Nukissiorfiit pisortaat, Kaspar Mondrup.Assi: Malik Brøns / KNR

Nukissiorfiit: Ajutoortoqartillugu innaallagissiorfitoqqaq Nuummi innaallagiaqartitsivoq

Erngup nukinganik nukissiorfiup sarfaaruttoortarneranut suna pissutaanersoq Nukissiorfiit suli paasiniarpaat. Maanna nukissiorfik dielselitortoq ukiorpassuarni ingerlanikuunngitsoq tamaviaartillugu Nuummi sarfalersuutigaat.

Nuummi innaallagiaqarniarneq akunnerni kingullerni 36-ni ingerlanerluppoq. Tamatuma saniatigut oqarasuaatitigut attaveqarniarneq aamma piffissap ilaani ajortittarpoq, angerlarsimaffippassuillu kiassarneqarsinnaanatillu imilersorneqarsinnaanatik.

Utoqqarmiut kangerluarsunnguani nukissiorfiup qamittoortarneranut pissutaasoq Nukissiorfiit suli paasinngilaat, kaabilitigulli attavilunneq pissutaannginnerarlugu. 

Ajutoornermi nukissiorfik misilittarneqarnikuunngilaq ukiorpassuarnilu ingerlanikuunani

Utoqqarmiut Kangerluarsunnguani erngup nukinganik nukissiorfik nutaajugallarmat qamittoortarneq nalinginnaagallarmat innaallagissiorfitoqaq dieselitortoq atorneqakulavoq. 

Taamani Nuuk mikinerummat innaallagiaq annikinnerujussuaq pisariaqartinneqartarpoq.

Ukiunili amerlaqisuni kingullerni Utoqqarmiut Kangerluarsunnguaniit nukissiorneq ajoquteqanngitsumik ingerlaavarnikuuvoq. Taamaammat innaallagissiorfitoqaq dieselitortoq ullumi Nuummi innaallagiaqartitsisoq ukiorpassuarni misilittarneqarnikuunngilaq.

Nukissiorfiit pisortaat, Kaspar Mondrup, taamatut oqaluttuarpoq: 

- Taanna ajutoortoqartillugu innaallagissiorfittut ukiorpassuarni atorneqarnikuunngilaq, aallartinniarneralu pisarioqaluni.

Apeqqut: Ajutoortoqartillugu innaallagissiorfiup saniatigut pisariaqartitsisoqarpa? 

- Tamanna paasiniaqqissaareerutsigu, erngup nukinganik nukissiorfik unittooraangat ajutoortoqartillugu innaallagissiorfiup dieselitortup piaartumik aallartinneqarluni illoqarfik tamaat naammattumik innaallagiaqartissinnaaniarlugu aaqqiissutissanik allannguuteqarnissaq ujartussavarput, nukissiornermut pisortaq oqaluttuarpoq. 

Kasper Mondrup-ip oqaatigaa, innaallagissiorfik dieselitortoq ingerlaavartumik misilittarneqarsinnaasanngitsoq, tamatumani erngup nukinganik nukissiorfik qaminneqaqqaartariaqassammat. Taamaammat ajutoortoqartillugu innaallagissiorfiup misilittarneqarnerani Nuuk innaallagiaqartassanngilaq. 

Ajoqutaasoq ujarlugu qulimiguulik atorneqarpoq

Utoqqarmiut Kangerluarsunnguaniit Nuummut kaabilitigut aqqutilunneq qamittoornermut ippassaq pissutaasorineqaleraluarpoq. 

Ullumikkulli allamik pissuteqarnera pasitsaanneqarpoq. 

- Erngup nukinganik nukissiorfimmiit takisoorujussuarnik kaabileqarnera qamittoornermut pissutaavoq. Anorersuarnerani kaabilit marluk attuunnerisigut innaallarujussuarnerani nukissiorfik qamittoorsimassangatinneqarpoq. Tassa kaabilit aqqutaat ajoquteqanngillat, Kasper Mondrup oqarpoq nangillunilu:

- Maanna inuit pingasut Arktisk Kommando-meersut misissuiartortippagut, taakkua qulimiguulimmiit kaabilit misissussavaat. Erngup nukinganik nukissiorfiup qamittoorneranut pissutaasoq immaqa taakkua nassaarisinnaassavaat. 

Nuup ilarujussua innaallagissiorfimmit dieselitortumit maanna innaallagiaqartinneqarmat, illoqarfiup ilaannaa maanna innaallagiaqarpoq. Tamatumunnga pissutaavoq, motoorit dieselitortut unittoornissaat pinngitsoorniarlugu taakkua arriitsumik aallartittariaqarneri.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl