MIO kinguaassiutitigut inniminniilliornerit pillugit: Siumumit arnat saqqummernerat meeqqanut pingaaruteqarpoq
- Uanga isumaqarpunga arnat taamatut saqqummernerat pingaaruteqartorujussuusoq. Aamma nersorusuppakka qujamasuffigalugillu.
MIO-mit Meeqqat illersuisuata, Aviâja Egede Lyngep arnat qulit Siumup allattaanerisimasaata, Mikael Petersenip kinguaassiutitigut inniminniilliorsimaneranik naammagittaalliuteqarnerat pillugu nersualaarpai.
Suliarmi inersimasunut tungagaluartoq meeqqanut aamma pingaaruteqartoq, Aviâja Egede Lyngep erseqqissaatigaa.
Meeqqammi killiliinissartik ilikkassagunikku inersimasut killissaminnik qaangiiffigineqartut naaggaarnissaat pisariaqarpoq, Meeqqat illersuisuat oqarpoq.
- Isumaqarpunga taakku arnat meerartatsinnut inuusuttortatsinnut maligassiuisut taamatut iliornikkut.
Saqqummernissaat qununermik ilaqartartoq
Arnat qulit Siumumut attuumassuteqartut partiip siulersuisuunerinut Mikael Petersenimit timikkut oqaatsitigullu kinguaassiutitigut inniminniilliorfigineqartutut misigisimallutik naammagittaalliuuteqartut sapaatip-akunnerata siuliani saqqummiunneqarpoq.
Pisut, Mikael Petersenip aallaqqaammut ilisarinnginneraraluarpai. Arnalli nuluisigut pattalaartarsimallugit Ekstra Bladetimut nassuerutigaa, tamannali inniminniilliornerusutut isigisimannginnerarlugu.
Arnallu aviisikkut utoqqatsissuteqarfigalugit.
AAMMA ATUARUK Aviisi: Mikael Petersen arnat nuluisigut pattalaartarsimanerinik nassuertoq
Folketingimut ilaasortaq, Aki-Matilda Høegh-Dam isornartorsiuinermi siulliulluni tamanut saqqummerpoq. Tamatuma kingorna taassuma arnallu allat sisamat kinguaassiutitigut inniminniilliorfigineqarnerminnut assersuusiaqarlutik allagartik, partiip siulersuisuunerinut nassiussimasami assinganik tamanut saqqummersitsillutik.
Saqqummerneralli qinunertaqanngitsoornavianngitsoq, Aviâja E. Lyngep erseqqisaatigaa.
- Ulluinnarni Meeqqat illersuisuata sulininni ilisimavara taamatut nalunaarutiginninninarneq ersinermik, qununermik annertuumik ilaqartartoq, ilaatigut aamma avataaniitsinneqarnissamik imaluunniit nakkarsagaanissamut aamma eqqarsaatigalugu qununeq annertuumik atuuttarami.
Oqariartuuteqartoq nakkarsarneqassanngilaq
Arnalli aamma isornartorsiorneqarsimapput. Sermitsiaq.AG-p tallimanngornermi ilanngutassiaani kinaassutsimik isertuussisunit arlalinnit Aki-Matilda Høegh-Dam Siumumi siulittaasunngorniarnermi sunniuteqarniarneragaalluni Mikael Petersenimik isornartorsiuinerarneqarpoq.
Isornartorsiuisut partiip allattaanerata, Kim Kielsenip ataaniittup eqqugaaneratigut Kielsen aamma eqqorniarneqarnerarpaat.
AAMMA ATUARUK Aki-Matilda Høegh-Dam: Mikael Petersenimit inniminniilliorfiusunut ilaavunga
Arnat pisunik ingerlaannartumik unnerluutiginnissimannginnerarlugit ukiunilu qassiusuni utaqqeqqaarsimanerarlugit inoqatinut attaveqaatitigut qassiusunit aamma isornartorsiorneqarput.
Isornartorsiuinerilli taamaattut kinguaassiutitigut kannguttaatsuliornernik tassa nipangersaataasartut, Meeqqat illersuisuata oqaatigaa.
- Nunatsinni ileqqoq malugisartagara tassaavoq ajoraluartumik - saqqummiussisut – taakkuupput – aamma ilaatigut nakkarsarneqarlutik apeqquserniarneqarlutik inissinneqartartut.
- Taamaammat ileqqoq taanna qaangissagutsigu isumaqarpunga pingaartorujussuusoq sammineqartoq ersarissumik sammissagipput allamut saassarnagu, Aviâja E. Lynge oqarpoq.
AAMMA ATUARUK Nittartakkatigut tusagassiorfik: Arnat qulit Siumumit Mikael Petersen innimiilliorsimaneraraat
Naak MIO nunatsinni meeqqat pisinnaatitaaffiinik sulissuteqartuugaluartoq inersimasorpassuit kinguaassiutitigut kanngutsaatsuliornernik peqqammisunik imaluunniit ukiorpassuit matuma siorna pisimasunik aamma oqaatiginnittartut, MIO-p paasissutissiissutigaa.
