Siumup Naalakkersuisut sarfaarunnerani amigaatigigai
Ajutoornerup nalaani naak Naalakkersuisut?
Siumumit Vivian Motzfeldt taama apeqquteqarpoq.
Nukissiorfiit Nuummut sarfalersuinermik ataasinngornermi unnukkulli unammillernartorsiulerput.
Tamanna pingasunngornermi suli ajornartorsiutaavoq. Tamanna ernumanartoq Siumut oqarpoq, tassungalu tunngatillugu Naalakkersuisunit Inatsisartuniilluunniit iliuuseqartoqarnissaa kissaatigaa.
AAMMA ATUARUK Nukissiorfiit: Ajutoortoqartillugu innaallagissiorfitoqqaq Nuummi innaallagiaqartitsivoq
- Ulluni kingullerni Nuummi nukissiuuteqarnikkut pisut ernumanarput – Ilumoorsinnaanngilaq illoqarfiup inuttunersaani nukissiuuteqarnikkut taamak qajannartigisumik inissisimaneq pissappat. Naalakkersuisut pisinnaanngippata Inatsisartut ataatsimiititaliaat piaarnerpaamik katersuutitinneqarnissaat Siumumit piumasaqaatigaarput, Vivian Motzfeldt tusagassiuutinut nalunaarummi allappoq.
- Politikkikkut akisussaaffik ersarissumik tiguneqartariaqarpoq – Innuttaasut qinikkaminnik siulersorneqartariaqarput pingaartumik ulluni ilungersunartorsiorfiusuni.
Nunarput siuttussaarussimasutut inissisimasoq
Politiit, kommuni Nukissiorfiillu innuttaasunut sarfaarunnermut atatillugu kisimik maannamut paasissutissiipput.
Siumup Naalakkersuisuni ilaasortat peqataanerminnik takutitsinissaat kissaatigaa:
- Maqaasinarluinnartoq tassaavoq naalakkersuinikkut qanoq inissisimasoqarneranik qanorlu pilersaaruteqartoqarneranik qisuariartoqarneq ajormat – nunarput siuttussaarussimasutut inissisimatinneqarnera assorsuaq ernumalersitsivoq, Vivian Motzfeldt oqarpoq.
AAMMA ATUARUK Politiit: Sarfamik pilersuineq suli aalaakkaanngilaq
- Ilisimanngilarput ilumut aaqqiissutissavimmik suliaqartoqarnersoq, aaqqiivittoqalernersorlu.
Nukissiorfiit oqarnerat naapertorlugu Utoqqarmiut Kangerluarsunnguani erngup nukinganik nukissiorfimmit Nuummut sarfarlersuinermi ajornartorsiuteqarpoq. Nukissiorfiit ajoqutaasumik misissuileruttorput. Maannalu erngup nukinganik nukissiorfik ajornartoornermilu nukissiorfik dieselimik uuliatortoq atorlugu sarfalersuisoqarpoq.
Naak Nuummi sumiiffinni sarfaqalereeraluartoq suli aalaakkaanngilaq. Aamma imeq kiassarnerlu tassani ilaapput.
Kommuni, politiit qatserisartullu upalungaarsimanermik suliaqarput, taakkulu ulloq unnuarlu pissarsiarineqarsinnaallutik.
