VIDEO Kielsen tusagassiortunit kimigiiserfigineqartoq
Naalakkersuisut suliniutissaat sammineqartussaagaluarput, Folketingimulli ilaasortap Nick Nielsenip naalakkersuisoqarfimmilu pisortap Svend Hardenbergip soraarsitaanerat pillugu Kim Kielsenip ammasumik paasititsisimannginnera aammalu Pituffimmi kiffartuussinissamik isumaqatigiissutip annaaneqarnerata Naalakkersuisunit qanoq akuuffigineqarsimaneranik eqqartuussissuserisumit misissuisitsineq tusagassiortut tusarusunneruaat.
- Massakkut oqaatigeqqissavara, Nick Nielsen massakkut suliaq ingerlateqqippaa Ombudsmandimut, taava utaqqimaaginnassavarput Ombudsmandip suliassartaa tigussaaneraa. Peqataajumaarpunga tassani kissaatigissappagu. Allamik naamik.
Aamma atuaruk Kim Kielsen isorinnittumik apeqqarissaarfigineqartoq
- Suliaq (Svend Hardenberg pillugu, aaqq.) suli ingerlavoq, aamma inunnut ataasiakkaanut tunngasuuvoq. Ingerlavoq, tassani inissisimavugut massakkut.
- Inunnut ataasiakkaanut suliassanut tunngatillugu ammasuunissamik eqqartuineq tulluartutut isiginngilara tusagassiortut aqqutigalugit tamakkua sammineqaqattaassasut. Taamaammat uanerpiaq suliassanik ataasiakkaanik soorunami kakkannerusinnaasimagaluarpugut tusagassiortunut tunngatillugu paasissutissanik tunioraassalluta.
- Nunanut allanut naalakkersuisoq uangalu atsioqatigiilluta taakkununnga suliaq ingerlatipparput, suliassartaa advokatimit ingerlanneqarpoq, aamma suliassat massakkorpiaq ingerlapput paasissutissarsiortoqarpoq, suliassaq qulaajarlugu ingerlappaa, taamaammat qaqugorpiaq naammassissanersoq utaqqimaaginnassavarput, Kim Kielsen taama oqarpoq.