Kukkunersiuinermut ataatsimiititaliaq Kielsenip iliuusaanut sakkortuumik uparuaasoq
Kukkunersiuinermut ataatsimiititaliap nipisattassiissutinut suliaq pillugu nassuiaatini ataasinngornermi ualikkut tunniuppaa.
Ataatsimiititaliarlu tassani sakkortuumik uparuaavoq, suliamilu isornartinneqartunik erseqqissaalluni.
Naalakkersuisut siulittaasuat, Kim Kielsen, umiatsiaminik atukkiussaqaatigaluni nipisattassiissutinik qaffaaqataanermini attuumassuteqarpallaarnersoq attuumassuteqarpallaarsimannginnersorluunniit pillugu suliaq tassani pineqarpoq.
Kukkunersiuinermik ataatsimiititaliap suliami paasissutissat piviusut paasiniarlugit Naalakkersuisunut apeqquteqarniarluni juunip aallartinnerani nalunaarutigaa.
Paasissutissallu pissarsiani aallaavigalugit nassuiaasiorpoq.
AAMMA ATUARUK IA nipisattaassiissutinut suliaq pillugu: Kukkunersiuinermut ataatsimiititaliap misissuinera pingaarneruvoq
Siulittaasoq Erik Jensen (S) ataatsimiititaliaq sinnerlugu ilaatigut ima allappoq:
- Siulittaasup pisassiissutit amerlineqarnissaannik suliarinninnerup aallartinnginnerani suliamut attuumassuteqarpallaarsimasinnaaneq pillugu isumaliutiminik Naalakkersuisunut nalunaarfiginnissimannginnera ataatsimiititaliamit sakkortuumik uparuarneqarpoq.
- Aammattaaq Naalakkersuisut pisassiissutit pillugit siunnersuummik suliarinninnginneranni Naalakkersuisunut ilaasortat ilaasa suliamut attuumassuteqarpallaarsinnaanerannik nalilersuisoqarsimasungannginnera ataatsimiititaliamit isornartinneqarpoq.
Avaleraasartoortassiissutinik 2015-imi agguaaneq suliarujussuanngorpoq, aalisarnermut taamani naalakkersuisuusumut, Karl-Kristian Krusemut tatiginninnginnermik taasisitsinermik pinngitsoortitsinermik naggataatigut inerneqarluni. Aalisartitseqatigiiffik KNT ApS avaleraasartoorniarnermut qinnuteqarmat, taamani naalakkersuisuusoq tassunga piginneqataavoq. KNT 4.285 tonsinik taamani avaleraasartoortassinneqarpoq.
Karl-Kristian Krusep attuumassuteqarpallaarnini agguaassinnginnermi kalerriutigaa. Agguaassinerlu ajunngitsumik ingerlasimasoq, kisianni naalakkersuisut attuumassuteqarpallaarsimanerminik siusinnerusukkut kalerriuteqarsimasariaqaraluartoq, Deloittep taamani misissuinermini inerniliuppaa
Paasissutissat KNR-imit
- Naalakkersuisut Siulittaasuata suliami matumani suliamut attuumassuteqarpallaarsinnaanermut apeqqummik eqqumaffiginnissimannginnera ataatsimiititaliap sakkortuumik uparuarpaa tamannalu Inatsisartunut immikkut maluginiaqqullugu.
Isornartorsiuineq siusinnerusukkut suliamut tassalu avaleraasartuunut suliamut atatinneqarpoq.
Suliami tassani Naalakkersuisut attuumassuteqarpallaarnermik apeqqummut eqqumaffiginninnerunissaannut inassut ataatsimiititaliap innersuussutigaa.
Nassuiaat tamaat uani atuarsinnaavat
Kukkunersiuinermut ataatsimiititaliaq eqqartuussisutut inissinneq ajortoq
Ataatsimiititaliarli suliani aalajangiineq ajorpoq, eqqartuussisutullu inissinneq ajorluni. Kim Kielsen attuumassuteqarpallaarsimanersoq attuumassuteqarpallaarsimannginnersorluunniit pillugu aamma isumminngilaq.
Ataatsimiititaliap isornartutut naliligai kinguneqassanersut Inatsisartut aalajangissavaat. Nassuiaallu Inatsisartunut maanna tunniunneqareertoq, kukkunersiuinermut ataatsimiititaliaq paasissutissiivoq.
Ataatsimiititaliaq suliamik misissuisimasuni kisimiinngilaq. Aamma Kim Kielsenip Danmarkimi eqqartuussissuserisoqarfik Poul Schmith misissuisereerpaa, tassanilu nipisattassiissutit qaffanneqarmata, Kielsen attuumassuteqarpallaanngitsoq nalilerneqarpoq.
Naalakkersuisulli siulittaasuata nipisattassiissutinik qaffaanermi attuumassuteqarpallaaratarsinnaanerminik kalerriisimasariaqaraluartoq eqqartuussissuserisoqarfiup nalilerpaa.