Kim Kielsen isorinnittumik apeqqarissaarfigineqartoq
Naalakkersuisut siulittaasuata Kim Kielsenip tusagassiortunik ullumi aggersaanermini Naalakkersuisut Inatsisartut upernaakkut ataatsimiinneranni aqagu aallartittussami saqqummiussassaat eqqartorniaraluarpai.
Kisiannili eqqartorneqartussaagaluit pinnagit allarluinnaat saammineqarput, tassami Kim Kielsen tusagassiortunit isorinnittunit apeqqarissaarfigineqalerami.
Pituffimmi suliariumannittussarsiornermi Naalakkersuisut qanoq akisusaaqataatiginerannut Svend Hardenbergillu soraarsitaaqqammerneranut tunngasunik tusagassiortut KNR-imeersut, nutaarsiassaqartitsivik Sermitsiaq.AG-imeersut Nuuk TV-imeersullu tusagaqarusullutik uteriivissorput.
Apeqqutit akineqanngitsut
Kim Kielsen nassuiaavoq qallunaamik eqqartuussissuserisumik suliakkiisimalluni, Pituffik pillugu suliamik misissuisusamik.
- Pituffimmi suliaq pillugu misissuineq naammassitinnagu ammasumik oqallittoqarnissaa kissaatiginngilara, Kim Kielsen akivoq.
Tusagassiortut paaserusukkaluarpaat eqqartuussissuserisoq sorleq sulitinneraa, tamannali aamma akerusunngilaa.
Hardenbergip soraarsitaanera suli nipangiusimavaa
Nick Nielsenip (S) folketingimit tunuartitaanera pillugu Kim Kielsen aamma itinerusumik oqaaseqarusunngilaq eqqaalluguli, Nick Nielsen ombudsmandimut saaffiginnissimasoq neriulluni suliaq qaqeqqinneqassasoq. Folketingimi Inatsisartunilu ilaasortat inatsit naapertorlugu nalunngeqatiginnissusertik kisiat tunngavigalugu sulisussaapput, partiimik piumasaat apeqqutaatinnagu.
Svend Hardenbergillu soraarsitaanera pillugu Naalakkersuisut siulittaasuat nutaamik paasissutissiinngilaq oqaannarluni inunnut ataasiakkaanut tunngasunut oqaaseqarniarnani.