Nuummi anorersuarnera pissutigalugu sarfaaruttooqattaarnissaq Nukissiorfiit naatsorsuutigigaat

Nukissiorfiit Nuummut sarfamik pilersuinera aalaakkaanngilaq.

Ataasinngornerup marlunngornerullu akornanni qamittooqqangaatsiarnerup kingorna sarfaqaqqilerpoq. Tamannali sivikitsuinnaavoq, pingasunngornerummi ullaavani sarfaaruteqqippoq.

Nukissiorfiit oqarnerat naapertorlugu Utoqqarmiut Kangerluarsunnguani erngup nukinganik nukissiorfiup Nuullu akornanni attuuttoorneq pissutigalugu pingasunngornermi sarfaaruttoqarpoq.

AAMMA ATUARUK Nuummi misissuivik qamittoorneq peqqutigalugu ullumi matoqqavoq

Erngup nukinganik nukissiorfik maanna atorpoq, Nukissiorfiulli erngup nukinganik nukissiorfiup Nuullu akornanni kabelini suli unammillernartoqartoq takusinnaavaat, taamaammat arlaleriarluni sarfaaruteqqinnissaq ilimagineqarsinnaavoq. Anorersualeriartorpormi tamannalu Nukissiorfimmut ajornartorsiuteqalersitseqqissaaq.

Pingasunngornermi ullup qeqqata missaani suli sarfaninngilaq.

Taamaammat Nukissiorfiit illoqarfiit pingaarnersaanni erngup nukinganik nukissiorfiup dieselitortullu atorneratigut sarfamik pilersuileqqinniarsaripput.

Naammagittarnissamut kaammattuisut

Politiit sarfaaruttooqqinnissamut aamma piareersarput.

- Utoqqarmiut Kangerluarsunngua ingerlallualeqqavoq, taamaalilluta sarfaqaleqqilluta. Maannakkutulli itsillugu aalaakkaanavianngilaq, politikommissæri, Kathrine Sandgreen oqarpoq.

Qaqugu sarfaaruttooqqittoqarsinnaanersoq ilisimaneqanngilaq.

- Piffissamik killingusaqanngilagut, Kathrine Sandgreen oqarpoq, nangillunilu:

- Inuit naammagittarnissaat kaammattuutigaarput, ullummi ingerlanerani qamittooqqeqattaarsinnaavoq.