Nukissiorfiit Nuuk pillugu: Illoqarfiup ineriartornera nukissiuutinik pilersuinermut artukkiisoq

Decembarip aallartinnerani Nuummi juullimut qulleeqqat arlallit qaminngapput.

Illoqarfik arlaleriarluni qamittoorpoq, Nukissiorfiillu ajornartoornermi nukissiuutinik aallartitsiniarneq ajornartorsiutigaat.

Nukissiorfiit Nuummi innuttaasut sarfamik sipaarnissaannik piumasaqarpoq, ilaatigut juullimut qulleeqqat atortorissaarutillu pisariaqanngitsut tamarmik qameqquneqarlutik.

Taakkumi Nukissiorfiit ajornartoornermi nukissiuutaannut ilungersortitsipput.

Nukissiorfinni pisortap, Kaspar Mondrupip oqarnera naapertorlugu Nuuk ineriartungaarami nukissiorfiit ajornartoornermi pilersuissutaat nukissiuutinik pisariaqartitsineruleriartortoqarneranut malinnaasinnaanngilaq.

- Ajornartoornermi pilersuineq illoqarfiup ineriartornera iluatigalugu aamma annertuneruleriartortuaannassaaq. Taamaammat pilersuineq illoqarfiup ineriartorneranut malinnaatinniarneqartuaannartariaqarpoq, Nukissiorfinni pisortaq, Kaspar Mondrup oqarpoq.

Illoqarfik ineriartungaatsiarnikuuvoq, dieselimillu nukissiorfiup nammassinnaasaanit ineriartornerusimalluni, Kaspar Mondrup oqarpoq

Taassuma Nuummi qamittoortoqarsimagaangat erngup nukinganik nukissiorfimmut attavineqqinnissaq periarfissaajuaannartarsimasoq nassuiaatigaa. Nukissiorfiilli innaallagissap sakkortuup kabeliata ajoquteqarnera pissutigalugu sapaatip akunnerata siuliani taamaaliorsinnaanngillat.

Illoqarfik ajornartoornermi pilersuisinnaaneq qimallugu ineriartorsimasoq

Qamittoornerit ilikkagaqarfiungaatsiarsimasut, Kaspar Mondrupip erseqqissaatigaa. Nukissiorfiit assersuutigalugu illoqarfiup ajornartoornermi nukissiutaanik aallartitsinissamut unammillernartitaqarsimapput.

Nukissiorfiit dieselimik motoritortut angisuut ajornartoornermi nukissiorfimmiittut aallartinnissaannut illoqarfimmullu atassusernissaannut pikkorinnerulersimapput.

- Maanna qanoq tulleriiaarissanerluta ilisimaqqissaarparput. Tamatumalu misilittarnissaanut siusinnerusukkut periarfissaqarsimanngilagut. Tulliani assingusumik pisoqassagaluarpat sukkanerusumik iliuuseqarsinnaanissarput qularnanngilaq.

AAMMA ATUARUK Innaallagissamik pilersuinerup unittoortarnissaa Nukissiorfiit aasarli kalerrisaarutigereerpaat

Taamaakkaluartorli ajornartoornermi pilersuinermiit sarfaliinissaq sivikinnerpaamik akunnernik sisamanit arfinilinnut sivisussuseqassaaq.

- Motorimmi kissasseqqaassapput aalaakkaassallutillu. Allaanerulluinnarlunilu ajornakusoorneruvoq, illoqarfillu ineriartungaatsiarnikuuvoq, dieselimillu nukissiorfiup nammassinnaasaanit ineriartornerusimalluni, Kaspar Mondrup oqarpoq.

Atortorissaarutinik aserfallasaaliuineq millioninik akeqassasoq

Nukissiorfiit atortutigut ajornartoornermilu pilersuinermi nutarteriffigineqarnissamut nalinginnaasumik pisariaqartitsingaatsiarpoq. Tamanna Nukissiorfiit 2020-mi ukiumoortumik nalunaarusiami allappaa.

- Nukissiorfiit aningaasaqarniarnerata ilungersunartumik killiliinerata ingerlaavartumik pisariqartitamik pilersuisinnaaneq ilungersunarsivoq, aserfallatsaaliortariallit aningaasaliiffigisariaqakkallu akissaqartinneqanngimmata, ingerlatsiviup pisortaqarfia taamani allappoq, itisiliilluni:

- Taamaammat Nukissiorfiit pilersuisinnaajunnaartarneri amerlaqaat, tamakkualu atortut aserfallatsaalineqarsinnaannginerinik qanganitsersimanerinillu pissuteqartut paasinarpoq.

AAMMA ATUARUK Unammillernartoqaratarsinnaanera piareersimaffigisariaqarparput

Tamatuma saniatigut, Nukissiorfiit atortuisa ilarpassui ima qanganisaatigilersimapput, allaat taakkununnga sillimmatissat sananeqartarunnaarnikuullutik.

Nunatsinni pilersuisinnaaneq qulakkeerniarlugu, ullumikkut atortorineqartut ukiumut 200 miliuuni koruuninik aningaasaliiffigisariaqartut, Nukissiorfiit naatsorsuutigaat.

Piviusulli malillugit tamakkua takorluugassaanngillalluunniit. Nukissiorfiit upernaaq taamaallaat 38 miliuuni koruunit aningaasaliissutaasussaasutut aalajangerpaat, tassa naliliinermi ukiumut aningaasaliissutitut pisariaqartinneqartut 19 procentii.