Nioqqutissat ilaat akitsorrattut: Qallersuutissat 10 koruuninik akitsortut
Pilersuisup akinut allattorsimaffianni kukkusamik nalunaarsuisoqarsimanera peqqutigalugu, manniit arfinillit akiinut naqqiuteqarpugut, manniit arfinillit 21,95 koruuninik akeqarput 29,95 koruuninik akeqanngillat.
Niuerniarneq aningaasartuuteqarnarnerulersorisimagukku, taava tamanna ilumoorluinnarpoq.
Nioqqutissammi ulluinnarni atortussat ilarpassui ukiortaamili akitsoriartuinnarput.
- Qallersuut Salami Gølimeersoq 250 g Pilersuisumi januaarimi 24,94 maanna 24,95 koruuneqarput.
- Immussuaq 400 grammi Klovborgimeersoq januaarimi 51,95 koruunilik maanna 63,95 koruuneqarpoq.
Makkariina siatsisissaq Rema 1000-meersoq, 500 g: Januaarimi 10,95 kr. – maanna 15,95 kr.
Qallersuut Salami Gølimeersoq 250 g: Januaarimi 24,95 kr. – maanna 34,95 kr.
Makkariina siatsisissaq Omameersoq, 500 g: Januaarimi 21,95 kr. - maanna 29,95 kr.
Qallersuutissat Rullepølset Pålækkerimeersut, 90 g: Januaarimi 21.95 kr. – maanna 28.95 kr.
Tusarfik: Pilersuisoq
Pilersuisummi nioqqutissaataani pisiariortorneqakkajuttuni 50-init ikinnerunngitsut qaammatit arfineq-pingasut ingerlaneranni 0,4 procentit 50 procentillu akornanni akitsortut, Pilersuisoq KNR-imut ilisimatitsivoq.
Brugsenimi nioqqutissat ilaat aamma akitsorrattut, Brugsenip Nuummi Brugseni Avannaanilu tuniniaanermi pisortaa Jes Nyborg oqarpoq.
- Nioqqutissaatitsinni ingammik inuussutissat ilaat akitsorrapput, Jes Nyborg oqarpoq.
- Nioqqutissaatitsinnili inuussutissaanngitsut ilaat soorunami aamma akitsorrapput.
- Nioqqutissat amerlanerpaartaat akitsoraluttuinnartut nioqqutissanik ukioq manna noqqaasarnitsinni arajutsisimanngilarput. Soorlu nioqqutissat Danmarkimi Coopimeersut amerlanerpaartaat akitsorrapput. Nioqqutissalli aamma allat Danmarkimi nunatsinnilu pisiortorfigisartakkatsinneersut ilaat aamma akitsorrapput.
Nioqqutissat allat ikummatissat akitsoreerneranni aamma akitsorrattut
Inuussutissat arlalinnik peqquteqartumik akitsortarput, ingammilli ikummatissat akitsornerannik peqquteqartumik akitsortarlutik.
Uulia akitsoraluttuinnarpoq, ingammik Ruslandip Ukrainemi saassusineratali kingorna.
Ukrainemi sorsunneq EU-p USA-lu nunat tamalaat Ruslandimik niueqateqarunnaaqqusineranik kinguneqarpoq, soorlu uuliamik gassimillu. Tamanna nunat killiit uuliassaalatsilernerannik kinguneqarmat uulia akitsorpoq.
Tamannalu nioqqutissanik nunatsinnut assartuititsinermi akigititamut sunniuteqaqisoq, Jes Nyborg oqarpoq.
Containerimik Danmarkimiit nunatsinnut assartuititsinermi akigititaq allanngortinneqanngilaq – Royal Arctic Linelli tamatumani aningaasat nalinginut uuliamullu tapiliussarititaa qaffangaatsiarpoq.
AAMMA ATUARUK Nioqqutissat akitsoqqinneqassangatinneqartut
- Containerimik nunatsinnut assartuititsinermi akigititamut tapiliussaq siornatigut 1800 koruuneqartoq maanna 18.000 koruuneqarpoq. Containererpassuarnik nioqqutissalinnik sapaatit akunnerit tamarluinnaasa tikittoortaratta tamatumunnga aningaasartuuteqangaatsiartarpugut, Jes Nyborg oqarpoq.
- Containerarpassuarnik nioqqutissalinnik sapaatit akunnerit tamarluinnaasa tikittoortaratta assartuisunit akiligassarsiaqartaqaagut. Tamatumunngalu akiiliisariaqartartut ajoraluartumik tassatuaapput pisiniat, taanna oqarpoq.
Brugseni nioqqutissanik noqqaanerusalersimanngikkaluarluni tamatumunnga siorna qaammatini arfineq-marlunni aningaasartuutigisamininngarnit ukioq manna 4 millionit koruunit missarluinnangajaanik aningaasartuuteqarnerulereerpoq.
Inuussutissaalatsilertoqarnerani akitsoqqeriaannartut
Uulialli akitsornera nioqqutissat ilaat akitsorrannerannut kisimi peqqutaanngilaq. Nunarsuummi ilarujussuani inuussutissaalatsilertoqarnera aamma peqqutaaqataavoq.
Danskit inuussutissarsiortut kattuffiata tassa Dansk Industrip oqarnera naapertorlugu nunarsuarmi karrinik nioqqutissat 10 procentii Ukrainemeersuupput 20 procentiilu Ruslandimeersuullutik. Karrinik nioqqutissanik Ukrainemit avammut assartuiniarneq nunami tassani sorsuttoqarneranik peqquteqartumik kipiluttunarsigaluarpoq, tamaanili umiarsualiveqarfiit ilarpaalui ammaqqereerneranni taakkunanit assartuisoqaqqittalereerpoq.
Pilersuisup nioqqutissaataani pisiariortorneqakkajuttuni 50-init ikinnerunngitsut qaammatit arfineq-pingasut ingerlaneranni 0,4 procentit 50 procentillu akornanni akitsorput.
Pilersuisoq KNR-imut taama ilisimatitsivoq.
Brugsenip nioqqutissaataani 280-t agguaqatigiisillugu 1,65 procentpointimik akitsortut ukiup qiteqqunnerani naatsorsuutaani ersertoq Brugsenillu naatsorsuutini taakku Naatsorsueqqissaartarfimmut nassiuttarai, Sermitsiaq.AG allappoq.
Coronap ukiuni kingullerni marlunni tuniluunnerani ajornartoornerit peqqutaallutik inuussutissanik nunarsuarmi sumiiffinni assigiinngitsorpassuarni nioqqutissiortukinnerusoqalerpoq, ingammik Asiami. Tamannali qaangiukkiartorpoq. Uuliali annertooq inuussutissanik nioqqutissiorfissuarni atorneqartariaqartarpoq. Atuisullumi tamatumunnga aamma akiliisariaqartartuupput.
- Nioqqutissat ilaat nunarsuarmi pisorpassuit imminnut aporaannerannik peqquteqartumik akitsorrapput, Jes Nyborg oqarpoq.
AAMMA ATUARUK Akit qaffapiloortut: Nukissiuutit inuussutissallu akitsupiloorput
Nunarpulli tamatumani soorlu Danmarkitulli eqqorneqartiginngilaq. Danmarkimimi nioqqutissat pisiariortorneqakkajuttut ilaat siorna aggustiminngarnit agguaqatigiisillugu 8,7 procentpointimik akitsorrapput.
Brugsenip nioqqutissaataani 280-t agguaqatigiisillugu 1,65 procentpointimik akitsortut ukiup qiteqqunnerani naatsorsuutaani ersertoq Brugsenillu naatsorsuutini taakku Naatsorsueqqissaartarfimmut nassiuttarai, Sermitsiaq.AG allappoq.
Nioqqutissat ilaat akitsoqqeriaannassanersut akiiluunniit apparneqassanersut kialuunniit oqaatigisinnaanngikkaluaraa, nioqqutissat ilaasa akii ukioq manna apparneqarallarnavianngitsut Brugsenimi tuniniaanermi pisortap ilimagaa. Akii taamaaginnarallassasut ilimanarneruvoq. Akitsuinerimmi maannakkorpiaq unikaallaqqapput.
- Tamanna ukiup naajartornerani qaangiukkiartulissaqqaassasoraara. Nioqqutissat ilaasa akii ukioq manna apparneqarnavianngissoraakka. Kingusinnerusukkulli aatsaat taamaaliortoqassangatippara.
Naatsorsueqqissaartarfik kisitsisinik aningaasat naleerukkiartornerannut tunngasunik septembarip naanerani saqqummiissaaq.