Nipisattassiissutinut suliap kingorna: Ataatsimiititaliap pisinnaatitaaffii ersarissarniarneqarput
Kukkunersiuinermik ataatsimiititaliaq Naalakkersuisunit paasissutissanik atortussaminillu siunissami ajornannginnerusumik pissarsiniarsinnaalissaaq.
Tamanna Inatsisartut siulittaasoqarfiata aamma Naalakkersuisut Inatsisartut aamma Naalakkersuisut pillugit inatsimmik allanngortitsinermikkut angorusuppaat. Siunnersuut Inatsisartut ullumi sisamanngornermi oqaluuserissavaat.
Suliaq nipisattassiissutinik siorna suliaqarnermit aallaaveqarpoq.
AAMMA ATUARUK Tamaat isigalugu: Nipisattassiissutit Kim Kielsenimullu tatiginninnginneq paasisaqarfigiuk
Siunnersuutikkut erseqqissarneqarpoq:
• Ataatsimiititaliaq tamatuma saniatigut qaqugukkulluunniit ingerlatsinermik
kukkunersiuinermik aallartitsiinnarani oqaluuserinniinnarluniluunniit, kisianni aamma inatsisit eqqarsaatigalugit isornarsinnaasunik kukkunersiuilluni misissuinernik
aallartitsillunilu oqaluuserinnissinnaasoq
• Ataatsimiititaliap kukkunersiuisoq Inatsisartut toqqagaat tamatuminnga qinnuiginngikkaluarlugu atortussanik pissarsiniarsinnaatitaanera Nunatta Karsiata naatsorsuutaanik taakkununngalu kukkunersiuisup oqaaseqaataanik ataatsimiititaliap ukiumoortumik misissuataarineranut atuuttoq taamatullu aamma ingerlatsinermik kukkunersiuilluni misissuinerit aamma inatsisit eqqarsaatigalugit isornarsinnaasunik kukkunersiuilluni misissuinerit ataatsimiititaliap aallartitai oqaluuserisaaluunniit
eqqarsaatigalugit atuulluni.
• Naalakkersuisut ataatsimiititaliap qinnuteqarneratigut pisussaaffeqartut atortussat suugaluartulluunniit ataatsimiititaliap suliassaminik isumaginninneranut pingaarutillit tunniunnissaannut.
Taamani Inatsisartut kukkunersiuinermut ataatsimiititaliaat suliamut akuleruppoq, kingornali suliamut tunngatillugu allagaatinik aamma eqqartuussisuserisut suliffeqarfiannut Poul Schmithimut allaqatigiissutaasimasunik pissarsiniarnerminik ajornartorsiorpoq.
Suliaq taamani naalakkersuisut siulittaasuat, Kim Kielsen, nipisattassiissutinik pisasseeqqinnermi suliamut attuumassuteqarpallaarsimasoralugu apeqqusiinermut tunngavoq, pisasseeqqinnerummi nalaani Kim Kielsenip angallatini aalisartumut attartortippaa.
Kisianni kukkunersiuinermut ataatsimiititaliaq allagaatinik piumasaminik aatsaat qaammatit tallimat qaangiuttoq pissarsivoq. Allagaatimmi taakku allakkanik takunnissinnaanermut pisinnaatitaaffimmut ilaatinneqanngitsut, Naalakkersuisut siulittaasoqarfiata taamani paasissutissiissuteqqaarmagu.
AAMMA ATUARUK Kukkunersiuinermut ataatsimiititaliap nipisattassiissutit pillugit allagaatit pissarsiarai
Hans Enoksen: Sinaakkutit tuaviornerpaamik ersarissarneqartariaqarput
Kisianni aappaagumiit, tassa januaarip aallaqqaataani 2022-miit, kukkunersiuinermut ataatsimiititalip misissuinermini Naalakkersuisunit allagaatinik paasissutissanik piniarsinnaanera qularnarunnaassaaq.
Taama Inatsisartut siulittaasoqarfiat isumaqarpoq.
Kukkunersiuinermik ataatsimiititaliap pingaarnertut suliassaraa:
• Malittarisassanik unioqqutitsinerit paasineqartarnissaat pisortallu ingerlatsinerata
paasiuminartuunissaanut peqataanissaq
• Ingerlatsiviit aalajangiinerisa inatsisinut naapertuunnerannik inuiaqatigiit
innuttaasullu ataasiakkaat qularinninnginnerat annertusassallugu
• Malittarisassat aalajangersarneqarsimasut eqqortumik aqunneqarnerannik
inatsisiliortut oqartussallu ingerlatsiviusut qularinninnginnerat
annertusassassallugu
• Malittarisassanik unioqqutitsinernik pinngitsoortitseqataasinnaasunik
kaammattuuteqartassalluni paasissutissanilluunniit qaqitsisassalluni.
- Siunnersuutip saqqummiunneqarneranut tunngaviuvoq 2020-mut nipisattassiissutinik
Naalakkersuisut qaffaanerannut atatillugu peqataasinnaanermik misissuinermik
Kukkunersiuinermut Ataatsimiititaliap oqaluuserinninneranut atatillugu Naalakkersuisunit atortussanik tunineqarnissaminik ataatsimiititaliap piumasaqarsinnaanera, taamatullu aamma peqataasinnaanermik apeqqummik oqaluuserinninnissamik ataatsimiititaliap piginnaatitaanera apeqqusermassuk, Inatsisartut siulittaasuat, Hans Enoksen (N), taama tunngavilersuivoq.
AAMMA ATUARUK Kukkunersiuinermut ataatsimiititaliaq Kielsenip iliuusaanut sakkortuumik uparuaasoq
- Kukkunersiuinermut ataatsimiititaliap piginnaatitaanera aamma paasissutissanik
atortussanillu pissarsisinnaatitaanera eqqarsaatigalugit nalorngissuteqarnerit
suugaluartulluunniit naleqqutinngilluinnarput, nakkutilliisussaatitaaneq ataatsimiititaliap isumagisassarisaa taamatullu aamma Inatsisartut Naalakkersuisullu akornanni ingerlalluartumik suleqatigiinnissaq eqqarsaatigalugit. Taamaattumik Inatsisartut Siulittaasoqarfiata tamatumunnga inatsisiliornikkut killiliussat sapinngisamik piaarnerpaamik erseqqissarneqarnissaat pisariaqartissimavaa, Hans Enoksen saqqummiussassamini taama allappoq.
Tamannalu Naalakkersuisunit aamma ilalerneqarpoq, innersuussutigineqarlunilu Inatsisartunit akuerineqarnissaa.
Inatsimmut allannguutissatut siunnersuut ullumi sisamanngornermi siullermeerneqassaq. Siunnersuut oktobarip 21-ani aappassaaneerneqariarluni, oktobarip 27-ani pingajussaaneerneqassaaq.
KNR.gl-imi isummersorfik teknikkikkut ajutooqqavoq. Ajoqutaa misissorparput.