Nick Nielsenip naammagittaalliuutaa ombudsmandip itigartippaa
Pituffimmi kiffartuussinissamik isumaqatigiissutip annaaneqarneranut atatillugu Folketingimi oqaatigisaminut naqqiissuteqarnissaminik Naalakkersuisut siulittaasuannit peqquneqarnini Nick Nielsenip Inatsisartut ombudsmandiannut naammagittaalliuutigaa.
Pituffimmi sakkutooqarfimmi kiffartuussinissamik isumaqatigiissutip annaaneqarneranut atatillugu Siumup danskillu nunanut allanut tunngasunut ministereqarfiata suleqatigiissimanerat pillugu oqaatigisaminut naqqiissuteqarnissaa naalakkersuisut siulittaasuata naalakkersuisoqarfiani pisortaasimasup Svend Hardenbergip namminerisaminik e-mailiatigut Kim Kielsenip akuerineqarluni nassiunneqarpoq.
- Kalaallit Nunaanni Naalakkersuisut suliami matumani danskit naalakkersuisuinik qanimut oqaloqateqarsimanissaat ilimagilluinnarpara - tamanna ilimagilluinnarpara, Nick Nielsen Folketingip oqaluttarfianit januaarip 21-ani taama oqarpoq.
Aamma atuaruk Nick Nielsenip soraarsitaanini paasiuminaatsippaa
Naalakkersuisut inatsisinik unioqqutitsisimanngillat
Taamatut naqqiissuteqaqquneqarnini kingorna ombudsmandimut naammagittaalliutigaa, taassumali naammagittaalliuut tassa itigartillugu.
- Suliaq misissoreerlugu isumaqarpunga Kim Kielsen e-mailimik taassuminnga nassiussinikkut ingerlatsineq pillugu inatsiseqartitsinermi malittarisassanik tunngavinniilluunniit unioqqutitsisimanngitsoq, ombudsmandi allappoq.
Vera Lethip tunngavilersuutigaa Naalakkersuisut soqutigisaannik isumaginnissinnaassaguni Naalakkersuisunut ilaasortap sinaakkusiussat atituut iluanni periarfissaqartariaqarnera pissutaasoq, matumani sulianik Naalakkersuisunut attuumassuteqartunik isummerfiginnissinnaaneq ilanngullugu eqqarsaatigalugu.
- Pisinnaatitaaffimmi tassani inunnut, matumani Folketingimut ilaasortat ilanngullugit eqqarsaatigalugit, pissutsit Naalakkersuisunut tunngasut pillugit oqaaseqaateqarsimasunut saaffiginninnissamut taakkulu oqaaseqaatinik Naalakkersuisut paasinninnerat tunngavigalugu eqqunngitsunik naqqeeqqullugit qinnuiginninnissamut periarfissaq aamma ilaavoq, ombudsmandi allappoq.
Aamma atuaruk Nickip Naalakkersuisunik tikkuartuisimanini soraarsitaassutigigaa
Oqaaseqaateqaqqusineq naalakkiinerlu assigiinngitsuupput
Vera Lethip aamma erseqqissarpaa Kim Kielsenip Nick Nielsenimut saaffiginninnermigut Nick Nielsen Folketingimut ilaasortatut qanoq oqaaseqaateqassanersoq isumaqassanersorluunniit 'aalajangiiniarnera naalakkiiniarneraluunniit pineqanngimmat'. Inassuteqaatit taamaallaat pineqarput, Nick Nielsenip malissanerlugit nammineq aalajangiiffigisinnaasai.
Svend Hardenberg e-mailimi ima allappoq:
- Naalakkersuisut isumaqatigiissut nutaaq pillugu isumaqatigiinniarnerni akuliutisinneqarsimanerannik Nickip kingusinnerusukkut oqaaseqaatigisimasai tunngavigalugit naqqiummik nassiussisariaqarpusi - Naalakkersuisut akuliutsinneqarsimanngillat.
Aamma atuaruk Kielsen tusagassiortunit kimigiiserfigineqartoq
Ombudsmandenip taamaalilluni erseqqissarpaa Hardenbergip namminerisaminik e-mailimik atuinera Namminersorlutik Oqartussani sulinermut ilaasutut isigineqartoq.
- Atorfilittat suliassamik isumagisassanngortitsineq tunngavigalugu Naalakkersuisunut ilaasortartik sinnerlugu iliuuseqarnissaannut inatsiseqartitsinikkut akornutissaqanngilaq - iliuuseqarneq taamaattoq Naalakkersuisunut ilaasortap (partiimi) politikeritut inuinnartulluunniit inissisimanera atorlugu pinngippat. Tamanna Naalakkersuisoqarfinni pisortanut Naalakkersuisoqarfiup pisortaatut inissisimanertik pissutigalugu atorfilittatut qullerpaatut Naalakkersuisunut ilaasortat apeqqutini sulianut politikkikkullu ingerlatsinermut tunngasuni siunnersortitut inissisimasunut minnerunngitsumik atuuppoq.
- Taamaalillunga ataatsimut isiginnillunga isumaqarpunga Kim Kielsen Naalakkersuisut Siulittaasuattut imaluunniit Naalakkersuisut Siulittaasuata Naalakkersuisoqarfia e-mailimik pineqartumik nassiussinikkut inatsisinik imaluunniit ingerlatsineq pillugu inatsiseqartitsinermi tunngavinnik unioqqutitsisumik iliuuseqarsimanngitsut, Vera Leth Nick Nielsenimut akissuteqaatimini taama allappoq.
Aammattaaq Kim Kielsenip Inatsisartunut ilaasortap Naaja H. Nathanielsenip § 37 naapertorlugu apeqquteqaataanut akissuteqarluni e-mailip Svend Hardenbergip namminerisaminik e-mailianit nassiunneqarsimanera ajusaarutigalugu allassimanera innersuussutigaa.
