Nina Sikkersoq assinik Kalaallit Illuutaanni saqqummersitseqataasoq: Illu kateriffioqaaq

Kalaallit Københavnimi Løvstrædemi Illuutaata ukiunik 50-inngortorsiornera inuit illumik taassuminnga ukiut taakkua ingerlaneranni atuisuusut assinginik saqqummersitsinertalimmik malunnartinneqarpoq.

Allattoq Ann-Sophie Greve Møller

juunip 23-at 2024 11:07

Nutserisoq Hanne Petersen

Inuusuttut ilinniartut, sulisutoqqat, Folketingimi ilaasortaq nunatsinneersoq Aaja Chemnitz, eqqumiitsuliortoq aamma nunatsinneersoq Jessie Kleemann ilaqutariillu Silis Høegh-kkut assingi Kalaallit Københavnip qiterpasissuani Løvstrædemi Illuutaanni ulluni makkunani kusannataapput.

Arnaq Kalaallit Illuutaanni inimut saqqummersitsiviusumut appakaappoq, iserfigisanilu alutorerpasillugu qungujulavoq.

- Nuanneq, arnaq taanna inuit asserpaalui tikkuaatigalugit nillerpoq.

- Una arnaq aamma una arnaq angullu una ilisarisimasaraakka, arnaq taanna Nina Sikkersoq Kristoffersenimut oqarpoq.

KØBENHAVNIMI KALAALLIT ILLUUTAATA OQALUTTUASSARTAA

Københavnimi kalaallinut naapittarfissamik suliniuteqaqqaartoq tassaavoq peqatigiiffik Peqatigît Kalâtdlit, 1939-imi pilersinneqartoq.

1950-ikkunni aamma 60-ikkunni peqatigiiffik Københavnip Admirals Gjeddes Gård-imi naapittarfeqarpoq. 1967-imi Kalaallit Nunaata Landsrådia Københavnimi siunnersuisarfik Pooq aningaasalertalerpaa.

1960-ikkunni peqatigiiffiit Peqatigît Kalâtdlit aamma Kalâtdlit Inûsugtut Ataqatigît (qallunaatut 'Unge Grønlænderes Råd') suleqatigiillutik Købehavnimi illumik kalaallit aalajangersimasumik naapittarfigisinnaasaannik pissarsinialerput.

Iluatsipporlumi. Københavnip ukiunik 800-nngorluni nalliuttorsiorneranut atatillugu kommune peqatigiiffinnut 500.000-nik tunisivoq.

1973-imi illup siulersuisuisa København-ip qiterpasissuani pisuinnaat aqqutaata eqqaani Løvstræde 6-imi sølvinit sulianik suliffissuaqarfikoq tiguaat. Aappaaguani ammarpoq taaguuteqarluni "Grønlændernes Hus (Kalaallit Illuat)". Kingusinnerusukkut allatut taaguuteqalerpoq imatut: "Det Grønlandske Hus (Kalaallit Illuutaat)".

25. juuni 1974 pisortatigoortumik ammarneqarpoq illutut imminut pigisutut.

Ullumikkut illu Kalaallit Nunaanni Namminersorlutik Oqartussanit, danskit naalagaaffiannit aamma Københavnip Kommuneanit aningaasatigut tapersersorneqarpoq.

Tigusiffiit: De Grønlandske Huse (Kalaallit Illuutaat), Det Grønlandske Hus i Københavns jubilæumsskrift 2014 (Københavnimi Kalaallit Illuutaata nalliuttorsiummik 2014-imi saqqummersitaa)

Allisiguk

Tassa assiliisartoq Nina Sikkersoq Kristoffersen inuit 44-t assinginik nammineerluni assilisimasaminik Kalaallit Københavnimi Illuutaata ukiunik 50-inngortorsiornerani saqqummersitseqataavoq, inuillu assilisimasai illumik taassuminnga ukiut ingerlaneranni atuisuupput. Illumi tassani saqqumersitsineq “Kiinnat Oqaluttuartut”-mik taaneqarpoq.

Kalaallit Illuutaatami qanoq atugaatigisoq 29-inik ukiullip assiliisartup Nuummeersup paasigamiuk tupaallaatigisimavaa.

- Saqqummersitsinissannut piareersarninni inuit assigiinngitsut naapillugit nuannareqaara, taakkualu oqaluttuaat tusaallugit aamma nuanneqaaq. Taamaalillunga Kalaallit Illuutaata oqaluttuassartaa paasisaqarfigeqaara, Nina Sikkersoq Kristoffersen oqarpoq.

Illu toqqissisimalertitsivoq

Kalaallit Københavnimi Illuutaat Danmarkimi kalaallit illuutaat sisamaasut pisoqaanersaraat. Inunnik siunnersuineq nunatsinniillu Danmarkimut efterskolerianik ilinniarianillu siunnersuineq illumi tassani neqeroorutinut ilaapput.

Kalaaliminernik illumi tassani marlunngornikkut aamma sassaallertoqartarpoq. Ulluinnarnilu aamma isersimaaffiusarpoq, isersimaartullu soorlu kaffisorujoortarput sapakkererujoorlutilluuunniit.

- Kaffeqarpoq, teeqarpoq, sukkoqarpoq immoqarlunilu, aamma sapakkerisinnaavutit, isersimasut ilaat angut illarasaarluni oqarpoq. Angut taanna arlalinnik isersimaaqateqarpoq.

Illu taanna aamma appisimaarfiusarluni saqqummersitsiviusarpoq, Nina Sikkersoq Kristoffersenilu illumi tassani tassa saqqummersitsileruttorpoq.

- Kalaallit Illuutaat kateriffioqisoq paasivara, taanna oqarpoq.

Aamma atuarukKalaallit Illuutaat 50-iliivoq amerlanernillu isertoqartarniarluni

Nina Sikkersoq Kristoffersen ulluinnarni aamma kalaallit illuutaanniittarpoq. Taannami assiliisartuuinnarnani aaqqissuussinermi ataqatigiissaarisunngorniatut ilinniarnerminut atatillugu illumi tassani suliffimmik misiliilluni ilinniartuuvoq.

- Kalaallit Illuutaat arlaatigut toqqissisimalertitsivoq. Danmarkimi inuiaagaanni ikinnerussuteqartunut ilaalluni sinnerseqartutut misiginissaq kalaallisullu oqaloqatigiiffeqarsinnaanissaq pingaartorujussuuvoq, taanna oqarpoq.

- Nalagaaffeqatigiiugaluarluta nunaavugut marluk assigiinngitsunik kulturillit. Taamaammat kalaallit inuusuttut ilinniariartussat Danmarkimut pigunik ikiuussinnaasunik tapersersortissaqarlutik paasigaangamikku aamma toqqissiallattarput, taanna oqarpoq.

Kalaallit Københavnimi Illuutaata ukiunik 50-inngortorsiornera pisortatigoortumik juunip 25-ani nalliussineqassaaq. Tamatuma saniatigut juulip 29-ata tungaanut pisussamik aamma saqqummersitsisoqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.