Nikanarsagaallutik tiingaffigineqartut: Nipangersimaannarasi kisimiinngilasi
Qisuariaatit taamaattut nunatsinni nikanarsaalluni tiingasoqartarnerata akuersaaginnarneqarneranut takussutissaapput. Taamaattussaannartullu isiginnilersimaneq unitsittariaqalersoq arnat, Mikael Petersen pillugu allagaqartut qulit, ilaat isumaqarput.
Politikeri inuusuttoq imminut tatigisoq, tusagassiutinilu saqqummernermut sungiusimalluartoq siusinnerusukkut sassartarnerminit maanna tunuarsimaarneruvoq.
Ajunngitsutut misigisimagaluarluni timini allatut qisuariartoq oqaluttuaraa. Sajuppoq, qullililaarluni puigutuunngorsimallunilu.
AAMMA ATUARUK Aki-Matilda Høegh-Dam: Mikael Petersenimit inniminniilliorfiusunut ilaavunga
Siumumi allattaanerusimasumit nikanarsagaalluni tiingaffigineqartarsimanerminit misigisimasani pillugit saqqummernerminit sunnertisimasoq arajutsineqarsinnaanngilaq. Siumummi siulersuisuunerinut allagaqarami ilimagisimanngikkaluarpaa pisoq tamanut saqqummissasoq.
Kisianni arnat qulit allagaqarnerat partiip iluani pissaaneqarniunnermut ilaasutut Sermitsiaq.AG-mi allaaserineqarmalli saqqummertariaqartutut misigivoq.
- Uanga angummit taamatut aqunniarneqaqqinnianngilanga. Uanga killissakka qaangerluginaasiit naalagaaffiginiarneqarnianngilanga, allaaserisaq saqqummermat qisuariaatini taama eqqaavaa.
Tamanut saqqumminneqarnera nuannaarutigaat
Arnat qulit allagaqartut pisup tamanut saqqummernera manna nuannaarutigaat. Suliffeqarfinnimi nikanarsaalluni tiinganiartoqartarnerata akuersaaginnarneqalersimanera oqallisaalerpoq. Taamaattoqartarnera unitsinneqartariaqalertoq Aki-Matilda Høegh-Dam isumaqarpoq.
- Uani pingaartikkakku tamakkua illersorneqassanngillat massakkut. Ilumuuittumik isumaqartoqarsimappat taamaasiorneq soqutaanngitsoq ajunngitsuusoq, taava eqqarsartariaaseq taanna allanngortittariaqalerparput.
AAMMA ATUARUK MIO kinguaassiutitigut inniminniilliornerit pillugit: Siumumit arnat saqqummernerat meeqqanut pingaaruteqarpoq
Nittartakkatigut inuit naapittarfiini arnanut saqqummertunut tapersiisorpassuupput, ilaqarpulli aamma illuatungaanik qisuariartunik. Ilaammi allapput, arnat taakku siusinnerusukkut saqqumminnginnermikkut taamaattoqarneranut pisooqataasut. Tamannalu peqqutissaqarluartoq Paninnguaq Heilmann oqarpoq.
- Ersineq, nalornineq kisimiissorineq. Kisimiissorineq taanna initoorujussuunikuuvoq.
Qisuariartut ilaqarput aamma illaruaatiginnittunik.
- ”Nulukkut tiguinnarpaa, taamaaginnarpoq”. Taamaakkaluartorluunniit killissamik qaangiinerugami.
AAMMA ATUARUK Nittartakkatigut tusagassiorfik: Arnat qulit Siumumit Mikael Petersen innimiilliorsimaneraraat
Paninnguaq: Suli paqumigineqarpoq
Nikanarsaalluni tiinganiartoqartarnera inuiaqatigiit akornanni akuersaaginnarneqalersimasoq Paninnguaq Heilmann isumaqarpoq. Taamaammat arnat taakku killiliinerat paasiuminaatsinneqarsinnaammat nittartakkatigut qisuariaatit assigiinngitsut.
- Maannakkut paquminarpalukkami suli. Neriuutigaara ersinanngitsutut paquminanngitsutut eqqartorneqartalernissaa. Suli malunnarpoq inuit oqallinnerisigut ilisimarpalunngikkaat killissaq sumiinnersoq.
Pisoq Siumup allattaanerisimasaanut tunngasoq inuiaqatigiinni oqallisigineqartariaqartumut aallartitsisuusoq Aki-Matilda Høegh-Dam Paninnguaq Heilmannilu isumaqarput. Tassa nikanarsaalluni tiinganiartarnerup nipaatsumik akuersaaginnarneqartarnera.
- Uanga neriuutigersuaarpara arnarpassuit allat taama misigisimagunik ersiunnaassasut. Oqariartuutitsinniippoq akuerisussaanngilaq akuerinngilarput. Arnaavugut qulit kisimiinngilasi, Paninnguaq Heilmann oqarpoq.
Mikael Petersen pisumut oqaaseqarnissaanik periarfissikkaluarparput, KNR-imulli oqaaseqarusunngilaq eqqartuussissuserisuminullu innersuussilluni. Taanna aamma KNR-ip saaffiginnissutaanut qisuarianngilaq.
Nikanarsagaallutit tiingaviginiarneqarnikuuguvit KNR-imit attaveqarfigerusuppatsigit. news@knr.gl-imut allassinnaavutit imaluunniit oqarasuaatikkut 36 15 51-imut sianersinnaavutit.
Qanoruumi ilanngutassiaq uani takusinnaavat: