Politiit: Sarfamik pilersuineq suli aalaakkaanngilaq

Nuummi innaallagiamik pilersuinermut atatillugu immikkut ittumik suli inissisimasoqarpoq.

Kalaallit Nunaanni Politiit Nuummi sarfaaruttoornermut atatillugu allapput.

Nukissiorfiimmi illoqarfiit pingaarnersaannut sarfalersuinerat ulluni pingasuni nalinginnaanngitsumik aalaakkaanngilaq.

Utoqqarmiut Kangerluarsunnguani erngup nukinganik nukissiorfik atuleqqillunilu Nuummut sarfalersuivoq, aqqutaali aalaakkaanngilaq.

AAMMA ATUARUK Nuummi anorersuarnera pissutigalugu sarfaaruttooqattaarnissaq Nukissiorfiit naatsorsuutigigaat

Taamaammat Nukissiorfiit ajornartoornermi nukissiorfimminnit erngup nukinganik nukissiorfimmiillu sarfalersuineq sulissutigaat.

- Erngup nukingasnik nukissiorfimmut aqqummi ajutooqqanera misissuiffigaarput, dieselilu atorlugu nukissiorfik, erngup nukinganik nukissiorfimmit aqqummik toqqannartumik pisariaqartitsinngitsoq atorlugu innaallagiamik pilersuinerup aamma aalaakkaannerulersinnissaa sulissutigalugu, politiit Nukissiorfiit sinnerlugit allapput.

Sarfalersuinerup aalaakkannginnera pissutigalugu peqqinnissaqarfimmut, oqarasuaatinut inuussutissallu isumannaatsuunissaat salliutinneqartut, politiit ilanngullugu allapput.

Taamaammat innuttaasut dankortinik akiliisinnaanngeriataarnissartik pissutigalugu aggorsimasuuteqarnissaat kaammattuutigineqarpoq.

Kalaallit Nunaanni Politiit oqartussat allat suliffeqarfiillu inuiaqatigiinnut pingaaruteqartut suleqatigalugit pisumut tunngatillugu ingerlaavartumik Facebookimi quppernertik aqqutigalugu paasissutissiisassapput.

Air Greenlandip Nuummiit Nuummullu timmisartuussinissat taamaatikkai

Air Greenland Nuummiit Nuummullu ullumikkut aamma timmisartuusseqqissanngilaq. Anorersuarmi sakkortooq illoqarfiit pingaarnersaata tungaanut ingerlaarpoq.

Timmisartuutileqatigiiffik Facebookimi quppernermini nalunaaqutaq 13.00 paasissutissiivoq.

Air Greenlandip angalasussat eqqugaasut angalanissaannut pilersaarutit suliarileruttorpai.

Anorersuarnera Air Greenlandimut kisimi unammillernartoqartitsinngilaq. Nukissiorfiimmi Nuummut sarfalersuiniarnermik ajornartorsiuteqarnera timmisartuuteqatigiiffiup kiffartuussivianut sianertoqarsinnaannginneranik aamma kinguneqarpoq.

Air Greenlandip attaveqarfissamut immersuiffissaq nittartakkaminiittoq innersuussutigaa.