni pakatsissutigineqarpoq.

Nunalerinermut, imminut pilersornermut, nukissiuutinut avatangiisinullu naalakkersuisup, Kalistat Lundip (IA) pisoq tamaat maanna misissuiffigalugu suna ajutoorutaanersoq paasiniarniarpaa:

- Paasilluarpara amerlaqisut pisumut naammaginninngimmata. Aamma nalinginnaasuusussaanngilaq taama pisoqarnera. Aamma annertuumik iliuuseqartoqartariaqartoq uanga nalunngilara tassuunakkut, naalakkersuisoq oqarpoq.

- Maannakkut pisut naammasseriarpata aallarteqqeriarpat, taava naalakkersuinikkut aamma oqartussaasut, akisussaasullu tamakku paasiniartariaqarpagut. Sooq taama pisoqarsimava, siunissamilu taama pisoqaqqinnginnissaa uanga sulissutigissavara, Kalistat Lund oqarpoq.

Naalakkersuisoq sarfaaruttooqqangaatsiarneq pillugu aatsaat oqaaseqarpoq.

Naalakkersuisut qamittoortoqaqqaarnermut atatillugu takussaanngippalaarnerat pillugu Siumut ullumi siusinnerusukkut tusagassiuutinut nalunaaruteqarluni ilaatigut isornartorsiuivoq.

Sarfanik ataqatigiissitsisoqartoq

Utoqqarmiut Kangerluarsunnguanni erngup nukinganik nukissiorfimmut atassuteqartoqaraluarni nukissiorfimmut aqqummi suli ajortoqartoq Nukissiorfiit pingasunngornermi ualikkut paasissutissiissutigaat.

Taamaammat Nuummi sarfaqarnissamik qulakkeernissaq pissutigalugu erngup nukinganik nukissiorfimmit illoqarfimmullu atassuteqartumut ajornartoornermi nukissiorfimmit ataqatigiissitsisoqarpoq.

Kabelit marluk imminnut attuuneratigut qamittoortoqarsimanissaa ilimanartoq Nukissiorfiit pisortaata, Kaspar Mondrupip ullumi siusinnerusukkut oqaatigaa.

AAMMA ATUARUK Siumup Naalakkersuisut sarfaarunnerani amigaatigigai

Attuuttoorneq innaallarujussuartitsilluni erngup nukinganik nukissiorfik qamittoortippaa. Kabelimik qamittoornermik kinguneqartumik kipisoqarsimasinnaasoq ippassaq nalunaarutigineqaraluarpoq.

Nukissiorfimmit sulisut pingasut Issittumi Sakkutooqarfimmit qulimiguulimmut ilaallutik ajornartorsiutaasoq nassaarisinnaanerlugu misissoriartussavaat.

Kangerluarsunnguup naqqaniittoq maanna pasitsaateqqavarput.

Kabelip ajoqutaa nassaarineqassappat, ullup affaaniit sapaatit akunnerisa arlallit tungaanut sivisussusilimmik aaqqinniarneqarsinnaanera Nukissiorfiit naatsorsuutigaat.

AAMMA ATUARUK Nukissiorfiit: Ajutoortoqartillugu innaallagissiorfitoqqaq Nuummi innaallagiaqartitsivoq

Naalakkersuisup tassunga atatillugu Nuummi nunattalu sinnerani assingusumik qamittoortoqaqqinnginnissaa qulakkeerniarpaa.

- Maani Nuummiinnaangitsoq kisianni sineriat tamaat eqqarsaatigalugu nukissiorfeqarfinni taavalu sarfalilerfiit isumannaatsumik aamma pilersuisinnaanerat aammalu aserortoqassagaluarpat sukkut aallartisinnaaneq taamatut pitsaanerusumik aaqqissugaasumik iliuuseqartoqarnissaa anguniarlugu iliuuseqassuunnga, Kalistat Lund oqarpoq. 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl